Read koorete Ibraxituse 7 Bible Online

Ibraxituse 7 - koorete bible

Ibraxituse 7

¹Malka Xhaadiqey Saaleme katama kaataara uddime afana maaddhese Wontose e kahiniyarako e maaqicha. Abrahaamey kaataxhe dardi iisshi yoosune esaara muti e suuzzo.

²Abrahaameni didhi be oochoshitaafa uddi tanxo tanxo esuse e indo. E sunxi birchey buronasi <<Gizetena kaatiya yese kaate>> yeydi hiyoko. Feday assi <<Saaleme Kaate>> yeydi hiyoy <<Modhetey esuna yoone kaate>> yeydi hiyoko.

³Malka Xhaadiqese esadey esindoy yeydiwo ye usita yella geriti oone maaqesi eruttuwasso. E yelutto beray e yeso aalliciray baasso. Ye Malka Xhaadiqey Wonto yelese bisha maaddhi koolo makkina kahine maaddhiko e yese.

⁴Ye axi waydi keddaydese axe e maaqenike beewayte! Fetto numba yella orje maaqe Abrahaamey didhi be oocho abakittafa tanxo tanxoko esuse e indo.

⁵Lewe nayshaafa kahine hanta gara gadutteseesiti be axiti garafa tanxo tanxo u eforonike Muse wogay uso woossiko e yecha. Hinne ye tanxo tanxo u garafa u ekkesi usuke Abrahaame nayshe maaqe beyndo na'axhiti garafako.

⁶Abani Malka Xhaadiqey yeluttena usukaafa maaqe dheeddakoni Abrahaame garafa tanxoko e etto. Wontoy esa gobbusecho Abrahaameko e suuzzo.

⁷Suuzutteesume suuzesi garenike ye e gara bersesi baasso.

⁸Bidzi badena tanxo ekke Lewaxiti hade axuke hay'e axitako. Fede badena esuse e zeerutte tanxo ekke Malka Xhaadiqey koolo makki aallo en'a yesesako.

⁹Fetto tanxo ekke Lewey beese Abrahaame badena tanxo indiko e yese yeydi hiyese danda'uttoko e danda'utte.

¹⁰Ye esini Abrahaamey Malka Xhaadiqiyara muto woggaaka Lewey yelutto badiko be ma'o Abrahaame bohiyaka e yecha.

¹¹Isra'eelaxiti woga u degessosi Lewe kahinunte badenako. Ye kahinunte badena axi facete keenguwasa maaddhako Aarone kahinunteke yesesa e maaddho baane hade Malka Xhaadiqe kahinunteke yese fede kahine yoowe worgusuwadiko e yecha.

¹²Ye esini kahinunte bishay feda maaddho geede e wogani esaara wolko arteko e worguse.

¹³Haanxhi uddi e gisha zeerutte kahine maaddha nu Laaxi fede ommaafako. Ye ommaafa ooneni kaasha godowa uddhi Wontose kaasha uqussay bidzini baasso.

¹⁴Nu Laaxi Yuuda ommaafa e bentonike addako. Musey kahiniti gisha densi zeerisine Yuuda omma gisha densi e zeerdosi bidzini baasso.

¹⁵Ha ta otosi gardese ogena addaa e maaqesi hade Malka Xhaadiqeke yese fede kahiney yoone woggaako.

¹⁶Esini kahine e maaddhosi bayese danda'uwa yeso inge osana baaka hade wogana e gaduttesenike Lewe ommaafa maaquwasso.

¹⁷Ha e gisha fissharoy atteysine <<Neni hade Malka Xhaadiqe kahinunteke yese koolo makkina yese kahineko>> yeydiko e hido.

¹⁸Acha wogay bohe keenguwasaara go'uwasaara be maaqe gisha ooxuttiko e yese.

¹⁹Aadewo Muse wogay ooneni facete keenguwasa mato baasso. Hattema e badena Wontoko nu uqe gardese gobbo e gara nu gadesi nu gisha bentiko e yese.

²⁰Assi ha zeere Wontoy caaqonako e adduso. Fediti kahine maaqusune Wontoy caadhi kahine mato baasso.

²¹Yesuusama kahine e matosi caadhiko. Ye esini Wontoy << <Neni koolo makkina kahineko> yeydi hissine caadhiko e yese. Be maxo arxuwasso>> yeydiko esuse e hidese.

²²Ye caadhi e oto zeerena Yesuusay buro caaqome gardese modhe caaqose bemba ade mati e uqusso.

²³Bidzi kahiney be hay'icho gisha arto badi yesine hanta gara koolo makkina yesese danda'uwadiko e yecha. Ye e gisha buro yecha kahiniti taafoy lagako u maaqicha.

²⁴Yesuusamay koolo makkina e yese gisha e kahinuntey artuwasso.

²⁵Ye e gisha koolo makkina en'a maaddhi uddi woggaaka nuumeysine Wonto be shi'e gisha be badena Wontoko yooneesita uddi facete keenguwasa loolusesuko e danda'e.

²⁶Yoonase nuuse bishe kahinituse afana adey Yesuusako. Esini hayla, haasse keenguwasa, geejheshesha, cubbachiti garafa shahuttesesa, afame keddaydese kuxay esuse inguttesesako.

²⁷Esini sekke be lakkuwannike bidziyawo bemba kaasha mati uqussi be alsese gisha hade fede kahinituse afana adituke burona be cubbo gisha sekkeni axiti cubbo gisha uddi wonte kaasha Wontose uquse esa worgusuwasso.

²⁸Muse wogana kahinituse afana ade mati maagexuttasi gafaxe maaqe axitako. Wogay inguttoosume e geede ingutta caaqona maagexuttasimay koolo makki aallo facete keenguwa Wonto yeleko.