Read koorete 1Xhimootoosese 3 Bible Online

1Xhimootoosese 3 - koorete bible

1Xhimootoosese 3

¹<<Ooneni Wonto zawa cima maaqese wordako orjena modhe hantako e col'e>> yeydi hiyutta katoy aadeko.

²Yennike cima maaqesi haasse keenguwasa, bidzi machiwo ettesesa maaqeko esa e worguse. Yeydiwo alleywasa, bemba atesesa, seessa haassa gelli buduwasa, borsa mokke eehesa, axe erusese danda'esa,

³usshi goojhuwasha, tamake eexhi axaara gayluttuwasa maaqe toyya axe, bersuwasa, miijhe eehuwasa,

⁴e nayshi esuse woosuttoronikiyara kuxoronikiyara hanke be zawa modhussi atesesa maaqeko esa e worguse.

⁵Axi beese be zawa modhussi ahey esa iishako waysi Wonto zawaxita ahese e danda'e?

⁶Kille aadesesesa cimoonsofuna. Ne cimoonxa'ayko haliya biya nasshiya gelliko Humbaye gara e yaa'uttonike e gara e yaa'utte.

⁷E haassuttesumiyara Humbayey be harbhana esa aykesumiyara Wonto aadexuwa axiti da'aa modhe sunxe keenge axe maaqeko esa e worguse.

⁸Yeydiwo kurariti be kuxa kakkesa, lam'i nuuna zeeruwasa, laga usshe usheshe losse keeguwasa, miijhe degexeeme hissine woxhuwasa maaqeko usoe worguse.

⁹Be muxhurowanna <<Iitako ne hanto>> hidi hinesa keenguwasaara aachiya yechine hatte addeyda aadexo gara miingesaara maaqeko uso e worguse.

¹⁰Kurare u maaqeesume buro naddhi uso arsi beyeko e worguse. Be beyutto geede bidzi haassuse abakoy u gara dheeba'ayko kurariti hanta hantuttuwaye.

¹¹Yeydiwo indowaxhi be kuxa kakkesita, axe guncuwashita, alleywasita, uddi basuse muxhuraxe maaqeko uso e worguse.

¹²Kurariti be nayshitaara be zawa axitaara modhussi ahesa bidzi machi ade maaquttuwaye.

¹³Kurare maaddhi modhussi hanteesiti beese orje kuxako u degexe, Yesuusi Kristosanani be keenge aadexona naassi hantesuko u danda'e.

¹⁴Ukke woggaaka neeko hamese maxo keengisineko ha esa neese ta diize.

¹⁵Haliya hame ta deca'aykoni axiti Wonto zawaa waydi yesesa erese ne danda'oronike hay neese diizziko ta yese. <<Wonto zawa>> hidi hiyoy en'a maaqe Wontose e zawa axitako. Usini aadese biddowara kaachowarako.

¹⁶Aachiya yechine hatte addaa kessa ni aadexoy orje e maaqenike eezuwanxhiko. Ye esini <<Axe maaddhi addaa e bento, gizo e maaqenike Ayaanay addusso, Wonto woosaxuse e bento, be wude wude yese axituse uddi e ohutto, ha saha gara yeseesiti esa aadesso, kuxana dhaddi afaa e kesso>> yeydi hinesako.