Read koorete 1Phexhrosey 3 Bible Online

1Phexhrosey 3 - koorete bible

1Phexhrosey 3

¹Yeydiwo indowaxhito, hi adiyaxhita afana mati ususe woosuttuwayte. Ye esuke fetto Wonto katose woosuttuwa aditi yessakoni hi zeerdo baaneko hi yeso beedi Wontoko maaqese u danda'e.

²U maaqesini geeshe maaddhi yese hi yesowara axe kuxe hi yesowara beyenako.

³Hi bisha modhetey qino meddhusena, worqe hi gara seelenaara kuxuttese maa'o maadhi wude badena bente waarenaara maaddhoppe.

⁴Hi waarey Wonto buro orje wooma keengesa bayese danda'uwa shenonaara daxhi hiyenaara zawanase maaquwaye.

⁵Ye esini olo be gobbo Wonto gara gaddecha hayla maaqicha indowaxhiti u waarichoshi be adiyaxhita afana mati ususe woosuttenako e maaqicha.

⁶U woosuttichoshini Saaray Abrahaamese <<Ta laaxo!>> hidi hissine woosuttichonikeko. Hinunini hi adey abani matako jhashe baaka modhe maaqe abako hanta'ayko i nayshitako hi maaqe.

⁷Hinuno adito! Wonto hi shi'esi dhumutteesume hi indowaxhituse maxuwayte. Hinume gafa meddho u maaqe gishaara Wontoy axuse be keenge maxo modhetiyafa densi inge yeso hinunaara u degexoro gishaara uso kuxuwayte.

⁸Ta alseeme buro, hi uddinawo hi bidzi bidzina wolla kundi yesuwayte, woluse maxuwayte, indo nayshiti wola eehenike wola eehuwayte, woluse higilesaara hinumba ullaysesaara maaquwayte.

⁹Axiti iita hinuse u hanta'ayko sekke e godowa iita matofita, u casha'ayko sekke mati casshofita. Hinuni xheyguttosi suuse efese e maaqe gisha yeysi mahekofa suuzuwayte.

¹⁰Hayla Fissharowa <<Maggana yesesaara modhetena yesesaara worgesi be urxhumena iita be zeeruwanikiyara be nuunana be qaarusuwanikiyara biya kakkuwaye.

¹¹Iitaafani dhaddi zaruwaye, modheteni hantuwaye, feditaara wolko modhetena yesese worguwaye, karduttuwaye.

¹²Ye esini Wontoy be aafena gizitako e beene, be washena u shi'esako e siine. Iita hanteesiti garama huulanako e beene>> yeydiko e hine.

¹³Modhe hantese oseydi hi karduttako hinumba maddhunxesi oonena?

¹⁴Gizo hanta hantaa maddha gelesa maaqo hiidako fetto suuzuttesesako hi maaqe. Axiti kasho jhasshofita, hooddofita.

¹⁵Kristosa hi muxhurowa Laaxe mati kuxuwayte, gobbiya hi yese gobbo gisha hinumba oyceeshituse uddi sekke mahese uddi woggaaka naqutteseesita maaquwayte.

¹⁶Ususeni hi mahesa shenonaara axe kuxenaara mahuwayte. Kristosaara hi yese yeso modhetena hi gara iita zeereesiti yesa'ayko ye be zeerdo zeerena u borsoronike hi muxhurowa <<Iitako ne hante>> yeydi hinesa keenguwasa yesuwayte.

¹⁷Ye esini Wonto maxoy maddhaa hi geloronike e maaddhako hinuse e bisheshi modhe hanta hanti baaka iita hanti maddha hi gellako bishuwassho.

¹⁸Kristosay Wontoko numba uqusese beese gizo maaqisine gizete keenguwa nuume nu cubbo gisha sekke be lakkuwasa bidziyawoko e haydho. Axe be maaqesuna e haydho, ayaana be maaqesuna dendi en'a e maaddho.

¹⁹Haydhi tufe godowa yeseesituko ayaana be maaqesunako handi modhe odo e oto.

²⁰Ye tufe godowa yechaashiti olo Nohey markabe keexhusune Wontoy <<Taako maaqoko u maaqe>> hidi dandadhi kattine woosutte inxhadhechaashitako. Markabiya gelli bayso waassaafa attaasiti u taaboy oddhe maaqe hazzuppi geritawoko.

²¹Ye waaxini hatte hinumba looluse xhinqate bishako. Xhinqatey axhuma be garafa shoti ooxe e maaddho baane Wontoy bemba maarete geejheshe be muxhurona yesese Wonto shi'eko. Xhinqatey e loolusesi Yesuusi Kristosay haybowafa dendosunako.

²²Esini afaa handiko Wonto oshichi bade kuxa godowa e yese. Afaase woosaxitani maaqqe adeto keengeesitini afana osa keengeesitini uddi e oomo maaddhiko u yese.