Read koorete Ibraxituse 9 Bible Online

Ibraxituse 9 - koorete bible

Ibraxituse 9

¹Buro caaqoy Wonto kuxuso wogitaara ha saha gara Wontoy essaa kuxuttichoshaarako e keengicha.

²Ye esini Wontowara essaaka muhusso maa'o zawako e maaqicha. Ye maa'o zawa gawwaaka burona yese godowa faqey e gara gadutte miijhe, xharabheeza, Wonto buro gadutte boora yeydiko e yese. Ye godoy hayla godoko e sungicha.

³Lakkunxo godoy hade gilbake fasshicha maa'o geede yese godoy <<Haylame e Hayla>> yeydi hisso godoko e maaqicha.

⁴Ye e giddaaka worqena naquttese e gara ixhaane cuwwushushoshaara e wudenani e zawaanani worqe e gara maysi naddhesso saaxhine bishe caaqo taabootiyaray u yecha. Ye caaqo taaboote giddaa manna hidi hiyutte kaxay essaaka yese worqiyafa hantutte kere bishay, cultese Aarone kalloy, naqutti tammi woossoy e gara diizutti yese lam'i shuchi u yecha.

⁵Taabootese tuchi gara axi cubboy essa ucutti ooxutte godoy e yecha. Kirubele sunge afaase woosaxiti bishana naquttesesi ye godo be fangena u fasshicha. Yeydi e yessakoni haanxho uddi e bidzi bidzina hatte zeerese danda'uwanxhiko.

⁶Uddi abakoy ye esukeydi naquttosi geede kahiniti hanta hantese maa'ona keexhuttese zawaaka burona yese godowa uddi wonteko u gelicha.

⁷Lakkunxo godowaka gelesimay kahinituse afana adewoko. E gelesini beraafa bidzi wontewoko. Esini be cubbosaara uddi axiti erdo badi yesine hanto cubbosaara be uquse suuxe etto badi yaha geluwadiko e yecha.

⁸Buro yecha maa'o zawaara e wogaaray yena yese aallo Haylame e Hayla maaqe godowa gelse ogey axituse do'utto badi e yesenikeko Ayaana Geeshi e addussicha.

⁹Ye esini ha woggaaka yesesa beysesako e maaqicha. Ye e bishana Wontose uqe ingowara kaashaaray ye esuse uquse axuse <<Iitako ne hanto>> yeydi maxe e muxhuro geesheshe danda'uwasso.

¹⁰Haanxhi uddi esuna aquso kille wogay yoone aallo hantutta wudena bente wogitako. Ye usini miyo gishaara usshi gishaara yeydiwo shoti geeshe gisha maaqe wogitawoko.

¹¹Kristosay hatte yese orjena modhe maaqe kille abakituse kahinituse afana ade maaddhi nuuse yoodiko e yese. Esini axi be kuchena keexxho baa meddhowara wolko bidzo maaquwa keddaydese mallaara facete keenguwasaara maaqe hayla zawaaka gelliko e yese.

¹²E gellosini degele suuxaara maydaxhe suuxaara etti maaquwasso. Axi koolo makkina wozuttoronike mata beese be suuxuko etti Haylame e Hayla godowaka sekke be lakkuwannike bidziyawo e gello.

¹³Tuneydese axe wudena u garay hayla maaqoronike shakkusso degele suuxaara maydaxhe suuxaaray yeydiwo kaashashe uzze meddi e muqo axi gara budusoosaaray axe haylonxesa e maaddho geede

¹⁴Kristosa suuxi waanidini gardese ogena numba e geeshuwaane? Koolo makkina yese Ayaana Geeshi badena bemba dhoha keenguwa kaasha matiko Wontose e uqusso. En'a maaqe Wontose nu hantoronike nu muxhurowa yese haybowa aange hantaafani e suuxi numba geeshako e geeshe.

¹⁵Wontoy xheydeseesituse <<Ingako ta inge>> hidi e gobbusese koolo makkinase maaqe tago u eforonike Wontoseni axuseni feeqaa hantisine ha kille caaqoy ee'oronike e mato. Yeysi e matosi buro caaqona be durkutticho woggaaka u hanto cubbowafa shawo kessese hay'enako.

¹⁶Bazutta bazoy hanta gara feysheshi ye bazza axi haydho geede e maaqe gisha bazoy yesso geede ye bazza axi haydhesenike modhussi ereko e worguse. Bazza axi en'a yesunema ye e bazzo bazoy hanta gara feyshuwassho.

¹⁸Ye e gisha aadewo buro caaqoy suuxi gutto baassa hanta gara feyshuwadiko e yecha.

¹⁹Musey uddi Isra'eelaxituse wogay otosa uddi be oto geede maydaxhe suuxaara degele suuxaara etti waaxaara wol gara gussi dori ufussaafa hantuttese maddaara hisoophe sungesaara etti esuna woga fissharo garaara uddi axiti garaara e shakkicha.

²⁰Esini u gara shakkisine <<Wontoy hi kaforonike hinuse otese caaqoy esuna miinge suuxi ha esako>> hidiko e hicha.

²¹Yeydiwo Wontowara essaaka muhusso maa'o zawa garaara e giddaa esuna hantuso uddi miijhiti garaara suuxe e shakkicha.

²²Wontoy suuxi gutto baasa axi cubbo ucci e ooxuwa gisha aadewo oddhe abakowo baaka uddi abakoy suuxuna e hayloomoronikeko wogay e ohe.

²³Yoonase afaase maaqe abakituse bishushe maaddheseesiti ha e bisha kaashituna u geejhoronike orjena worguse basuko e maaqicha. Afaase maaqe basitimay ha esume gardese kaashanako u geejhe.

²⁴Kristosay aadena hayla maaddhesesuse bisha maaddhese axi be kuchena keexhese Haylame e Hayla godowa gello baasso. Esimay gellosi beese wona afaakako. Yaha nu gishako Wonto buro e bente.

²⁵Ayhuda kahinituse afana adey be suuxe maaquwa keemo suuxe ettiko berana berana Haylame e Hayla godowa e gelicha. Kristosamay laga wogga bemba kaasha mati uqusese gello baasso.

²⁶Yeydi e maaddhakoma ha sahay meddhuttowafa ayti laga woggaa maddhaa geleko esa e worgusaane. Hattema cubbo ooxese bemba kaasha mati sekke be lakkunwanike beriti itese hissune yoodi bemba addussiko e yese.

²⁷Axeydosi be qinose bidzowo hay'orosa matiko e yese, ye e geedeni yaa'esi buro uqako e uqe.

²⁸Yeydiwo Kristosay lagaade cubbo ooxese bidzi woggawo kaashuttiko e yese. Lakko woggani be yooneniyaka biya kafiya yeseesita maarese baaka cubbo gisha sekke hay'ese maaquwasso.