Read koorete Titose 3 Bible Online

Titose 3 - koorete bible

Titose 3

¹Axiti be uddina kaatusaara afana maagitusaara siinesitaara woosuttesitaara uddi modhe hanta hanteseni naqutteseesita,

²oone garani iita zeeruwasita, bersuwasita, axaara huuluwasita, axituse uddi sheno keengeesita u maaqoronike uso sekke maxusuwa.

³Nuni nuuse nu qinose olo nu maaqichoshi gaxhuwasita, woosuttuwasita, qaarusutteesita, be bishana bishana yese abako col'eseni numba magguseseni e maala maaddheseesita, iitetenaara dhiidhanaara yeseesitako. Nuni axe inxha'icha axini numba inxha'icha hidiko.

⁴Yeydi nu maaddhakoni numba maarda nu Wontoy modhetiyara axuse be keenge eehaara e addusso woggaaka

⁵nuni hanto gizete hantana maaquwasa beese be maarowafa densiko numba haybowafa e maardo. Numba e maardosini kille yelutti shohuttenaara Ayaana Geeshi badena benta killonxenaarako.

⁶Wontoy numba maarda Yesuusi Kristosa badena Ayaana Geeshe lagussi nuuse e indo.

⁷Yeysi esume e matosi Wontoy axuse keenge maxo modhetena gizete degessi gobbisine nu kakke koolo makkina yeso nu eforonikeko.

⁸Haanxho neese ta zeerdosi aadekoydi efuttese danda'uttesako. Wonto aadexeesiti modhe hanta hantese bemba garsi u ingoronike ha esita minsi ne erusoronikeko nemba ta woose. Ye esini modhiyara axe go'esaarako.

⁹Go'uwa bersafaara axi yelutte taafo garafaara koysi garafaara Muse woga gisha dende bersa garafaara neese dhaddi zaruwa. Ye esa bisheshi go'o keenguwasaara essaafa ne degexe abakoy baasaarako.

¹⁰Shaho oone axe bidzi wogga oo'oyne lam'i wogga esa kashuwa, ye e geede esukofa neese dhaddi zaruwa.

¹¹Ye e bisha axi gizo oge maxuwasaara cubbowo hantesaara maaddhi beenna be gara yaa'a oodese axe e maaqenike erako ne ere.

¹²Tani <<Niqophilone katamaako bargo ta garxe>> hidi ta hidese gisha Arxhemaase oo'oyne Tikiqose neeko ta anxe wogga yaha taako yoowese oseywa.

¹³Kaati woga eraxe maaqe Zeenasesaara Aphilosesaara u ogese ne danda'e makko uso marese oseywa. Abani ususe facuwannike maruwa.

¹⁴Nu axiti aadena eruttese maddha keengesa marese be danda'oronike modhe hanta hantese bemba garsi inge lossuttuwaye. U yesoy aafe keenguwasa maaqe worgusuwasso.

¹⁵Taara wolko yeseesiti be uddinako nemba <<Modhiya sawa ne yese?>> hidi u sawuse. Nuura wolko Wonto aadexisine numba eeheesituse ta sawo ohuwa. Wontoy axuse keenge maxo modhetey hi uddiyara wolko yesuwaye.