Read koorete Yayqoobey 2 Bible Online

Yayqoobey 2 - koorete bible

Yayqoobey 2

¹Nuundo nayshito! Keddaydese kuxa fuula keenge nu Laaxi Yesuusi Kristosa aadexeesita maaqisine axi aafusha beedi hantofita.

²Ye esini lam'i axi hi Bhikkilo Zawaa u yoodako bidzi worqe qubhe be gil'a gaddesesaara e woomay keddaydese maa'o maadhesesaara maaddhako lakkoy maa'o iita maadhese jhi'o axe e maaddhako

³modhe maa'o maadhi waardese axe modhussi beedi <<Neni ha modhe godowa uttuwa!>> yeydiko hiine. Assi jhi'ose <<Nenimay sena seya ee'uwa. Oo'oyne sahaa uttuwa!>> hidiko hiine.

⁴Hinne yeydi hi hantako hi giddaaka axi aafusha beedi hi matosa maaquwaye? Yeydiwo hade iita yaa'axuke iita hi maxowafa hi hantesa maaquwaye?

⁵Eehuttese nuundo nayshito! Siwwayte! Wontoy ha saha gara yese jhi'ita aadexoy ususe wodunte maaqenikiyara biya eeheesita be gobbusese kaateto u dhaaloronikiyarako uso e xhardese.

⁶Hinunimay jhi'itako hi eerso. Wodumita maaquwaye hinumba maddhunxeesitaara hi worguwasa yaa'a godowa hinumba aangeesitaaray?

⁷Esuna hi xheygutticho kuxuttese sunxe casheeshiti usita maaquwaye?

⁸<<Fede axe niya ne eehenikeysi eehuwa>> yeydi Hayla Fissharowa diizuttese kuxuttese woga aadewo kattako modheko hi hanto yeydi hiyoko.

⁹Axi aafusha beedi hi hanta'aykoma cubboko hi hanto yeydi hiyoko. Cubbo hi hantoyna <<Wonto wogako u bayso>> hidiko hi hiyutte.

¹⁰Axi Wonto wogaafa bidzowo kafey esa iicha attasita uddi kafa e hidako e uddina e katto baannikeko e maaqe.

¹¹Ye esini <<Laggettofuna>> yeydi hida Wontoko beesewo <<Woddhofuna>> yeydi hidesa. Yoonase laggete dheeddakoni ne woddho geede wogako ne baysese.

¹²Zeerisineni maaqqe hantisineni axe shawo kesse wogana hi yaa'uttenike massi yesuwayte.

¹³Ye esini Wontoy axuse maaro mahuwa axi gara maaro keenguwa yaa'ako e yaa'e. Maaroy yaa'ase afana maaddhiko e iiche.

¹⁴Nuundo nayshito! <<Aadexiyako ta yese>> yeydi hissine ye be aadexo hantana beysuwa axi e aadexoy esa go'ese danda'uwasso. Hinne aadexiyaka e yese aadexoy esa maarese danda'aa e danda'e?

¹⁵Neyndo na'axhiti neyndo bunayciti haliya gundusesa u maaddhakowara be muunesa u dheeddakowara

¹⁶hi giddaafa bidzi axi <<Modhena sawona hanguwayte! Toyyay hinumba toydofe, muudi mishuwayte!>> yeydi hitta ususe worguse abako inge dheeba e hidako ye axi am uso e godho?

¹⁷Ye esuke axi be aadexo hantana beysuwasa e maaddhako hanta garafa shahutti yese ye e aadexoy haydhesesako.

¹⁸Bidzi axi zeerisine <<Bidzi bidzi axi aadexoko e keenge, fedeesiti assi modhe hantako u hante>> yeydi hidako tani hinesi <<Hanta keenguwa ne aadexo taa beysuwa! Tanimay hantanako ta aadexo nemba ta beyse>> hidiko ta hine.

¹⁹Neni <<Bidzi Wontoko yesa>> hidiko ne aadexe. Ye esi modheko. Xhoozitini ye esa aadexako u aadexe, jhasshini koburako u kobure.

²⁰Doo neno muya! Hantakofa shahutti yese aadexoy go'uwasa e maaqenike ato worguwa ne worge?

²¹Niise ade maaqe Abrahaamey be yele Yissaaqe kaasha e gara gaddi kaashusho godowa be uqusso wogga be hantana gizo maaddho badiya e yecha?

²²Ye esunako e aadexoy modhe e hanto hantaara wolko e handosa erese hi danda'e. Abrahaamey hanto hantana e aadexoy abani facete keenguwasa maaddhiko e bento.

²³Ye esunani Hayla Fissharowa <<Abrahaamey Wonto e aadesso. Wontoy e aadexo gizo mati e beedo>> yeydi hiyuttechashi e aallo. Abrahaameni <<Wontoy eehe axuko>> hidi e hiyutto.

²⁴Hinne yeydi e maaddho geede axi gizo maaddhi bentesi aadexonawo maaddho badi e yesune hantaaraysiwo kossi e maaqenike beewayte.

²⁵Yeydiwo zaakoyndo maaqicha Raabey Isra'eeley woossecho axita be zawaaka motti fede ogena uso be anso woggaa be hantana maaquwaye i gizzossi?

²⁶Kaxi e garafa kesso axi haydhesesa maaqenike yeydiwo hanta keenguwa aadexoy beese haydhesesako.