Read koorete Ibraxituse 12 Bible Online

Ibraxituse 12 - koorete bible

Ibraxituse 12

¹Yoonase nu googiya hade dhumake laddese be haydho aallo aadexona yessi ato maaddhaasita nu keenge gisha uddi nuuse hade iddake maaqe abakitaara nu buro gara nu woxhuwannike numba aytese cubbowara nu garafa oossi nu buro gara yese woxe danda'ona oseydi nu woxxheese.

²Nu aadexose denxowara alsowara maaqe Yesuusawo nu beyyeese. Esini be buro gara maggay yesesa be beedese gisha suxi mixi gara maddhundi haydhi ye be haassutte abakeysini taatto badi kaate maaqe Wonto oshichi badena handi uttiko e yese.

³Yoonase gafe baaka hanti gobbo burse hi dheeboronike haanxho uddi cubbachiti esa inxhadhi e gara matosa dandadha Yesuusa beewayte.

⁴Hinuni cubbowara wolko kardutti suuxi gukke aallo cubbo hante inxhadho badiko hi yese.

⁵Wontoy hinumba osusese hade be nayshuke mati gaylisine <<Ta yelle! Wontoy gayleniya haassofuna! E mure woggani <Wontoy tamba dhaddiko e yese> yeydi hidofuna!

⁶Ye esini Wontoy be eehesako e gayle. Hade be nayshuke be beenesako e mure>> yeydi e hidesesa bottiko hi yese.

⁷Wontoy hinumba hade adey be nayshe aykenike aykiya e yese gisha e mura danda'uwayte. Haaya mee, adey muruwa yeley oonewa?

⁸Nayshe maaqeesiti uddi muruttenike hinunini murutte dheeddako woyleysako baaka e nayshe maaquwaytako.

⁹Nuni nu uddina numba yella ade adeko nu keengicha. Usini numba u muricha, nunini uso kuxicha. En'a maaddhi nu yesoronike afaa yese nuuse ade maaqe Wontose ye esumeni garsi modhussi woosutte numba worgusuwaye?

¹⁰Numba yella nuwadiyaxhiti ususe modhe bisshi e bentoronike oddhe woggasuko u muricha. Wontomay esi hayla maaqenike nunini hayla maaqoronikeko numba go'eme hissine e mure.

¹¹Muray uddi yenniyaka higilsesako baaka magguse abako bishuwassho. Geede ye mura siidi bemba kafe lossasituse modhetey esukaaka kundese gizetiyafa bente yesoko e oone.

¹²Ye e gisha gattese hi kurmayliyara shundese hi bohiyara minxuwayte.

¹³Doomay gizoronike burome garsi e hokkaluwannike hi tokese oge gizusuwayte.

¹⁴Uddi axaara wolko modhetena yesese worguse base uddi mahuwayte. Haylondo badi yesine ooneni Laaxe beyese danda'uwa gisha haylontena yesese worguwayte.

¹⁵Hinukafa ooneni Wontoy axuse keenge maxo modhete garafa be attuwannike bemba naddhi kakkuwaye. Assi camo xhabhoy hi giddaa mudhi maddha hi gara e ooneesumiyara laga axita beeka gelsi e iisesumiyara hinumba naddhi kakkuwayte.

¹⁶Ooneni Eesa'oke be acho col'a alsemewo worgesa oo'oyne Wonto kuxuwasa be maaquwannike bemba kakkuwaye. Eesa'oy be muune kaxeeme hissine be anguzete e zal'o.

¹⁷Geede Eesa'oy sekke suuse efese wordine e ooxuttonike erako hi ere. Suuzutteme hissine yeekisine oseydi wordesesa e maaddhakoni be baysowafa attese dandadho baasso.

¹⁸Hinuni hade Isra'eelaxituke kuchena aykese danda'uso Sinna bakka gara yoodo baytako. Tamay lawi lawidi eexhe godowa, ye cenchaaka ye tulatulowaka ye keddaydese agexukaaka yoodo baytako.

¹⁹Marachoy uwwutte godowa, bidzi katoy sinte godowa yoodo baytako. Isra'eelaxiti ye bidzi kato siidi <<Ha e bisha kato nuni sekke siyese danda'uwanxhiko>> yeydi be hiyoro makko u siido.

²⁰Ye esini <<Fetto keemoni ye bakka haliya tokena garo'ayko shuchuna icutti hay'uwaye>> yeydi hine woossoy u gara deexhi e yecho gisha danda'ey uso iissho.

²¹U beedo abakoy orjena jhashushesha e maaqicho gisha fetto Musey <<Jhasshiko ta yese, koburdiko ta yese>> yeydiko e hido.

²²Hinunimay Xhiyoone bakka gara yoodiko hi yese. Esini en'aara Wonto katamaara maaqe afaa yese Yerusaleemeko. Maggana bhikkilutti yaha yese u taafoy aaca booco maaqe Wonto woosaxituko yoodiko hi yese.

²³Wontoy anguzaxhe matese u sunxi afaaka diizuttese aadeseseesiti bhikkilowa yoodiko hi yese. Uddise yaa'axe maaqe Wontokowara buro aadexicha bidzoni facete keenguwasa e matese gizo maaqeesitukowara yoodiko hi yese.

²⁴Axuseni Wontoseni feeqaase maaddhi kille caaqo essi yese Yesuusakowara axe geesheshe shakkutta suuxukowara yoodiko hi yese. Ye shakkutta suuxini Aabeele suuxukofa gardese gobboko e keenge.

²⁵Yoonase hinuse zeeriyaka yese Wonto hi inxha'uwannike hinumba naddhi kakkuwayte. Ye usiti ha saha gara yesine zeerusichashushe siye be inxhadho wogga yaa'aafa tulxhe u dheeddo geede afaafa yoodasi niise Wonto woosso zeerdine siye nu inxhadhako hine waydiwu yaa'aafa tulxhese nu danda'e?

²⁶E katoy yenniya en'ussosi sahako e maaqicha. Hattema <<Sahawo e maaddho baanne afani bidzi woggako sekke mati ta en'use>> yeydi caadhiko e oto.

²⁷<<Bidzi wogga sekke mati>> yeydi hine katoy e beysesi en'uwasiti miindi u ee'oronike en'eesiti ye esini meddhuttasiti u ooxuttoronikeko.

²⁸Ye e gisha ninini en'ese danda'uwa kaateto esaara ni ekke gisha Wonto nu galatteese. E magguse ogena kedda keddaysisiniyara jhashenaara Wonto kuxuse hanta nu hantoose.

²⁹Ye esini ni Wontoy uddina muune tamako.