Read koorete Ibraxituse 1 Bible Online

Ibraxituse 1 - koorete bible

Ibraxituse 1

¹Wontoy olo laga ogena kaayaxiti badena nuwadiyaxhituse laga woggaa zeerdiko e yecha.

²Hattema aallicira beraaka uddi base e dhaaloronike be matese be yele badenako nuuse e zeerdese. Sahaara afaara uddi Wontoy e meddhosi esunako.

³Esi Wonto kuxa fuula laci lacissi faqesako. Wontoy Wonto maaqenike esini Wonto bisha aytese Wontoko. Osa keenge be katonako uddi base kiiddhi e aytese. E yeleni axiti cubbowafa geejheshe u danda'oronike be mato geede afaaka osaxe maaqe Wonto oshichi bade uttiko e yese.

⁴Wonto yeley sundese sunxi afaase woosaxiti sunxume garesa e maaqenike esini usume garesako e maaddho.

⁵Ye esini Wontoy afaase woosaxitukaafa bidzoni <<Neni ta yeleko, nemba hanzoko ta yellese>> assi fede godo Wontoy <<Tambako esade maaqesa, esi ta yeleko e maaqe>> yeydi e hidesesi fetto baasso.

⁶Assi Wontoy angusse maaqe be yele ha saha gara be ansoniya <<Afaase Wonto woosaxiti esuse dissuwaye>> yeydiko e hido.

⁷Afaase woosaxiti gisha zeerisine <<Afaase woosaxitani hade agexuke, e maraxitani hade tama looxhekeko e mahe>> yeydiko assi e hido.

⁸Be yele gishama zeerisine Wontoy <<Wonto! Ne kaatetey koolo makkinako e yese, gizo maaqe ne adetonako ne kaatete ne ahe.

⁹Gizete ne eeto, iiteteni ne inxhadho. Ye e gisha ne Wontoy usaara wolko ne yechoshiti maggame afana maaqe maggani ne gara hade zaytekeysi gussi nemba e maagesso>> yeydiko e hido.

¹⁰Yeydiwo assi <<Laaxo! Burussi sahako ne meddho, afani ne kuchenako ne hanto.

¹¹Afani sahani baattako u baane, nenimay miindiko ne yese. Usini be uddina hade maa'okeko u cinge.

¹²Hade falokeko uso ne dakkuse. Hade maa'okeko feday feday arxutte, nenimay artuwannako, ne beray ituwasso>> yeydiko e hido.

¹³Wontoy afaase woosaxitukaafa bidzoni <<Ne iilaxiti ne toke oomo ulla u hiyoronike ta mahoro aallo ta oshichi badena uttuwa!>> yeydi e hidesesi baasso.

¹⁴Hinne afaase woosaxiti am? Usini Wontoy haybowafa be maareesita u maroronike anxe afaase e maraxita maaquttuwaye?