Read koorete Ibraxituse 8 Bible Online

Ibraxituse 8 - koorete bible

Ibraxituse 8

¹Yoonase afaaka kuxuttese kaate maaqe Wonto oshichi badena uttese kahinituse afana adeko nu keenge. Nu zeere zeeriyafa bidzoydi hiyuttesi ha esako.

²Esini essaaka kahine hanta hantiyaka e yesesi aadena maa'o zawa maaqe Wonto Hayla Zawaako. Ye maa'o zaway e eedhosi axi kuchena e maaddho baanne Wontonako.

³Kahinituse afana aditi be bidzi bidzina u maagetosi inguwara kaashaara Wontose uqusesuko. Ye e gisha nu keenge kahinituse afana adeni uqusese danda'e bidzi abakoy yeseko e worguse.

⁴Wogay otonike Wontose ingo uquse kahiniti yese gisha Yesuusay ha sahaaka yessako kahine maaquwadiko e yecha.

⁵Usi essaaka hantesi afaaka yese abakita bisheshaara beysesaarako. Ha esini yeydi e maaddhosi Musey maa'o zawa keexhese hissune Wontoy <<Bakka gara neese ta addussonike uddi abako gaxuna hantuwa!>> yeydiko e woossecha.

⁶Yesuusay Wontoseni axuseni giddaaka buro gobbome gare gobbo gara essese caaqoy buro caaqome e garenike hatte e hante hantay u hanticho hantame garoko e gare.

⁷Buro caaqoy aban facete keenguwasa maaddhako lakkunxo caaqoy worguttuwadiko e yecha.

⁸Ye esini Wontoy axi gara facete degessi zeerisine <<Isra'eelaxitaarani maaqqe Yuuda axitaara wolko kille caaqo ta caaqe woggako yoonesa, yeydiko ta hine Laaxe maaqe tani Wontoy.

⁹Ha usaara ta caaqe kille caaqoni usadiyaxhe Gibxhe wudiyafa kessese u kuche ta ayto wogga usaara ta caadho caaqo bisha maaquwasso. Ye esini be caadhecho caaqoke yese u dheeddine uso yaha beedi ta dhaddo, yeydiko ta hine Laaxe maaqe tani Wontoy.

¹⁰Yoonase ye geede Isra'eelaxitaara wolkoko ta caaqe yeydiko tayne Laaxe maaqe tani Wontoy. Tani ta wogako u sorgiya ta gade, u muxhurowa ta diize, u Wontoni ta maaqe, usini ta axita u maaqe. Ha esako usaara ta caaqe kille caaqoy.

¹¹Ha e geede sekke oddhiyafa ayti orje aallo uddi tamba u ere gisha ooneni be wude axeni maaqqe beyndo na'e <Laaxe eruwa!> hidi hissine eruse worgusuwasso.

¹²U miidhechoshani <Attuwaye> hidiko ta hine, u cubboni ha e geede sekke fetto maxuwasso>> yeydiko e hido.

¹³Yoonase <<Kille caaqo>> hidi hiyena buro caaqoy cindi hantuwannike matiko e yese. Hanti cindi dooddesesi e baane woggay uddhiko e yese.