Read koorete 1Phexhrosey 5 Bible Online

1Phexhrosey 5 - koorete bible

1Phexhrosey 5

¹Hatte hinukaa yese Wonto zawa cimituse <<Oseywayte!>> hidiko ta hine. Tanini hinukeydi Wonto zawase cimako, yeydiwo Kristosa gara yooda maddha odusesaara buro gara addeynesuse e kuxa fuula shahaxaarako.

²U gara hi maagetese Wonto axita kakkuwayte. Ha axita hi kakkesi <<Ha cimoonte tani worguwasso>> hidi hido badesine Wontoy eehenike <<Eewwa!>> hidi hiyena maaquwaye. Miijhe degexeeme hissine sekke hanke hiyena e maaddho baanne Wonto marese hi keenge keddaydese eehaafa dendasuna maaquwaye.

³Odde hissine hinuse inguttese axiti modhe hi hante hanta beedi hantoronike maaquwayte baaka u gara adeto beysena maaddhoppe.

⁴Yeysi hanta'ayko yeemaxituse afana maaga maaqe yeemaxi yooneniyaka kuxuttese iituwa mooreko hi ekke.

⁵Yeydiwo hinuno mullito, cimita afana mati ususe woosuttuwayte. Hi uddina yekke hinumba ulla hissi wolko yesuwayte. Ye esin <<Be qino nashe axe Wontoy iiloko e iile, bemba ullayseesitama be keenge maxo modhetiyafa dendasuna uso modhe aafenako e beene>> yeydi e hiyuttonikeko.

⁶Yoonase Wontoy <<Yeydi maaquwaye>> hidi be hidese woggaaka hinumba wokke kedda kedda e hisorosa osaxi e kuche oomo hinumba ullaysuwayte.

⁷Esi hinuse maxe gisha hi maddhundo basita uddi e gara dakkuwayte.

⁸Qaaxhe gare baaka yesuwayte, birkuwayte. Hi iilaxi Humbayey hade be muunesa wordi ga'e garmakeko sekke hanke e hante.

⁹Ha saha gara uddi yese hinindo nayshi garani ye e bisha maddhay e yoonenike erisine aadexona miindi hi iilaxe inxha'uwayte.

¹⁰Axuse fetto maxo modhete keenge Wontoy Kristosa badenako koolo makkina e kuxa fuula shahaxe hi maaqoronike hinumba e xheydo. Oddhe woggase maddhaa hi gello geede hinumba sekke mati e osuse, e gagguse, minsini e esse.

¹¹Koolo makkina uddi basi gara osay esuse maaquwaye. Ameen.

¹²Ha esa hinuse ta otonike diizzasi nuundo na'i Silwaanoseko. Esini <<Sekke hanke artuwassako>> hidi ta hinesako. Oddhena ta diizosini hinumba minxesaara Wontoy axuse keenge maxo modhetey aadewo modhe e maaqenike addusesaarako. Ye e modhete maxona miindi ee'uwayte.

¹³Hinuke xharutti Babilooniya[1] yese Wonto zawaxiti hinumba <<Modhiya hi yese?>> hidiko u hine. Ta yele Marqooseni <<Modhiya hi yese?>> hidiko sawo hinuse e uquse.

¹⁴Indo nayshukeysi wola muuxxhi wola sawusuwayte. Kristosaara bidzo maaddhese hi uddise Wonto modhetey maaquwaye.