Read koorete Titose 1 Bible Online

Titose 1 - koorete bible

Titose 1

¹Wonto maalaara Yesuusi Kristosana anxuttasaara maaqe Phawlosekofa. Wontoy xhardoositi uddi aadexona dicoronikiyara Wontoy eehenike u yesorosa mahe aade modhussi u eroronikiyara uso marese anxuttiko ta yese.

²Aade modhussi eriyara aadexowaray koolo makkina yeso u degexoronikeko e gobbuse. Ye koolo makkina yeso bemba aadexeesituse ingese zaaddese danda'uwa Wontoy abani meddhutto baanne gobbusiko e yecha.

³Wontoy <<Maaquwaye!>> yeydi be hido beraako be kato e adduso. Ye katoni e addusesi odde hissine taase e ohuttese gisha numba haybowafa maare Wontoy otonike ta ohe badenako.

⁴Tani aadexenike ne aadexeesuna aadena ta yele maaqe Tito neesuko ha woosso ta anxe. Ade maaqe Wontowara numba loolusase maaqe Yesuusi Kristosaaray axuse keenge modhe maxowara modhetiyaray neese maaquwaye.

⁵Nemba Qerxhese ta dhaddosi gizzo badi yesine atta base ne gizusoronikiyara nemba ta woosesenike Wonto zawa cimita katamay yese aallo uddi ne maagexoronikiyarako.

⁶Wonto zawa cimay haasse keenguwasa bidzi machiwo keengesa maaquwaye. E nayshi Wonto aadexuttuwaye baaka afa leello aykenaara woosutte dheebenaara eruttesa maaqe uso worgusuwasso.

⁷Wonto zawa cimay Wonto zawa ahesa e maaqe gisha haassuttuwasa maaqeko esa e worguse. Yeydiwo <<Taa baaka ooni yesa?>> hidi hiwasa, ukkena huuluwasa, usshi goojhuwasha, tamake eexhi axaara gayluttuwasa, miijhe degexeeme seya haya woxhuwasa maaqeko esa e worguse.

⁸Yeydi maaqekofa borsa mokke eehesa, modhe zeere worgesa, be yeso eresa, gizo axe, hayla axe, bemba kakkesa maaquwaye.

⁹Aadekoydi efuttese danda'uttesaara aadexo gisha erusso erunxaara wola ekkesaara maaqe kato etti miindesesa maaqeko esa e worguse. Ye e bisha axe be maaddho geedeko geeshi katona fedita minxesaara ha kato iile axita muresaara e danda'e.

¹⁰Yeydi esume hiyese ta dandadhosi woosuttuwasiti go'uwasa oduseesitaara qaaruseesitaaray laga axiti yese gishako. Fetto gada uttecha Ayhuda maaqe Kristosa aadexeesiti usuka yesako u yese.

¹¹Ye usiti borsuse ogena miijheme eexhisine maaquwa erunxe erusisine be zawa zawa yese axita u kumena kumena u aadexowafa u olle gisha ye e bisha axita yaho zeere u zeeruwannike maheko e worguse.

¹²Fetto Qerxhesaxe maaqicha keddaydese u eraxi u gisha ohisine <<Qerxhesaxiti uddi woggaaka zaadaxita, woluse higiluwa bo'itaara belxha keenge gawwaxitaarako>> hidiko e hidecha.

¹³Yeydi u gisha e zeerdosi aadewoko. Ye e gisha u aadexoy doomete facete keenguwasa maaqoronike Ayhudaxiti mamake go'uwa mamako geede u hanguwanikiyara aade inxha'e axiti ohesa u siwwanikiyara uso minsi kashuwa.

¹⁵Geeshi axituse uddi abakoy geeshuko. Wonto aadexuwa tunaxe maaqe axituse geeshe maaqe abakoy bidzini baasso. Fetto u maxoy iitako, u muxhurowaka <<Iitako ne hanto, modheko ne hanto>> yeydi hinesi beese tuneydi baadesesako.

¹⁶Usi <<Wonto erako nu ere>> yeydiko u hine, be hantanama Wonto eruwa axitukeko u hante. Usini darri hiseesita, woosuttuwasitaara modhe hanta hantese danda'uwasitaarako.