Read koorete Yayqoobey 4 Bible Online

Yayqoobey 4 - koorete bible

Yayqoobey 4

¹Hi giddaaka tooraara birriyaray ayafani e yoone? Ye esini hi muxhurowa darguttiya yese acho maxona iita hi col'e col'aafa dendasuna maaquwaye?

²Hi worge abako degexey hinumba e iissho geedeko axe hi wodhe. Keddaysi col'i degexe hi dheeddoyna hi birruse, toora hi denxe. Wonto hi shi'uwa gisha hi worge abako degexese danda'uwaytako.

³Wonto shidhakoni ye hi shidhi degexe abako hi acho maxo gara feyssheshe iita col'ana hi shi'e gisha hi shi'esa degexuwaytako.

⁴Hinuno Wonto dhaddi fede wontoko handeseesito[3]! Ha saha eetasi Wonto iilaxe maaqesa eruwaytuwa? Aadewoko ha saha eehe worgesi uddi Wontose iilaxuko e maaqe.

⁵Hayla Fissharowa ohisine <<Wontoy nuuka gaddese ayaanay esusewo nu maaqoronikeko keddaysi iitanawo e worge>> yeydi e hidosi mikkewa hinumba e bishe?

⁶Yeydi e maaddhakoni fissharowa ohisine <<Be qino nashe axe Wontoy iiloko e iile, bemba ullayseesitama be keenge maxo modhetiyafa dendasuna uso modhe aafenako e beene>> yeydi e hine gisha Wontoy axuse keenge modhete maxoy kossi kossiko e hange.

⁷Ye e gisha Wonto afana mati esuse woosuttuwayte! Humbayesema inxha'uwayte, hinukofa dhaddiko e ba'e.

⁸Wontoko uquwayte, Wontoni hinuko uqako uqe. Hinuno cubbachito, hi kuche geeshuwayte! Hinuno lam'i maxona sekke hanke hineesito, hi muxhurowafa iita base ooxuwayte!

⁹Hi gawwaanna iitana higiluwayte, duuzuwayte, yeekuwayte! Hi miiche duuziyaka hi maggani keddaydese higilsaaka arxuwayte!

¹⁰Laaxi buro yekke hinumba ullaysuwayte! Esini wokke hinumba kedda keddako e hise.

¹¹Nuundo nayshito! Sekke hanke wola guncofita. Axe gunceeshiti oo'oyne axi gara yaa'eesiti wogako u gunce, woga garako u yaa'e. Woga gara ne yaa'a'ayketese yaa'axe ne sungesa baaka woga kattase maaquwannako.

¹²Woga gaddasaara yaa'esaaray Wontowoko. Maareseni bayseseni danda'esi esawoko. Hinne fede axi gara yaa'e neni esi oonena?

¹³Hatteni siwwayte! <<Hanzoko oo'oyne gutako fede wude handi yaha bidzi bera nu dece, bidzi bidzi abako wooma zal'a hissineko birre nu laguse>> yeydi hineesito!

¹⁴Fetto guta maaqe abako eruwaytako. Esi hinuni abana? Bidziya bento yenniya baatta hine hade sahaafa kese suuleke yesesa maaquwaytuwa?

¹⁵Yeydi hiyekofa hiye hinumba e worgusesi <<Laaxi maxo modhe e maaqo'aykowara nu yesa'aykowara ha esa maakoni se'esa maakoni nu hante>> yeydi hiyeko hinumba e worguse.

¹⁶Hinunimay yeydi hiyasheesha dhaddiko <<Tanko yesa>> yeydi hi nashutte. Yeydi nashuttey be uddina iitako.

¹⁷Yoonase ye modhe maaqe abako hante e worgusesa erisine hante dheebey cubboko e maaqe.