Read koorete 1Phexhrosey 4 Bible Online

1Phexhrosey 4 - koorete bible

1Phexhrosey 4

¹Kristosay axe maaddhi maddha gellonike hinunini maddha gelese gixhuttesesa maaquwayte. Ye esini ha saha gara yesine maddhaa gellasi cubbo hante dhaddiko e yese.

²Ha e geede sekke ha saha gara be yese wogga aallo hade axi maxoke iita col'a hantese e maaddho baanne Wonto maxoke hantesuko e yese.

³Ye esini Wonto aadexuwasiti hantenike fettona seefuse laggeto hantana, iita acho col'ana, usshi goojhena, miyoy usshi yese godo bhikkilutti qaaxhe garsi usshi seefusesa hantena, Wonto maaquwa wonto darrise ogena kuxena ye esa bisheeshita hanti hi garso beriti ellako e elle.

⁴Ye e bisha iita yesuwa usaara wolko kessi hi geluwa gishako u buro e baane, hinumba u cashe.

⁵Maaquwaye baaka en'a yeseesiti garaara haydhasiti garaara yaa'ese naquttese yaa'axi buro uddhiko ye e bisha yesose oycutti e utta mahe uso e worguse.

⁶Ye e gisha haydhasituseni atto badesine modhe odoy e ohuttosi ye e bishay oone gara be yaa'uttenike u acho garani yaa'uttoko e yaa'utte, be ayaananama Wontoy yesenikeko yeso degessi u yese.

⁷Yoonase hay uddi basi aalliciray elliko e yese. Wonto shi'ese hi danda'oronike hinumba erdesesa maaddhi qaaxhe gare baaka yesuwayte.

⁸Eehay laga cubbo iiche gisha uddi basume keddaysi hi bidzi bidzina wola eehuwayte.

⁹Umbu umbu hido badi yesine wola hi zawaa zawaa mokkuwayte.

¹⁰Wontoy axuse be keenge maxo modhetiyafa densi axuse e indese be bishana bishana yese ingo hade modhussi ayke axuke hinunini modhussi ayti hi bidzi bidzina hi ettese ingoke wola maruwayte.

¹¹Wonto kato ohesi ooneni Wontoy beese esukaana ohesa maaqenike gaxhisine ohuwaye. Wonto zawaa maresi ooneni beese e inge osana maruwaye. Wontoy Yesuusi Kristosa badena yenniya uddi basunako e galatutte. Kuxani adetoni koolo makkina esuse maaquwaye. Ameen.

¹²Ta eehe ta badito! Hade tamake megge iita deexho maddhay hinumba naadhi beyese hi gara yoosune lossutto baa kille abakoy hade hi gara yoodosa mati du'eydofita.

¹³Kristosay be kuxa fuulana yoone wonte orjena hi maggoronike e maddha shahaxe hi maaddho gisha fetto keddaysi magguwayte.

¹⁴Kristosa sunxi gisha cashuttesesa hi maaqo'ayko kuxa fuula keenge Wonto Ayaanay hi gara utte gisha modhussi magguwayte.

¹⁵Ooneni hinukaafa maddhaa gela'ayko axe woddhi, kayssi, iita hanti oo'oyne mikke axi zeeriya gelli maddha be gara beenna e oodosuna maaddhoppe.

¹⁶Kristosa e aadesso gisha maddhay e gara ellesi yessako Kristosa sunxi e gara xheygutto gisha Wonto galatuwaye baaka borsoffe.

¹⁷Ye esini yaa'ay yaa'utte woggay elliko e yese. Burona Wontoy yaa'esi be zawa axiti garako. Hinne yaa'ay burona nuukaanna yaa'utte aykesa e maaqo'ayko Wonto modhe odose woosuttuwasiti alsoy waani e hine?

¹⁸Fissharowa ohisine <<Gizo axi haybowafa maaruttese danda'esi fetto maddhana e maaqo'ayko Wonto jhashuwashitaara cubbachitaaray hine waani hittamiine?>> yeydiko e hine.

¹⁹Ha e gisha Wonto maxoke maddhaa gele axiti be godofa artuwa meddha Wontose odde hissine bemba indi modhe hanta be buro gara kossi kossi hantuwaye.