Read koorete 1Phexhrosey 1 Bible Online

1Phexhrosey 1 - koorete bible

1Phexhrosey 1

¹Yesuusi Kristosana anxuttase maaqe Phexhrosekofa. Goodutti Phanxhosiya, Galatiya, Qaphadoqiya, Isiya, Biituniya seya haya budutti yese Wontoy xhardaseesituse ta anxe woosso.

²Ade maaqe Wontoy hinumba e xhardosi burowo <<Yeydi maaquwaye>> hidi be hidechonikeko. Ayaana Geeshuna haylaxitako hinumba e mato. Yeysi e matosi Yesuusi Kristosase hi woosuttoronikiyara e suuxuna hi geejhoronikiyarako. Wontoy axuse keenge modhe maxowara modhetiyaray hinuse laguwaye.

³Nu Laaxi Yesuusi Kristosaade maaqe Wontoy galatuttuwaye. Keddaydese be maarowafa dendasuna sekke yelutti kille axe nu maaqoronikeko numba e mato. Sekke yeluttenani Yesuusi Kristosay haybowafa dendo gisha bayese danda'uwa gobboko nu keenge.

⁴Yeydiwo afaaka nuuse gaduttese bayeseni iiteseni cimeseni danda'uwa e inge tago nu eforonike e mato.

⁵Wontoy esa hi aadexe gisha loolo hi degexoro aalloko be osana hinumba e kakke. Ye looloni aallicira wonteko uddiyadese e addeyne.

⁶Hatte be bishana bishana yese naa'oy hi gara yoodosuna oddhe woggase hi higillakoni ye hi degexe looloy yese gisha magguwayte.

⁷Ha naa'oy hi gara e yoodosi hi aadexoy aade maaqenike beyesuko. Baane worqey fetto modhiyara iitaara e maaqenike tamaa gelliko e erutte. Ye esuke worqemeni gardese kuxuttese hi aadexoy naa'utti beyutteko esa e worguse. Ye naa'utti beyuttese hi aadexoy Yesuusi Kristosay yoone woggaaka galatani fuulani kuxaniko hinuse e inge.

⁸Yesuusi Kristosa beedo badiko hi eehe. Hatteni esa beye dheeddakoni aadessiko axi zeerdi kessuwa keddaydese maggana hi magge.

⁹Ye esini hi lubbose haybowafa maaro hi degexe gishako. Ye maaroni esume hissine hi aadesechoshako.

¹⁰Wontoy axuse be keenge maxo modhetiyafa densi hinumba e maarenike burussiko kaayaxiti kaayo u zeerdecha. Ye maaro gishani hossi kessi arsi u beecha.

¹¹Usukaaka yecha Kristosa Ayaanay Kristosa elle maddha gishaara ye e geede e degexe kuxa gishaara ye usiti maaqeesume buro ohiyako e yecha. Ye esani uddi an woggaakaara aba bishanaara e maaqesako erese hossi kessi worgiya u yecha.

¹²Ye kaayaxiti u zeerdechoshi beese e maaddho baane hinuse e maaqenikeko ususe Wontoy addusecha. U zeerdechoshini afaafa anxutta Ayaana Geeshi osana modhe odo odusaasiti badena hinuse hatte ohuttiko e yese. Ye esa afaase woosaxitini aba e maaqenike erese col'iyako u yese.

¹³Ha e gisha hi muxhuro hanta gara mati naquttuwayte, qaaxhe gare baaka yesuwayte. Yesuusi Kristosay yoone wonte Wontoy axuse be keenge maxo modhetiyafa dendasuna hinuse mahesa bidzi muxhurona gobbuwayte.

¹⁴Wontose woosutteesita maaqichine erdo badi yesine buro iita col'i hi hantichonike hatteni ye buroke maaddhofita.

¹⁵Ye esukofa hinumba xheyda Wontoy hayla maaqenike yesiya hi yese yesona uddi hinunini hayla maaquwayte.

¹⁶Ye esini <<Tani hayla maaqe gisha hinunini hayla maaquwayte>> yeydi e diizuttese gishako.

¹⁷Axi aafusha beedo badesine oone garani e hanto hantake yaa'e Wonto <<Abbayo>> hidi xheygesa hi maaddho geede ha saha gara artaxe maaddhi hi yese aallo Wonto jhashena yesuwayte.

¹⁸Hinadiyaxhi garafa hinuko garda go'uwa yesokofa hi wozuttosi baane birrena oo'oyne worqena e maaddho baane

¹⁹hade haasse keenguwa geeshi dori suuxuke yese kuxuttese Kristosa suuxuna e maaqenike erako hi ere.

²⁰E xharuttosi ha sahay meddhutto baane e maaqusune hatte aallicira beraaka hi gishako e addeydo.

²¹Haybowafa Kristosa densi kuxa esuse inda Wonto Kristosa badenako hi aadexe. Ha e gisha hi aadexesaara hi gobbesaaray Wontoko.

²²Indo nayshita awsha keenguwa ogena hi eehorosa aadese woosuttena hinumba geeshiko hi yese. Yoonase kume hi muxhurona hi bidzi bidzina modhussi wola eehuwayte.

²³Sekke hi yeluttosi baane axukofa e maaddho baane bayese danda'uwasukofako. Ye esi en'a maaddhi koolo makki aallo miindi yese Wonto katoko.

²⁴Ye esini Hayla Fissharowa <<Axeydosi hade maatake yesesako. E kuxa fuulani uddi hade gubba fiireke yesesako. Maatani melako mele, fiireni dhaddi gufako e gukke.

²⁵Wonto katomay koolo makkina miindiko e yese>> yeydiko e hine. Ye Wonto katoni ha hinuse ohutta modhe odoko.