Read koorete Ibraxituse 13 Bible Online

Ibraxituse 13 - koorete bible

Ibraxituse 13

¹Sekke hankeysi hade indo na'axheke wola eehuwayte.

²Borsa mokke dhaddofita. Bidzi bidzi axiti borsita mokkisineko erdo badi yesine Wonto woosaxita u mottese.

³Tufutteseesituse hade usaara wolko tufuttesenike uso bottofita. Yeydiwo uso maddha beyseesiti hade hinumbani maddha u beysenike mati uso beewayte.

⁴Laggeteesiti garaara ye e bisha hanteesiti garaara Wontoy yaa'e gisha gelleseesitaara etteseesitaaray be caadhecho caaqo kuxana kattesesa maaquttuwaye. Adey be machime fede macho machi be ademe fede ade massoppe.

⁵Wontoy <<Tani niya dakkuwasso dhagguwasso>> yeydi e hidese gisha miijhe eeha garafa dhaddi zaruwayte. <<Ta keengesi taase ellako elle>> yeydi hiwayte.

⁶Ye e gishako eezzo badi <<Wontoko taa maresi, hoodduwasso. Axi am tamba mahese danda'e?>> yeydi nu hine.

⁷Buro Wonto kato hinuko ota hinumba durkiya yeseesita bottofita. U yesowara u hantaara gaxxhi u aadexichonike aadexuwayte.

⁸Yesuusi Kristosay zineni hanzoni koolo makkinani biyawoko, artuwasso.

⁹Lossutto baa be bishana bishana yese eray hinumba didhofe. Miyose gaduttese woga katti e geede hamekofa Wontoy axuse keenge maxo modhetena muxhuro oseyeko bishesha. Miyo woga katta axiti yahafa abani degexutto baasso.

¹⁰Nuni essafa nu muunesa kaasha e gara kaashushoosha keemako nu keenge. Maa'o zawaaka Wontose hanteesitimay ye e garafa muuwannike tucuttiko e yese.

¹¹Kahinituse afana adey Wontoy axe e cubbowafa maaroronike keemo suuxe ettiko Haylame e Hayla godowaaka geliya e yese. Ye keemo ahamay axi essaa yese godowafa are kessiko megguttiya e yese.

¹²Ye e gisha Yesuusay axita beese be suuxuna haylonxesuko katamame wude maddhundi e haydho.

¹³Nunini axi essaa yese godofa kessi esuko nu hammeese, esi haassuttonike nunini nu haassuttoose.

¹⁴Ye esini nuni buro gara yoone katama kafiya nu yesesa baaka miindi eedhese katamay nuuse ha saha gara baasso.

¹⁵Yoonase Yesuusa badena galata kaasha uddi wogga Wontose nu ingoose. Galata kaasha yeydi hiyoy nu nuunana nu zeere Wonto kedda kedda esuna nu hise esa kuxuse nu katoko.

¹⁶Modhe hanta hantiyara hi keenge abakowafa fedase ingiyara bottofita. Wonto maggusesi ye e bisha kaashako.

¹⁷Hinumba durkeesituse woosuttuwayte, u adeto oomo yesuwayte. Ye esini Wontoy hanta waydi u alsonike uso oyce gisha hi lubbo kafesuko u kardutte. Hinuni ususe woosutto'ayko usi be hantako maggana u hante. Yeydi maaqe e dheeba'ayko be hantesa higilsineko u hante. Ye esini hinumba maruwasso.

¹⁸Nuuse Wonto shi'uwayte. Geeshi muxhuro nu keengenike modhussi erako nu ere. Uddi ogena modhe maaqesa hantesuko nu worge.

¹⁹Minsi hinumba ta shi'esi ukkena hinuko ta maaqoronike Wontoy mahorosa taase oseydi Wonto hi shi'orosako.

²⁰Koolo makkinase maaqe caaqose gutta suuxuna dorituse angussi yeemaxe maaddhese nu Laaxi Yesuusa haybowafa densa modhete inge Wontoy

²¹e maxo alsese hi danda'oronike modhe zeerena uddi hinumba gixuwaye. Biya maggusesa Yesuusi Kristosa badena nuuka hantuwaye. Yesuusi Kristosase koolo makki aallo kuxa fuulay maaquwaye. Ameen.

²²Nuundo nayshito! Ha hinuse ta diizzo woossoy hata e maaqe gisha waydi hi yesoronike hinumba minxese hinuse ta otosa <<Modheko>> hidi dandadhi hi eforonikeko hinumba ta shi'e.

²³Niindo na'i Xhimootoosey tufiyafa kessonike hi erorosako ta worge. Ukke hanke e yoota'ayko esaara wolko hinuko handiko hinumba ta beene.

²⁴Uddi hinumba durkeesitusaara uddi haylaxitusaara ta sawo ohuwayte. Xhaaleya wudiya yese haylaxitini <<Sawa modhiya hi yese?>> yeydiko u hine.

²⁵Wontoy axuse keenge maxo modhetey hi uddiyara wolko yesuwaye.