Read koorete 1Xhimootoosese 2 Bible Online

1Xhimootoosese 2 - koorete bible

1Xhimootoosese 2

¹Axuse uddi Wonto hi shi'oronikeko uddime burona hinumba odde hidi ta hine. Wonto hi zeeruseniya fede axiti maddha gisha shi'uwayte, fedase hade hinukeysi mati shi'uwayte, galata uqusuwayte.

²Wonto jhasshishine gizo maxona durkutti modhetenaara koyse keenguwasaara ni yesoronike kaataxhesaara gate aheesitusaara uddi shi'uwayte.

³Yeysi mahey nimba loolusa Wontose modhiyara maggusesaarako.

⁴Wonto maxoy axi be uddina looloronikiyara aade u eroronikiyarako.

⁵Bidzi Wontowoko yesa. Assi Wontosaara axusaara feeqa yesine naqesi bidziwoko, ye esini axe maaddha Yesuusi Kristosako.

⁶Bembani uddiyade wozesa mati garsi e indo. Ye esini Wontoy <<Maaquwaye!>> hidi hido beraako e maaddho. Ye ogena axe loolusese beynesa beysiko e yese.

⁷Tamba Ayhuda maaquwasituse aadexowara aadiyara erusese anxuttesesaara woosso garxesaara matiko Wontoy taase adeto e indo. Ha esani aadewo ta zeeresa baasa zaadduwasso.

⁸Yoonase ayani hi bhikkilutteniya asanxhiti huulaara bersiyara be muxhurowa be keenguwasa hayla be kuche densi Wonto u shi'oronikeko ta worge.

⁹Yeydiwo maachitini waareeme hissine qino meddhusena oo'oyne worqiyafaara kuxuttese shushaafaara hantuttese seelo oo'oyne e woomay keddaydese maa'o maa'ena maaddhoppe. Yekke bemba ullaysi worguse ogena bishe maa'o maa'uttuwaye.

¹⁰<<Wontoko nu kuxe>> yeydi hine indowaxhiti modhe hanta hantena bemba waaruseko e worguse.

¹¹Maachiti uddi zeerena yekke ullaydi daxhidi era degexuttuwaye.

¹²Maachituse <<Asanxe erusofita, asanxiti gara adetofita!>> hidiko ta hine, mikki u hiyorosako e worguse.

¹³Esume yeydi taydosi burona Addaamey meddhutto, Hewaaney geede meddhutto gishako.

¹⁴Assi Addaamey qaarusutto baasso, Hewaaneko qaarusutti Wonto woga garda.

¹⁵Yeydi e maaddhakoni aadexonani eehanani haylonte yesonani bemba yekke ullaysisine oseydi i yessako yele yelenako i loole.