Read koorete Yayqoobey 5 Bible Online

Yayqoobey 5 - koorete bible

Yayqoobey 5

¹Hinuno wodumito, hatteni siwwayte! Hi gara yoone keddaydese iita maddhase <<Uu! Uu! Uu!>> hidi uwwayte, yeekuwayte!

²Hi woduntey buuddhiko baadese, hi maa'oni qooqannay[4] muudesesako.

³Hi worqeni hi birreni wuttesesako e maaddhese. Ye wuheko hi gara ato maaqesa, hinumbani hade tamakeko e muune. Aallicira woggase go'uwa wodunte bhikkilliko hi yese.

⁴Siwwayte! Hi gatiya hantaasituse ye hi hantuso u gafa wooma shame hi dheeddineko u uwwe. Kaxa bhikkileesiti uwwani osa keenge Wontoy siidiko e yese.

⁵Saha gara okketti hinumbawo maggusese hi wordosa uddi degessi hade shufese dhiitto maydoke hinumba mallusiko hi yese.

⁶Gizo axi gara yaadhiko hi yese, esani woddhiko hi yese. Esini be gara mahese hi wordo base tucco baasso.

⁷Yebo nuundo nayshito! Laaxi yoone aallo danda'uwayte. Wootana aqeesiti bonoy itto geede yoone iraafa ayti gabba iray yoone makko danda'isine sahay modhe kaxa aafe kassi inge aalloko u kakke.

⁸Hinuni yeydiwo danda'uwayte. Laaxi yoowey uddhi yese gisha hi muxhuro minxuwayte!

⁹Nuundo nayshito! Hi gara e yaa'utteesume wol gara umbu umbu hidofita! Beewayte, yaa'esi yoone woggay yoodi elliko e yese.

¹⁰Nuundo nayshito! Laaxi sunxuna ohicha kaayaxiti be gara yooda maddha dandadhi garsosa beewayte.

¹¹Eewa! Dandadhiwo miindasiti suuzuttesesako hidiko nu hine. Yoobey waydi dandadhonike siidiko hi yese. Wontoni geede esuse hanto modhe base erako hi ere. Wontoy keddaysi axuse higilesaara maaresaarako.

¹²Nuundo nayshito! Uddime buro hinuse ohese ta worgesi <<Wo afa maaqqe! Ha saha maaqqe!>> hidi oo'oyne fede abakitunani caadhofita. Hi zeerey aade maaqo'ayko <<Aadeko>> hidi hiwayte! Yeydiwo zaade e maaqo'ayko <<Zaadeko>> hidi hiwayte. Yeydi maaqe e dheeba'ayko hi gara yaa'uttoko e yaa'utte.

¹³Hi giddaafa ooneni maddhay e gara ellosi yesa'ayko Wonto shi'uwaye. Maggiya yesesini yesa'ayko zingalena Wonto galatuwaye.

¹⁴Hi giddaaka hargiya yesesi ooneni yesa'ayko Wonto zawa cimita beeko xheyguwaye. Usini Laaxi sunxuna ye hargaxe zaytena tisshi e gisha Wonto shi'uwaye.

¹⁵<<Wontoy loolusako looluse>> hidi aadexisine shi'ey hargaxe loolusako e looluse. Laaxini esa hargiyafa denxako e denxe. Cubbo hanti e yessoni e cubboy <<Attuwaye>> hidiko e hiyutte.

¹⁶Ha e gisha hi keenge cubbita wol buro bazzuwayte. Hargiyafa hi looloronikeni woluse shi'uwayte. Gizo axi shi'ey osako e keenge, orje abakoko e hante.

¹⁷Elaasey nuunkeydese axuko e maaqicha. Iray ha saha gara bukkuwannike Wonto minsi e shidhine iray haydzi beraara badiyara ha saha gara bukke e dheeddo.

¹⁸Sekkeni e bukkoronike e shidhine afaafani iray buttine sahani sekke kaxa kasso.

¹⁹Nuundo nayshito! Hi giddaafa bidzi axi aade ogiyafa dhaddi kessako feday hanke aade oge gara maho'ayko

²⁰cubbachi halli hangicho ogiyafa hanke matasi haybowafa be maardonikiyara laga cubbowafani maaro be degexusonikiyara eruwaye.