Read koorete Titose 2 Bible Online

Titose 2 - koorete bible

Titose 2

¹Nenimay neese doomete facete keenguwa erunxaara wolko bishesha erusuwa.

²Cindese adiyaxhita erusisine e worgusenike yeseesita, be kuxa kakkeesita, be yeso ereesita, aadexonani eehanani maaqqe danda'onani doomete facete keenguwasa u maaqoronike uso erusuwa.

³Yeydiwo cindese indowaxhita be yesona Wontose bemba garsi indeseesita bisheshesha maaddhi u yesoronike, guncuwashita, laga usshe usheeme hissine bemba aassi indo baasita, modhe zeerita eruseesita u maaqoronike uso erusuwa.

⁴Usini mulla maaqe indowaxhita be adiyaxhitaara be nayshitaara u eehoronike erusuttuwaye.

⁵Wonto katoy oonenani cashutteesume be yeso ereesita, geeshita, modhussi hanti be zawa aykeesita, modhita, be adiyaxhita afana mati ususe woosutteesita u maaqoronike uso erusuttuwaye.

⁶Yeydiwo asanxe maaqe mulliti be yeso ereesita u maaqoronike erusuwa.

⁷Be bishana bishana yese modhe maaqe abako hanti mulliti nemba beedi hantoronike mahuwa. Ooneni nimba iileesiti ni gara be zeere iita abako dheeddi u borsoronike gizo zeere zeeruwa. Yeydiwo ne eruse era aade ogenaara haassuttese danda'uttuwa ogenaara erusuwa.

⁹Maaliti be laaxita afana mati ususe uddi basuna u woosuttoronike, uso u maggusoronike, iita kato sekke u mahuwannike,

¹⁰u miijhe u kaysuwannike uso erusuwa. Ye esukofa feday u hanta uddi beedi numba maarda Wonto erunxe axi kuxoronike bidzoni zaade keenguwa aadaxe u maaqoronike uso erusuwa.

¹¹Wontoy axe e uddina haybowafa maarese mahe axuse be keenge maxo modhete addussiko e yese.

¹²Axuse e keenge modhete maxoy cubbowara acho maxowara dhaddi nu yeso erena, gizetena, e eehenike yese axe maaddhi ha saha gara nu yesoronikeko numba e mahe.

¹³Ye e bishanako Wontoy numba gobbusine ye magga wonte nu kakke. Ye nu gobbesini numba maarda keddaydese malla maaqe nu Wonto Yesuusi Kristosay kuxa fuulana addeynesako.

¹⁴Esini iitaafa uddi numba wozese modhe hanta hantese oseydesesaara esusewo maaddhese axitaara nu maaqoronikeko numba geesheme hissine nu gisha bemba garsi e indo.

¹⁵Yoonase ne erusoronike neese ohuttesi ye esako. Neese inguttese adetona modhussi uso minxuwa, muruwa! Ooneni nemba haassoppe.