Read koorete Ibraxituse 4 Bible Online

Ibraxituse 4 - koorete bible

Ibraxituse 4

¹Yoonase kaxe ekkuso godowa gelese e gobbusese gobboy be yesenikeko yaha e yese. Hinukaafa ooneni yaha ellekofa be attuwannike bemba kakkuwaye.

²Ususeni be otonike hatteni nuuse modhe odo otiko e yese. Ohuttuwaye baaka ye be siido kato aadexona u etto baa gisha uso mardo baasso.

³Aadesese nunimay ye kaxe ekkuso godowa gelako nu gele. Wontoni be gara onta beysaasiti gisha << <Ta inge kaxe ekkuso godowaka fetto geluttuwasso> hidiko ta huulana ta caadho>> yeydiko e hido. <<Ta huulana ta caadho>> yeydi zeerdakoni ha sahay meddhuttosafa ayti uddi abakoy meddhutti aalli ye kaxe ekkuso godoni naquttesesako e maaqicha.

⁴Ye esini laappunxo wonta gisha bidzi godowa zeerisine <<Laappunxo wonte Wontoy be hanto hantaafa uddiko kaxe e etto>> yeydiko e hidese.

⁵Yeydiwo ye godowa assi <<Kaxe ekkuso godowa geluttuwasso>> yeydiko e otese.

⁶Ye modhe odo acha siidaasiti woosutte u dheeddo gisha Wontoy ususe indecho kaxe ekkuso godowa gelutto baasso. Yeydi e maaddhakoni ye kaxe ekkuso godowa <<Geluttuwaye!>> yeydi e hido bidzi bidziti yesako u yese.

⁷Ye esini laga beritume e geede Dawitey be badena ha esume womfa ohisine <<Hanzo Wontoy zeerusune siisine Wonto gara onta beysofita!>> yeydi ta otonike Wontoy assi <<Hanzo yeydi hiyutta wontay hay hanzoko!>> hidi hissineko e oto.

⁸Yaasoy uso kaxe u ekke godo aandesesa maaddhako ye e geede Wontoy fede kaxe ekkuso wonta gisha zeeruwadiko e yecha.

⁹Ye e gisha Wonto axiti essaa kaxe ekke godoy sanbata wonte kaxe ekkusoosi bishay yessako e yese.

¹⁰Ye esini Wontoy hantaafa kaxe ettonike yeydiwo Wontoy inge kaxe ekkuso godowa geleesiti be hantaafako kaxe u ekke.

¹¹Yoonase ye usiti woosutte inxhadhonike woosutte inxhadhi nuukaafa ooneni unguwannike Wontoy inge kaxe ekkuso godowa gelese orjena nu oseyyeese.

¹²Wonto katoy en'aara hantesaarako. Lam'i bade nuuna keenge satatame gardese nuunaxuko. Satatay xhabhowara abbiyara bursi wol garafa shahenike Wonto katoy axi be axeto giddaa keengesa uddi base shati eresako. Muxhuro giddaa aachutti yese maxowara col'aara modhussi arsi beedi yaa'esako.

¹³Wonto buro aachuttesesi e meddhosaafa bidzini baasso. E aafe buro uddi abakoy addeydiyara gundusiyara maaddhiko e bente. Nuni nu gisha nu oycutte oychushe e utta nu mahesi e buroko.

¹⁴Yoonase Wonto da'aa afaaka kessi angusse maaddhi yese kahinituse afana ade nu keenge gisha nu aadexo minsi nu aykkoose. Esini Wonto yele maaqe Yesuusako.

¹⁵Ye esini nini keenge kahinituse afana adey gafaxe ni maaqeniyaka niise aadewo higilese danda'esako. Esi uddi basuna hade niinkeydiko naa'utti e beyutto. Naa'utti beyuttakoni bidzoni cubbo hanto baasso.

¹⁶Ha e gisha axuse modhe maxo keenge kaatiya yese Wonto buro naassi nu uqqeese. Yeysi nu mato geedeko Wontoy numba e maare. Axuse be keenge maxo modhetiyafa densi nuuse maro e worguseniyaka numba marako e mare.