Read koorete 1Xhimootoosese 4 Bible Online

1Xhimootoosese 4 - koorete bible

1Xhimootoosese 4

¹Ayaana Geeshi <<Aallicira beraaka bidzi bidzi axiti haluxe ayaanana eruseesiti geediyara xhoozi eruse era geediyara hangisineko Wonto be aadesechosha u dhagge>> yeydiko aasho badi nuuse e ohe.

²Ye e bisha eruseesiti zaade zeere awshachitako. U muxhuroy hade tamana zodhese qangay meddese abakoke iitaara modhiyara shati erese u danda'uwa aallo megguttiko u yese.

³Ye e bisha zaadaxiti efunxaara gelunxaara ooxako u ooxe. Wonto aadessi aade ere axitani Wonto galatisine u miyoronike meddhuttecha kaxaafa <<Muudofita!>> hidiko u tuce.

⁴E meddho abakoy uddina modheko. E katonaara shi'enaara e hayloonge gisha esa galatisine muudako inxha'utte basi bidzini baasso.

⁶Ha esa aadexeesituse ne erussako ni aadexo gisha eruse eraara modhe erunxaara muusine dicciko Yesuusi Kristosase modhe hantaxe[1] ne maaqe.

⁷Wonto kuxusuwa erunxi garafaara go'uwa mamako garafaara dhaddi zaruwa. Wonto kuxisine oseydi yesese niya lossusuwa.

⁸Be garay oseyoronike biya lossusey e go'esi oddhewoko. Bemba Wontona yesese lossusemay hanzoseni maaqqe buro gara yoone yesose e gobbuse gisha uddi basusuko e go'e.

⁹Ha ta zeerdosi aadeko. Ye esani axeydosi uddi eezzo badi aadekoydi efeko e worguse.

¹⁰Uddi axita fetto esa aadexeesita looluse en'a maaqe Wonto gobbe nu mahe gishako nu karduttesaara nu gakkesaaray.

¹¹Ha zeerita u mahoronike aadexeesituko ohuwa, erusuwa.

¹²Mulla ne maaqe gisha ooneni nemba haassoppe. Wonto aadexe geriti niya beedi hantoronike yesiya ne yese yesona zeeriya ne yese zeerena yeydiwo ne eehanaara ne aadexonaara ne geejhetenani oseywa.

¹³Neeko ta hamoro aallo Hayla Fissharo axiti uddi siyoronike zeerusuwa, kato birshi ohenani erusenani oseydi hantuwa.

¹⁴Kaayoy ne gisha zeerutto woggaakaara Wonto zawa cimiti be kuche ne gara gaddi u shidho woggaakaara Ayaana Geeshi neese indo ingona uddi wogga go'uttuwa.

¹⁵Ne aadexona ne diccosha axi uddi beyoronike neese ohuttasuna oseywa. Ne woggani ne boheni haanxhi zeerese garsi inguwa.

¹⁶Ne yesoseni maaqqe ne erusesuseni nemba kakkuwa. Neeko ta otosuna uddi oseywa. Yeysi maho'ayko nembani maaqqe siineesita loolusako ne looluse.