Read koorete 1Xhimootoosese 5 Bible Online

1Xhimootoosese 5 - koorete bible

1Xhimootoosese 5

¹Cindese adiyaxhita hade niyadekeysi beedi eehana uso gayluwa baaka u gara miindofuna. Mulla maaqe asanxita hade neyndo na'axhekeysi usaara zeeruwa.

²Cindese indowaxhitani neyndo ne beene aafena beewwa. Yeydiwo bunaycitani hade neyndo bunaycekeysi col'e baaka keddaydese geejhetena beewwa.

³Biya maresa keenguwa u adey baadese indowaxhita kussi modhussi aykuwa.

⁴I adey baadese indoy naysheni maaqqe obobaxhe i keema'ayko burussi ye nayshiti Wonto be kuxenike be zawa gerituse modhe hanta hantena beyse lossuttuwaye. Yella geriti bemba aytonike nayshi uso mati aykeko e worguse. Ye e bisha hantay Wonto maggusako e magguse.

⁵I adey baadesune bemba maresa keenguwa indoy Wontoko i gobbe. Wonta qama Wonto miindi zeerussiko be maddhase i shi'e.

⁶Ha saha magganawo yese indoy ee'isidi haydhiko i yese.

⁷Bidzoni haasse keenguwasa u yesoronike uso ha ta woosso erusuwa.

⁸Be iginituse fetto be zawa axituse worguse abako mahuwasi be aadexo dattiko e yese. Wonto aadexuwasitumeni gardese iitako.

⁹I adey baadese indo sunxe essa diizusosa ne diizesi i beray izzuppi tammume wokke maaddhesesaara bidzi adewo gellecha indowarako.

¹⁰Isini nayshe modhussi dichena, borsa mokkena, yekke ullaydi aadexeesituse worguse abako hantena, maddhundeseesita marena fede fede modhe hanta hantena haanxhi modhete hantana eruttese indo maaqeko e worguse.

¹¹U adey baadese mulla maaqe indowaxhi sunxe diizzi ettofuna. Ye usiti buro garako u acho maxoy uso iichete Kristosase be caadhecho caaqo dhaddi ade gele u worge.

¹²Hikketeko buro be caadhecho caaqo be woddusso gisha be gara e yaa'uttoronike u mahe.

¹³Yeydiwo hanta keenguwasa maaddhi se zawa ha zawa hante u losse. Ye esawoni e maaddho baane zeerese uso e worgusuwa zeere zeerdiko axe u gunce, biya gelsuwa fede axi zeeriya u gele.

¹⁴Ye e gisha u adey baadese mulla indowaxhita <<Gelli nayshe yelli be zawa modhussi ahuttuwaye>> yeydiko ususe ta hine. Yeysi u matako iilaxi u gara bidzi haasuse abakoko e dheegge.

¹⁵Hattema ye ussaafa bidzi bidziti dhaddi Humbayeko maaqe aytiko u yese.

¹⁶Ooneni aadexiya yese indoy be iginiti giddaa u adey baadese indowaxhiti yesa'ayko Wonto zawaxituse idda u maaqeesume ye indoy uso maruwayya. Yeydi e maaddho geede Wonto zawaxiti fetto bemba maresa keenguwa u adey adey baadese indowaxhita maresuko u danda'e.

¹⁷Wonto zawaxita modhussi ahiya yese cimituse fetto Wonto kato ohenani maaqqe erusena gakkeesituse u wooma keddaysi shameko e worguse.

¹⁸Hayla Fissharowa <<Kaxa bukkiya yese maydo nuuna tuttofuna!>> fede godo assi <<Hantaxituse ye u hanto wooma miijhe shameko e worguse>> yeydiko e hine.

¹⁹Wonto zawa cimiti gara dende luufose lam'i oo'oyne haydzi axi bidzi maxo e gara indo baasa ye luufo ettofuna.

²⁰Cubbo hanta axe fedeesiti beedi jhashorosa uddi aadexeesiti buro muruwa.

²¹Wonto burowara Yesuusi Kristosa burowara kuxuttese Wonto woosaxiti burowara <<Ha esa hantuwa>> hissine neese ta otosuna ne hantoronikeko odde hidi ta hine. Ye esini <<Ha esi mallako, ha'esi eeroko>> hidi shir'i ne hante abako hantofuna.

²²Oone garani haliya alleydi cima maagexese ne kuche gaddofuna. Fediti cubbowa gelli usaara bidzo maaddhi shatoppuna. Nemba geejhetena modhussi kakkuwa.

²³Laga wogga ne gawwoy harge gisha oddhe oddhe weyne daana ushuwa baaka waaxewo usshofuna.

²⁴Bidzi bidzi axiti cubboy eruttesesako, buronawoko e yaa'uttenike e erutte. Fedeesiti cubbomay aqa feysho hissineko e addeyne.

²⁵Ye esukewoko modhe hantay addaaka e bente, woggasewo aachutti yesesa maaddhakoni addeydo badi attuwasso.