Read koorete 1Phexhrosey 2 Bible Online

1Phexhrosey 2 - koorete bible

1Phexhrosey 2

¹Yoonase iiteteni uddi, axe qaaruseni uddi, awshani, dhiidhani, gunceni uddi hi garafa ooxuwayte.

²Laaxi modhe maaqesa oddhena hi beedo geede hatte yelutta xhahey dhanxe dhame worgenike hi buro gara Wonto ogese eruse geeshe maaddhese erana dicci kume loolowaka handi hi elloronike ye era orjena worguwayte.

⁴Yebo, en'a shuche maaddhese Laaxi Yesuusako uquwayte. Ye shucheni axiti haassi datto, Wontomay hay xhardi e kusso.

⁵Hinunini hade en'a shuchituke Wonto Ayaanana durkutti keexhuttese aadena Wonto zawa maaqesuko hi keexhutte. Ha e bishanako Yesuusi Kristosa badena Wonto magguse e Ayaanana durkutti ingutte aadena kaasha esuse uqusese haylondese kahinita hi maaqe.

⁶Ye esini Hayla Fissharowa <<Hay, shuchi zaway ee'oronike mahesa xharutti kuxutti yesesa ye shuchuko ta gade Xhiyoone katamaa. Esunani aadexesi koolona borsuwasso>> hidi hine katoy dizzuttiko yese.

⁷Yoonase aadexiya yese hinuni ha shuche kuxuttese shuche matiko hi beene. Aadexuwasitusema <<Shuchuna keexhichashiti haassi dattecho shuchi hade boorey zawa aykenike zawa ayke shuchuko e maaddho.>>

⁸Assini <<Ha shuchi axita dhumusesako, axita dhundi ollesako e maaddho>> yeydiko e hiyuttecha. Wonto katose woosutte be dheeddo gisha u dhumutto. Yeydi u maaqoronike Wonto maxokeko e maaqicha.

⁹Maaquwaye baaka hinuni cenchaafa micushe be fo'iya hinumba xheyda Wonto malla hanta hi odusoronike ha saha gara yese axitaafa xharuttese omma, kaati kahinita, hayla axita, Wontoy beese matoositako.

¹⁰Hinuni olo Wonto axita maaquwadiko hi yecha, hattema Wonto axitako hi maaddho. Olo maarutto badiko hi yecha, hattema maaruttiko hi yese.

¹¹Ta eehe ta badito! Ha saha gara borsitaaara artaxitaara maaddhi haya hi yesune hi lubbo baysese dargutte acho col'a garafa dhaddi hi zaroronike hinumba odde hidiko ta shi'e.

¹²Aadexuwasiti abani fetto <<Iita hanteesitako>> yeydi hinumba u gunco'aykoni Wontoy yaa'ese yoone wonte modhe hi hanta beedi Wonto u kuxoronike usaara yesine modhe maaddhi yesuwayte.

¹³Laaxi Yesuusame hissine adeto keenge axita uddi afana mati ususe woosuttuwayte, kaataxhey afana yesine aheesita u maaqe gisha ususe woosuttuwayte.

¹⁴Kaati oomona aheesiti iita hanteesiti gara yaa'ese modhe hanteesita nasheshe kaati adeto ususe indeseesita u maaqe gisha ususe woosuttuwayte.

¹⁵Ye esini modhe hi hantana eruwa muyiti erdo badi be zeeresa dhaddi mikki u hiyoronike hi mahorosi Wonto maxoko.

¹⁶Wonto maala maaddhi shawo hi kessonike yesuwayte baaka ye shawo kese goyndi iitete fasshi hantofita.

¹⁷Axitani uddi kuxuwayte, aadexe indo nayshitani eehuwayte, Wontoni jhashuwayte, kaateni kuxuwayte.

¹⁸Hinuno maalito, hi laaxita afana mati ususe kuxana woosuttuwayte. Hi woosuttesini modhitusaara maddhunxuwasitusaarawo e maaddho baanne jheecheeshitusaarako.

¹⁹Ye esini axi esa <<Modheko e hanto>> hidi hinesi be hanto baa hantana Wontome hissine dandadhi maddha e ekkusuneko.

²⁰Iita hi hantine hinumba durusune dandadhako aba woomaw hi degexe? Maaqe baa modhe hanta hi hantosuna hinumba durusune hi dandadhako Wontoy hinumba <<Modheko u hanto>> yeydiko e hine.

²¹Hi xheyguttosi modhe hanta hanti maddha efesuko. Ye esini hinumeysine maddha etta Kristosay waydi yesese hinumba e worgusenike beysiko e yese. E hando ogenani hanguwayte.

²²Kristosay aba cubboni hanto baasso. Be nuunana zaade zeerdi eruwasso.

²³U cashushuneni mati cassho baasso. Maddha ekkisine gizo yaa'e Wontose bemba garsi e indosa baaka uso kassho baasso.

²⁴Cubbo ni hantuwannike hade haydhese axuke cubbokofa shahutti gizetena ni yesorosako Kristosay beese be gara ni cubbo iddi suxi mixi gara e suxhutto. Ye e madanako hi loollo.

²⁵Ye esini hinunini hade be oge halla dorituke baadiko hi yecha, hattema hinumba yeengesi garaara kakkesi garaara maaddhiko hi yese.