Read koorete 2Xhimootoosese 1 Bible Online

2Xhimootoosese 1 - koorete bible

2Xhimootoosese 1

¹Tani Phawlosey Wontoy <<Ingako ta inge>> hidi hido Yesuusi Kristosana benta yeso odusese Wonto maxoke anxuttase maaddhiko adeto ta etto. Yesuusi Kristosay ansosa maaddhi

²ta eehe ta yele maaqe Xhimootoose ha woossoko diizzi neese ta anxe. Ade maaqe Wontowara nu Laaxi Yesuusi Kristosaaray axuse keenge maxo modheteni, maarowara modhetiyaray neese maaquwaye.

³Wonta qama burse baaka Wonto shi'isine nemba ta maxeniya Wonto galatako ta galate. Hade nuwadiyaxhuke ta muxhurowa <<Iitako ne hanto>> yeydi hinesa keenguwa bidzi muxhuronako esuse ta hante, esani ta kuxe.

⁴Ne yeetto yeefo maxisine tamba e maggusoronikeko nemba ta aafena beyese orjena ta saze.

⁵Awsha keenguwa ne aadexo maxiyako ta yese. Ha neenkeysi buro ne akko Loydiyara neyndo Ewniiqiyarako aadessecha. Hatteni neni aadexenike erako ta ere.

⁶Ye e gisha ta kuche ne gara gaddi ta suuzzoniya Wontoy neese indine neeka yese ingo hade tamay dicenike ne dichorosako nemba ta maxuse.

⁷Wontoy niise indo Ayaanay osani eehani ni keemoronikiyara nimba ni kaforonikiyara e mahesa baaka ni jhashoronike mahuwasso.

⁸Yoonase Laaxi Yesuusi Kristosa gisha ohenani maaqqe Kristosame hissine taa u tuttese gisha ta tufuttenani borsofuna. Wontoy neese inge osa aallo modhe odo gisha ne gara yooda maddha taankeysi dandadhi garxuwa.

⁹Wontoy nimba loolussi esuse haylaxita nu maaqoronikeko e xheydo. Ye esa e matosi nu hanta modhetena e maaddho baanne buronawo <<Maaquwaye>> hidi beydosunaara axuse be keenge maxo modhetenaarako. Ye eehani abani meddhutto baanne e buro Yesuusi Kristosa badena nuuse ingese massi e yechoshako.

¹⁰Ye modhe maxoni numba loolusa Yesuusi Kristosa yoowenako hatte niise e addeydo. Esini haybo osa baysi be modhe odo badena hayboy essaaka baa koolo makkina yeso nuuse e addusso.

¹¹Tanini ye modhe odo ohesa, anxuttase, erusesa maaddhi maagettiko ta yese.

¹²Ha maddhani ta gara e yoodosi ye e gishako. Oone aadexiya ta yesesa ta ere gisha borsuwasso. <<Odde>> hidi hissine esuse ta indesesa ye wontey yoone aallo kafese e danda'enike modhussi erako ta ere.

¹³Doometeni faceteni keenguwa taakofa ne siido erunxuna durkutti yesuwa. Yesuusi Kristosa badena nu keenge bidzetona benta aadexowara eehaara minsi aykuwa.

¹⁴Odde hissine neese inguttese ye modhe aadexo erunxe niika yese Ayaana Geeshi osana kakkuwa.

¹⁵Isiya wude yeseesiti uddi taa datti u dhaddonike erako ne ere. Ye dhaddasitukaaka Figelosiyara Hermogenesiyarako yesa.

¹⁶Onesiforey laga woggako tamba e minso, ta tufuttosuna be geede gara hido baasso. Ha e gisha Laaxi e zawa axita maxuwaye yeydiko ta hine.

¹⁷Fetto esi Roomaa be yoodoniya worgu worgidiko tamba degexese e dandadho.

¹⁸Ye yaa'a wonte Laaxi esa maxuwaye. Efesoone ta yecho wogga waysi tamba e mardonike modhussi erako ne ere.