Read koorete Ibraxituse 2 Bible Online

Ibraxituse 2 - koorete bible

Ibraxituse 2

¹Ye e gisha nu siidese zeere garafa halli e ogiyafa nu kesseeme orjena muxhuro ye zeere gara gadeko numba e worguse.

²Afaase woosaxi badena ohutta katoy artuwasa maaddhiko e yese. Ye katoy otonike yesso baasitusaara esuse woosutto baasitusaara ususe bishe yaa'ay u gara yaa'uttiko yese.

³Hinne ha orje maaqe loolo oge nu belxheydo geede waydini <<Yaa'a garafa attoko nu atte>> hidi nu maxe? Ha loolo gisha Laaxuko beese burussi ota. Ye esa siidasitini be siidonike nuuse aade e maaqenike addussiko u yese.

⁴Wontoy loolo gisha ohe woossoy aade maaqenike beese ye ususi gara kossi beysiko e yese. E beysosini be osa beyse be bishana bishana yese micushe abakitunaara du'use abakitunaarako. Yeydiwo Wontoy be maxoke aadexeesituse Ayaana Geeshi badena ingo ususe ingenako.

⁵E gisha zeeriya nu yese buro gara yoone saha Wontoy afaase woosaxi adeto oomo mato baasso.

⁶Hayla Fissharowa bidzi godowa <<Esa ne maxoronike esi axi am? Esa ne kaforonike axi am?

⁷Oddhe woggase afaase woosaxitume ne ullaysso. Malla kuxa fuulaara galataaray esuse maaqoronike ne mato. [Ne kuchena ne hantosi gara esa ne maagesso.]

⁸Uddi abako gara esuse adeto ne indo>> yeydiko e hine. Uddi abako gara esuse adeto ingisine e adeto oomo e mato baane atta basi bidzini baasso. Yeydi e maaddhakoni hatte uddi abakoy e adeto oomo yesune beya baanxhiko.

⁹Hattema afaase woosaxitume oddhe woggaaka yekke ulla hidecha Yesuusay be hay'oronike biya mata maddha e gello gisha malla kuxa fuulaara galataaray esuse maaddhonike beyako nu yese. Esini Wontoy axuse keenge maxo modhetiyafa densi ni gisha uddi haydhiko e yese.

¹⁰Uddi abako meddhasaara kiiddhesaara maaqe Wontoy laga nayshi be kuxa fuula shahaxe u maaqoronike hissine uso loolowaka durkesa maaqe Yesuusa maddhaa gelena facete keenguwasa e maaqoronike e mato. Ye esini worgusesako e maaqicha.

¹¹Axe haylonxe Yesuusaara haylonge axaaray bidzi ade nayshe u maaqe gisha uso <<Nuundo nayshe>> yeydi hiyey Yesuusa borsusuwasso.

¹²<<Ne gisha indo nayshukoko addaa ta ohe. U bhikkilo giddaaka zingalena nemba ta galate>> yeydiko e hido.

¹³Yeydiwo <<Tani Wontoko ta gobbe>> hidi assi e hido. Fede godoni <<Hay, taara taase Wontoy indo nayshaaray yesako nu yese>> hidiko e hido.

¹⁴Wonto nayshiti axe maaqenike Yesuusani haybo gara adeto keengicha Humbaye be haybona baysese usuke axe e maaddho.

¹⁵Yeydiwo haybo jhashena be yeso makko maaketowa yechashita wozesuko.

¹⁶Ye esini Yesuusay wordosi afaase woosaxita marese e maaddho baane Abrahaame fira fiixha marese wordiko.

¹⁷Ye e gisha uddi ogena indo nayshe bishey esuse worgusesa maaddhiko e bento. Ye ogena uddi axi cubbo ooxese Wontose hantisine muxhuraxaara higilesaara maaqe kahinituse afana ade e maaddho

¹⁸Ye esini beese maddhaa be gelloniya naa'utti be beyuttecho gisha naa'owa gele axita maresuko e danda'e.