Read koorete 2Xhimootoosese 3 Bible Online

2Xhimootoosese 3 - koorete bible

2Xhimootoosese 3

¹Aallicira beraaka maddhunxe woggay yoonesa eruwa.

²Axiti bemba eehesita, miijhe mishuwashita, cee'utteesita, bemba nasheeshita, casheeshita, bemba yella gerituse woosuttuwasita, galatuwasita, hayloonte eruwasita,

³eeha keenguwasita, naqo inxha'eesita, gunceeshita, be col'osi geedefa maaquwasita, higilsa keenguwasita, modhe maaqe abako inxha'eesita,

⁴wolla be kundecho zeere fedase shaheesita, alleyneesita, <<Taa baaka ooni yesa?>> hidi fookkeesitako u maaqe. Wonto eehekofa beese okketti yeseko u eehe.

⁵Wonto aadexesa u bishesha baaka Wontoy be osana usaaka hantoronike inxha'ako u inxha'e. Ha e bisha axiti garafa neese dhaddi zaruwa.

⁶Ye usiti se zawa ha zawa tulxhi gelliko laga cubboy ususe hade iddake maaddhese be bishana bishana yese col'aaka gelli bidzi maxo gara ee'ese danda'uwa indowaxhita beese u di'e.

⁷Ye e bisha indowaxhiti uddi woggaako axi garafa era u worge, worguttuwaye baaka aade erese danda'uttuwasso.

⁸Hade Yaanesiyara Yamberesiyaray[1] Muse inxhadhonikeko ha geriti beese maxoni u faceshe, assi aadexiya u yese aadexoy bishuwasha maaddhineko aade u inxha'e.

⁹Ye lam'i geri muyoontey addaa kessonike ha e bisha axiti muyoontey uddi axiti buro e addeyne gisha oddhe woggasewo baaka ususe gizese danda'uwasso.

¹⁰Xhimootoose, nenimay erusiya ta yecho era, yesiya ta yecho yesoni, maxiya ta yecho maxoni, ta aadexoni, ta danda'oni, ta eehani, ta miimeteni erako ne ere.

¹¹Yeydiwo taa u beyso waayyeni, ta gara u oodo maddhani, Anxhokiya, Iqoniya, Lisxhra taa ella zeereni danda'onawo ta garsosa erako ne ere. Laaximay uddi abakowafako tamba e kesso.

¹²Yesuusi Kristosaara wolko yesine Wontose maxisine yesese worgeesiti gara uddi waayyey yootako yoone.

¹³Iita axitaara modhe bisshi qaaruseesitaaray axita haluxisiniyara beeseni halisiniyarako iita gara iita kosisine u hange.

¹⁴Nenimay neese ooniyaxhi nemba erusosa ne ere gisha ne erdese era garaara ne aytese aade garaara oseywa.

¹⁵Ne nayjhetiyafa ayti Hayla Fissharo erdiko ne yese. Ye fissharoni Yesuusi Kristosa aadessay haybowafa maaroko e degexe yeydi hinesa nemba erusese danda'esako.

¹⁶Hayla Fissharoy be uddina Wonto ayaanay durtine diizuttesesako. Aade oge erusese, halleesitani murese, doometiyafa gizusese, gizetena yesoronike lossusesuko e go'e.

¹⁷Uddi modhe hanta hantese danda'esa facete keenguwasa Wonto axe e maaqoronikeko e mahe.