Read koorete Ibraxituse 10 Bible Online

Ibraxituse 10 - koorete bible

Ibraxituse 10

¹Muse wogay buro gara yoone modhe abakita jhememisi beysesa baaka beese ye esa modhussi beysesa maaquwasso. Ha e gisha axiti Wonto kuxese mati mati bera aallo uquse kaashana wogay ye uquse axita facete keenguwasa mahese danda'uwasso.

²Wogay Wonto kuxe axita aadewo facete keenguwasa mahese e dandadhako axi sekke geejhe e worgusuwannike bidziyawo geeshe maaddhi be muxhurowanna <<Cubboko ne hanto>> yeydi hinesa keenguwadiko e yecha. Kaashani uquse dhabako u dhabaane.

³Ye kaashiti cubbowafa geeshekofa berana berana cubbo maxusesako.

⁴Ye esini maydaxhiti suuxaara degele suuxaaray cubbo axi garafa ooxese danda'uwasso.

⁵Ye e gisha Kristosay ha saha gara be yoodoniyaka <<Kaashaara ingowara wordo baannako. Garama taase meddhiko ne yese.

⁶Meggutte kaashanaara cubbo gisha kaashutte kaashanaara maddo baannako.

⁷Yenniyani <Ta gisha fissharowa e diizuttesenike, Wonto, ne maxo hantese hay yoodiko ta yese> yeydiko ta hido>> yeydiko e hidese.

⁸Wogay ha esi hantuttoronike woossakoni Kristosay burussi zeerisine <<Kaashaara ingowara, meggutte kaashaara cubbo gisha kaashutte kaashaara neni wordo baannako, esunani neni maddo baannako>> yeydiko e hido.

⁹Ye e geedeni assi <<Ne maxo hantese hay yoodiko ta yese>> yeydiko e hidese. Ye e bishanako lakkunxo kaasha e baliya gadese buro yecha kaasha densi e oosso.

¹⁰Kristosay sekke be lakkuwannike bidziyawo be acho kaasha mati uqusese ye Wonto maxo e hantosuna nuni haylondiko yese.

¹¹Kahiniti be bidzi bidzina cubbo ooxese danda'uwa ye kaashita uddi wogga uqusisine uddi wonteko eedhi Wontose hantiya u yese.

¹²Kristosamay koolo makkinase ellesesa maaqe bidzi kaasha be uqusso geede Wonto oshishaa uttiko e yese.

¹³Ye wogaafa ayti be iilaxita be toke oomo ulla u hiyoro makko kafiyako e yese.

¹⁴Ye esini haylongeesita bidzi kaashanawo koolo makkinase bidzoni facete keenguwasako e mato.

¹⁵Assi Ayaana Geeshi ye e gisha nuuse ato maaddhi e oto. Burona e otosini

¹⁶<<Ta woga u muxhurowako ta gade, u kahiyakani ta diize. Buro gara usaara wolko ta caaqe caaqoy ha esako, yeydiko ta hine Laaxe maaqe tani Wontoy>> yeydiko e hido.

¹⁷Assini <<U cubbowara iita u hantaara fetto ha e geede sekke maxuwasso>> yeydiko e hido.

¹⁸Hatte, <<Axi cubbo attuwaye>> hidi e hido geede cubbo ooxese uqe kaasha ha e geede sekke worgussuwasso.

¹⁹Yoonase nuundo nayshito! Yesuusay numeysine haydhi e gusso suuxuna Haylame e Hayla godowa naassi nu geloronike nuuse maaddhiko e yese.

²⁰Haylame e Hayla hade gilbakeysi fasshecha maa'o badena kahiney gelichonike Kristosa acho badena Wontoko uqese nu danda'oronikeko killiyara en'aara maaqe oge nuuse e dodho.

²¹Wonto Hayla Zawa gara maagetese malla kahine nu keenge. Ye e gisha

²²nu geejhoronike <<Iitako ne hanto>> yeydi nu muxhurowa hinesa ooxese suuxi kaashashe shakkuttenike nu muxhurowa shati ni gara modhe waaxuna shoti aadena kundese muxhuronaara bidzoni facete keenguwa aadexonaara Wontoko nu uqqeese.

²³Numba gobbusese Wontoy be zeerdosa arxuwasa maaqe gisha <<Ha esako nu gobboy>> hidi ohiya nu yesesa sekke hanke hiye baaka minsi nu aykkoose.

²⁴Eehanaara modhe hantenaara oseydi nu yesoronike waysi wola nu birkusenike nu maxxoose.

²⁵Uddi wogga wolko muti wola nu osusseese baaka bidzi bidziti be bhikkilo dhaddonike nunini nu bhikkilo dhaddofunxhi. Ye esukofa Laaxi yoowe wontay uddhosa gaxxhi burome garsi wola nu osusseese.

²⁶Aade ni erdo geede cubbo e maaqesa erisinewo cubbo ni hantako ha e geede sekke cubbowafa maarese kaashutte kaashay baasso.

²⁷Yoonase attesesimay buro gara maaqese hine jhashushe yaa'aara Wonto inxha'eesita megge iitana muune tamaara kafewoko.

²⁸Muse woga kakkuwasi ooneni yessako e gara lam'i axi oo'oyne haydzi axi ato maaddhi zeerdo geede higile baakako wodhicho.

²⁹Hine Wonto yele haassi e gara cuttaseni maaqqe esa hayla mahe caaqoy esuna ee'e suuxe acheysha abakokeysi beedasi yeydiwo Wontoy axuse be keenge maxo modhetiyafa densi axuse e indo Ayaana Geeshe casshashi waakeydi ye esume gardese yaa'ay e gara yoonesa ye esa eruwaytuwa?

³⁰Ye esini <<Tambako gano kessesa, esi hantonikeko mati sekke ta hante>> yeydi hidasi oone e maaqenike erako nu ere. Yeydiwo <<Wontoy be axiti gara yaa'ako e yaa'e>> yeydiko e hido.

³¹En'a maaqe Wonto kuchiya ungey orjena jhashusheshako.

³²Wonto fo'e hi beedosume e geede laga maddhay hi gara yoonne hi dandadho ye buro wontita gaxhuwayte.

³³Bidzi bidzi woggaa axiti buro cashuttiko hi yecha, waayyeni hinumba axi buro beysiko u yecha. Bidzi bidzi woggani ye e bisha waayyey u gara yoodo axitaara wolko hi eedhosuna hi uddi gara maddhay yoodiko e yecha.

³⁴Hinuni hinuse ha saha wodunteme gardese modhiyara uddi wogga yesesaara maaqe wodunte hinuse afaa e yesenike hi ere gisha tufuttasituse hi jherdo, hi miijhita u bonqusune beesine maggisine hi dhaddo.

³⁵Hatte hi yesenike eezo keenguwasa Laaxe gobbisine yesuwayte! Eezo keenguwasa Laaxe gobbey keddaydese woomako e keenge.

³⁶Wonto maxo hi alsoronikiyara hinumba e gobbusese gobbo hi eforonikiyara danda'ona miindi ee'eko hinumba e worguse.

³⁷Ye esini fissharowa <<Yoowese hinesi yootako e yoone, decuwassho.

³⁸Taase maaqe gizo axi aadexonako yeso e degexe, be geede geede e hidakoma ta muxhuroy esuna magguwasso>> yeydiko e hine.

³⁹Nunimay Wonto aadessi loolowa hangeesiti bade baaka sekke be geede geede hidi baysowa hangeesiti bade maaquwanxhiko.