Read koorete 1Xhimootoosese 6 Bible Online

1Xhimootoosese 6 - koorete bible

1Xhimootoosese 6

¹Maala maaddhi yeseesiti be uddina Wontowara aadexo gisha eruttiya yese erunxaaray cashutteesume be laaxita kuxese biya e worgusesa eruttuwaye.

²Wonto aadexiya yese be laaxe keenge maaliti Yesuusana be laaxaara wolindo nayshe be maaqe gisha be laaxe haassuttoffe. U maresuna go'uttesi Wonto aadexesaara eehuttese indo na'axhitaara u maaqe gisha fetto burome garsi uso maruttuwaye. Ha esa uso erusuwa, hantana u beysoronike mahuwa.

³Bidzoni doomete facete keenguwa ni Laaxi Yesuusi Kristosa katowara aade maaqe aadexo erunxaara dhaddi fede era eruse axi ooneni yesa'ayko

⁴ye axi <<Taa baasa ooneni yesa?>> hidi waarena kundese abani eruwa axuko. Bidzi kato gara bersesaara koysesaara iitana eetiko iita maxuwa e gele. Ye e bishay e oonesi dhiidha, birre, casho, axi gara maaquwa iita eezo hidiko.

⁵Axiti giddaakani toyyuwa bersako u oone. U maxoy faceshe gisha aadey u garafa dhaddi baadinne aadexoy ususe wodunte worge ogeko e bishe.

⁶Aadewo Wonto kuxisine <<Taase ha yesesi ellako elle>> yeydi nu hidako ittese danda'uttuwa wodunteko nu degesso.

⁷Ha sahaa ni yeluttoniya etti esaara ni yelutto basi bidzini baasso. Ha saha garafa haydhi dhaddi ni hangeniyani yeydiwo etti ni hangesi bidzini baasso.

⁸Ni muunesaara ni maa'esaara ni keendoyna ellako e elle.

⁹Wodume worgeesiti iita abakuwa gelliko u unge. Axiti iitanaara go'uwa col'anaarako hade harbhay aykenike u aykutte. Ye esako axita iisesaara baysesaara ellusesa.

¹⁰Miijhe eehey uddi iitetese e xhabhoko. Bidzi bidzi axiti miijhe degexeeme hissineko be aadexo garafa dhaddi u zardese, beeseni maddha iita gelliko suuxe u yeettese.

¹¹Neno Wonto axe maaqe Xhimootoose! Neese haanxhi iita garafa uddi ba'uwa. Gizo maaqena, uddi wogga Wontosewo maxena, aadexona dicena, feda eehena, danda'ena, shenaxe maaqena neese bidzi muxhurona oseywa.

¹²Yeydiwo ne aadesese aadexona karduttuwa. Ato maaqe laga axiti buro ne aadexo modhussi ne eruso wogga Wontoy nemba xheydi indo koolo makkina yeso minsi aykuwa.

¹³Uddiyadese yeso inge Wonto burowara Phenxhenaxi Philaxhose buro aade atteyda Yesuusi Kristosa burowara <<Nu Laaxi Yesuusi Kristosay yoone aallo ha woosso hale baakaara haassutte baakaara modhussi kakkuwa!>> hidiko oddeydi nemba ta hine.

¹⁵Kristosay addeynesi axiti esa kedda keddayse esawoy ahesa maaqe kaataxheme kaataara laaxitume laaxaara maaqe Wontoy ohoro wonteko e maaqe.

¹⁶Hay'e eruwasi e goshewoko, e yesesi ooneni esuko uqese danda'uwa keddaydese fo'iyako. Esa aafena beedese axi bidzini baasso, esa beyeseni ooneni danda'uwasso. Esuse koolo makkina kuxaara osaaray maaquwaye, Ameen.

¹⁷Ha beraa yese wodumituko <<Hinuni <Taa baaka ooni yesa?> yeydi hidofita, dhaddi gare wodunte goddofita, ni gobboronike niise uddi abako kunsi garsi inda en'a maaqe Wonto gobbuwayte!>> yeydi ohuwa.

¹⁸Modhe hanta u hantoronike yeydiwo be modhe hanta gara modhe hanta kossesesa u maaqoronike, be keenge abako jhergona shahesa u maaqoronike modhussi ohuwa.

¹⁹Ye ogenako yoone berase wodunte u bhikkille, ye woduntey aadena yeso maaqe yeso u aykoronikeko kaacho e maaqe.

²⁰Xhimootoose! Neeko odde hidi ohuttesesa modhussi kakkuwa. Era maaquwasa <<Ha esi erako>> hidi hiyutte zaade era maaqe bersa garafaara go'uwa odo garafaara dhaddi zaruwa.

²¹Bidzi bidziti ha e bisha era ayti <<Erako nu keenge>> hidi hissineko dhaddi aadexo ogiyafa kessi u yese. Wontoy axuse keenge maxo modhetey hi uddiyara wolko yesuwaye.