Read koorete Ibraxituse 6 Bible Online

Ibraxituse 6 - koorete bible

Ibraxituse 6

¹Yoonase Kristosa gisha erusutta acha erunxe yaha gaddi nu buro gara handi uuxhesesa nu maaqqeese! Haybowa aange cubbo hanta gishaara Wonto aadexe gishaara, yeydiwo xhinqate gisha, be kuche Wonto sunxuna axi gara gade gisha, haybo denxo gishaara koolo makkinase yaa'utte yaa'a gishaara sekke mati erusisine kaachuttese kaacho sekke mati kaache nu dheebbeese!

³Ye esukofa Wonto maxo e maaqo'ayketese nu buro gara nu hammeese.

⁴Buro Wontoy inge fo'e beedi afaafa ingutta ingo etti Ayaana Geeshi shahaxe maaddhi Wonto katoy modhe maaqesaara yoone sahase e osaara oddhena erdi yechine Wonto ogiyafa dhaddi kessa gerita hanke waansi mahese e danda'utte?

⁶Ye e geede e ogiyafa dhaddi u kessako be cubbo dhaddi hanke Wontoko u maaqoronike uso mahese danda'uttuwasso. Ye esini usi Wonto yeleko sekke u suxhe, axini esa haassoronikeko u mahe.

⁷Laga woggaa be gara bukke ira ushe sahay abako be gara totta axuse go'e kaxa e inge gisha Wontoy ye saha suuzoko e suuze.

⁸Maaquwaye baaka ankiyara moggoriyara mu'use sahay go'uwasako e maaqe, aacuttese uddhiko e yese, e aallicirani tamana meggutteko.

⁹Nu eehe nu badito! Yeydi zeeresa nu maaddhakoni hinuni hi loolowafa bente gardese suuse hi degexenike eezuwanxhiko.

¹⁰Wontoy gizo yaa'esako. Hi hantaara buroni maaqqe hatteni haylaxita marena e sunxi gisha hi beyso eehaara botuwasso.

¹¹Hi bidzi bidzina gobbisine hi kakke abako hi kuchena aykese hatte hi oseydesenike aallicira aallo hi oseyorosako nu worge.

¹²Ye esini aadexonaara danda'onaara miindi bemba Wontoy gobbusecho gobbo etta axita hi bishoronike baaka belxhaxe hi maaqoronike worguwanxhiko.

¹³Wontoy Abrahaame be gobbusso wogga ye e gobbusso gobboy aade maaqenike addusese esuna e caaqe beeme gardese feday baa gisha be sunxunako e caadho.

¹⁴Esini <<Aadewo nemba suuzoko ta suuze, ne shaworonikeko nemba ta mahe>> yeydi caadhi e hido.

¹⁵Abrahaameni dandadhi katti Wontoy bemba gobbusechosha e degesso.

¹⁶Axiti esuna e caaqesi beeme garesunako. Esume e caaqutto zeerey ye caaqona e miinge gisha u giddaaka dendecha bersay uddi ye esunako e atte.

¹⁷Wontoy ye ogenako be gobbusese gobbo ekkeesituse <<Maaqoko e maaqe!>> hidi be hidosa be arxuwannike addussi beysese wordi ye gobboy aade maaqenike caadhi e oto.

¹⁸Wontoy artuwasa maaqe esuna be zaadduwa lam'i abako nuuse e indo. Ye usiti gobbowara caaqowarako. Ye ogena nu lubbo maarese esuko badhese nuni numba e gobbusese gobbo nu aykoronike keddaydese miimete nu degexorosa matiko e yese.

¹⁹Numba e gobbusese gobboy nu lubbose hade sekke hanke en'uwa hooddusuwa malahiqeke[1] yesesako. Ye gobboni Wonto Hayla Zawa gidda hade gilbake fasshicha maa'o geedena garsiko Wontowara nuu e muhuse.

²⁰Ye godoni Yesuusay nuume burona nu gisha essaa gellecho godoko. Malka Xhaadiqe kahinunteke Yesuusay koolo makki aallose kahinituse afana ade maaddhiko yaha e gello.