Read koorete 2Phexhrosey 1 Bible Online

2Phexhrosey 1 - koorete bible

2Phexhrosey 1

¹Yesuusi Kristosa maalaara esuna anxuttasaara maaqe Simooneydi hiyutte Phexhrosekofa. Nu Wontowara nuu loolusesaara maaqe Yesuusi Kristosa gizetena nuni aadessonike kuxa aadexo u aadexoronike Wontoy matoosituse ta anxe woosso.

²Wontowara nu Laaxi Yesuusaaray axuse keenge maxo modhetiyara eehaaray hinuse laguwaye. Wontowaara nu Laaxi Yesusaara hi erorosa mahoko e mahe.

³Be kuxa fuulanaara keddaydese modhe be maaqesunaara numba xheyda Wonto nu erdo ogena esa kuxisine yesese nu danda'oronike Wonto be maaqe gisha be keenge osana uddi abako nuuse indiko e yese.

⁴Ye ogenani be gobbusechosha kuxuttesesaara mallaara maaqe gobbo nuuse e indo. Ye esuna iita col'aafa dendasuna ha saha gara yese maaquwa yeso ogiyafa tulxhiko Wonto wontuntey nu bakkaanna e bente.

⁵Fetto e gisha oseydi kardutti hi aadexo gara modhe maaqe, modhe maaqe gara era,

⁶era gara be qine kafe, be qine kafe gara miindi danda'e, miindi danda'e gara Wonto jhashe,

⁷Wonto jhashe gara hinindo nayshushe higile, hinindo nayshushe higile gara eeha hi kosoronikeko hinumba e oyce.

⁸Yeenxhina oseydi dicesha hi maaddhako hinuni nu Laaxi Yesuusi Kristosako hi eresa baaka go'uwasitaara aafe kaxhuwasitaara maaquwaytako.

⁹Ha ohuttasuna yesuwa aximay zara yesesa beyese danda'uwasa oo'oyne bal'ako. Buro be keengicho cubbowafa be geejhoshani bottiko e yese.

¹⁰Yoonase nuundo nayshito! Hi xheyguttosaara hi xharuttosaaray miimoronike burome garsi oseywayte. Ye esini yeenxhi abakita maho'ayko fetto dhumuttuwaytako.

¹¹Yeydiwo ye esunako nu Laaxeni numba loolusaseni maaqe Yesuusi Kristosa kaatetowa hi gele ogey kumena do'utti naqutti yesune hi degexe.Ye kaatetoy koolo makkina yesesako.

¹²Fetto ye zeerita erdiko hi yese, hi ayto aade garani oseydiko hi yese. Yeydi e maaddhakoni ye usita uddi wogga sekke hinumba maxusese tani gakkuwasso.

¹³Ha saha gara ta yese aallo ha esa hi maxoronike hinumba birkusey tamba worgusesa e maaqenikeko ta maxe.

¹⁴Nu Laaxi Yesuusi Kristosay taase addusonike ha saha garafa haybona ukkena ta shahuttenike erako ta ere.

¹⁵Haydhi hi garafa ta shahutto geede uddi wogga ha usita maxese hi danda'oronikeko oseya ta yese.

¹⁶Nu Laaxi Yesuusi Kristosa osa gishaara e yoowe gishaara hinuse nu otoniyaka nuuse e kuxa fuula nu aafena beedi baaka axi erana ohutta mamako ayti maaquwasso.

¹⁷<<Ta eehe ta yeley ha esako, esuna maggako ta magge>> yeydi hine katoy malla kuxa fuula keengesi garafa sintoniya ye ade maaqe Wontokofa galataara kuxa fuulaara ettiko e yese.

¹⁸Yeydi hine katoy afaafa sintoniya hayla maaqe bakka gara esaara wolko yesine nunko nuuse siida.

¹⁹Ye esuna kaayaxiti otosa burome garsi erdiko nu yese. Sahay wontoro aallowaara hi muxhurowaka wontaso bakalichay kesoro aallowaara cenchaaka faqiya yese faqe gara hi maxo hi gadenike ye e gara hi maxo hi gaddako modheko hi hanto hidi hiyoko.

²⁰Uddime buro hinumba ere e worgusesi Hayla Fissharowa diizutti yese kaayaxiti otosa ooneni beese be qino maxona bircheshe e danda'uwannikeko.

²¹Ye esini kaayoy Wontoy anso axiti Ayaana Geeshuna durkutti u zeerdosa baaka fetto axi maxona zeeruttase maaquwasso.