Read koorete Ibraxituse 11 Bible Online

Ibraxituse 11 - koorete bible

Ibraxituse 11

¹Aadexoy abani? Gobbena kafiya nu yese abako nu degexenikiyara nu beewwa abakoy e yeseninkiyara aadewo esuna nu eresako.

²Olo nuwadiyaxhiti u galatuttosi be aadesso aadexonako.

³Sahani afani Wonto katona meddhuttonike nu eresi aadexonako. Ye ogenako bentiya yese abakoy uddi bentuwa abakowafa e meddhuttonike nu ere.

⁴Aabeeley Qaa'eele kaashame efuttese danda'e kaasha Wontose e uqussosi aadexonako. Wontoy e ingo maggana be ettosuna gizo e maaqenike e addusso. Aabeeley haydhesesa maaddhakoni e aadexowafa modhe erako degexiya nu yese.

⁵Henookey haydho badi afaaka e efuttosi aadexonako. Wontoy esa etto gisha ooneni esa degexese dandadho baasso. Esa be ettosume buro biya e maggusonike addussiko e yecha.

⁶Aadexo be keenguwasa axi Wonto maggusese danda'uwasso. Ye esini Wontoko uqe axi Wontoy yesenikiyara be muxhurowafa kessi esa worgeesituse e wooma Wontoy ingenikiyara aadexeko esa e worguse.

⁷Nohey haga bento baa abako Wontoy esa <<Ha esako e maaqe>> hidi minsi e hido woggaaka esa jhasshi be zawa axita haybowafa maarese markabe aadexona e naddho. E aadexona sahay yaa'uttonike e erutto. Aadexona bente gizete e degesso.

⁸Wontoy Abrahaame <<Godo neese ingako ta inge>> yeydi hidosa e ingete efese yaha e hamoronike Wontoy oto woggaaka aadexona e woosutto. An bade be hangesa ere dheeddakoni <<Modheko>> hidi hissine e hando.

⁹Wontoy esuse ingese esa gobbusese sahaaka naabha gidda handi e uttosi aadexonako. Wontoy gobbusso gobbose esaara shahaxe maaqe Yissaaqiyara Yayqoobiyara maa'o zawaa e yesso.

¹⁰Ye esini Abrahaamey miimo kaacho keenge Wontoy massosaara hantosaara maaqe katama kafiya be yecho gishako.

¹¹Menxe maaqicha Saaray Wontoy bemba gobbusine <<Aadewo Wontoy be zeerdosa arxuwa Wontoko>> hidi be hine gisha abani cindesesa maaddhakoni xhiiqusese i dandadhosi aadexonako.

¹²Ye e gisha hade haydhesenike taabutte ye bidzi axe maaqe Abrahaame garafa hade afaa yese xhoolintekiyara hade bagade nuuna yese manchakiyara taafutti danda'uttuwa laddesesa maaqe shawey e bento.

¹³Yeenxhi uddi Wontoy uso gobbusecho gobbo degesso badi u haydhosi aadexisineko. Yeydi e maaddhakoni zara beedi hade ettesenike u maddo. Ha saha gara yesine <<Artaxaara borsaarako nuni>> hidi be gisha u oto.

¹⁴Yeydi zeere axiti beese maaqe wude modhussi be kakkenikeko u beyse.

¹⁵Datti be kesso wude sekke massesesa maaddhako be godowa maaqese danda'ako u danda'icha.

¹⁶Hattema ha sahaa yese be wudeme afaa yese gardese wudeko keddaysi wordi kafiya u yese. Ye e gisha <<Nu Wonto>> yeydi u xheydosuna Wontoy borsuwasso. Katamani ususe naddhiko e yese.

¹⁷Abrahaamey naa'utti be beyuttoniyaka Yissaaqe kaasha mati e uqussosi aadexonako. Wontoy esa gobbusecho ye bidzi be yeleko kaasheshe e hicha.

¹⁸Yissaaqe gisha Wontoy Abrahaamese <<Yissaaqe badena yeluttasiti <Ha usiti Abrahaame nayshitako> hidiko u hiyutte>> yeydiko e hidecha.

¹⁹Abrahaamey <<Wontoy fetto haybowafa denxese danda'ako e danda'e>> hidi e aadesso. Hade haybowafa e dendonike Yissaaqe sekke mati e degesso.

²⁰Yissaaqey <<Buro gara ha esi maaqoko maaqe>> hidi hissine Yayqoobiyara Eesa'owara e suuzosi aadexonako.

²¹Yayqoobey e hay'e woggay yoodi uddhine Yoosefe nayshe u bidzi bidzina e suuzosaara kallona bemba kiiddhi Wontose e dissosaaray aadexonako.

²²Yoosefeni be hay'e woggay yoodi uddhine Isra'eelaxiti Gibxhe wudiyafa u kesenike e zeerdosaara be meqete waake u hisoronike e otosaaray aadexonako.

²³Muse yella geriti Musey yeluttoniyaka moddhese bishache e maaqesa be beedo gisha kaati oobaddho jhassho badi yesine haydzi agunna aallo u aashoshi aadexonako.

²⁴Museni be dicco geede <<Faroone[2] obobako>> hidi xheygutte e inxhadhosi aadexonako.

²⁵Cubbo hantena bente maggana oddhe woggasewo maggekofa Wonto axitaara wolko maddhaa geley bishenike massi e xhardo.

²⁶Musey buro gara be ekke moore be beedese gisha Gibxhe woduntekofa Mesihe gisha haassuttey orjena go'esa e maaqenikeko e masso.

²⁷Kaati huula jhassho badi Gibxhefa e kessosi aadexonako. Bentuwa Wonto hade beya yesenike be aytese zeere garani e miindo.

²⁸Anguzaxhe wodhese woosutta Wonto woosaxi Isra'eele nayshaafa angusse angusse woddho badi e garoronike Garo Massala u kuxoronikiyara suuxe u shakkoronikiyara e matosi aadexonako.

²⁹Isra'eelaxiti hade waaxe keenguwa shoore fotta axituke Zo'o Bagadiyanna u fottosi aadexonako. Gibxhaxitimay <<Hade usukeko nu fotte>> hidi u hisune bagadey uso e ooddho.

³⁰Isra'eelaxiti Yariko katama shuchi qeyshe googe laappi wonte aallo be gooddo geede e woddoronike u matosi aadexonako.

³¹Zaakoyndo maaqicha Raabey wochiya handechashita zeere keenguwasa modhetena uso be motto gisha Wontose woosuttuwadechashitaara wolko hay'ekofa i attosi aadexonako.

³²Yoonase ha esume feda kosaa ta kose? Gedoone gisha, Bariqe gisha, Samsoone gisha, Yoftahe gisha, Dawite gisha, Samu'eele gisha, kaayaxiti gisha ta zeeroroome woggako taase hatesa.

³³Ye usiti aadexona kaataxheni u tooraxitaara wolko iisshi be oomo u mato, gizo hanta u hanto, bemba Wontoy gobbusecho gobbo u degesso, garmiti nuuna u tucco,

³⁴tama osa u bayso, soro nuunaxi garafa u tulxho, gafaxe maaqichine osaxe maaddhi u bento. Osaxe maaddhi tooraxita u dardo. Beera dargutticha naabha tooraxita u gooddo.

³⁵Indowaxhiti haydhi be garafa shahuttechashiti haybowafa dendinne u degesso. Fedeesiti haybowafa dendi gardese yeso degexese << <Wonto eruwanxhiko> hidi hiwanxhiko>> hidi yaafa oyche keenguwasa atte inxhadhi biya haybo aallo aandi elluse waayye u beedo.

³⁶Fedeesitini iitana qozoozutto, u durutto. Fedeesitini assi sansalatana tufutti tufe zawaa u dafutto.

³⁷Shuchuna u icutto, magaazena burdi lam'e u kesso, satatana uso woddho, degele kom'iyara doriti kom'iyara maadhi sekke hanke u hanto, abako keenguwasa u maaddho, waayye u beedo, maddhaa u gello.

³⁸Saha mela gawwo, boche gawwo sekke hanke hantisine googgowakaara bookowakara u yecha. Usini ha saha gara u yesoronike ha sahay ususe ellesesa maaquwadiko e yecha.

³⁹Yeenxhi be uddina be aadexona galatutteseesita maaddhakoni be gobbusuttecho gobbo degesso badiko u yese.

⁴⁰Ye esini Wontoy niise modhe abako massiko e yese. Ye e gisha ye usiti niira wolkoko baaka beesewo facete keenguwasa maaquttuwasso.