Read koorete 2Phexhrosey 2 Bible Online

2Phexhrosey 2 - koorete bible

2Phexhrosey 2

¹Kaayoy uddi Wontokofa maaqusune zaade kaayaxiti olo Isra'eelaxiti gidda be yechonike hi giddaakani zaade erunxe eruseesiti dendako u dende. Usini biya wozzecha Laaxe <<Nuni esa eruwanxhiko>> hidi be hiyoro aallo bayso oge aange zaade erunxuko aachiyaanna u gelse. Ye esunani be gara maxutto baa baysoko u oone.

²Lagitini u geede handi borsuse hanta u hante. U hanto hanta gisha aade ogey e cashutte.

³Ye zaade erunxe eruseesiti habbu habbu hineesita maaddhi be garafa zaade zeere meddhi hi garafa biya go'e miijhe u bhikkile. Olowafa ayti Wontoy u gara yaa'ese naquttiko e yese, uso bayseseni gehuwasso.

⁴Wontoy afaa yechine cubbo hanta woosaxita sansalatana tufutti shanna cenchaaka yaa'a wontay elloro aallo u kaforosa Gaannamiya e dattosa baaka ususe jherdo baasso.

⁵Yeydiwo Wontoy cubbachiti e gara yecho saha gara bayso waaxe oossine e gaddese gizete gisha ohicha Nohe fede laappi geritaara e maardosa baaka buro yecha sahase jherdo baasso.

⁶Assi Wontoy Sodome katamaara Gamora katamaara muqo u maaqoro aallo tamana uso meddi yaadhiko cubbo hanteesiti usuke yaa'uttesa e beyso.

⁷Iita axiti hanticho borsuse hantana higilsine yecha gizo axe maaqicha Looxhe yahafa e maardo.

⁸Ye gizo axe maaqichashi u giddaa yesine ye iita u hanta beesiniyara siisiniyara wontana wontana orjena beese e higilicha.

⁹Yoonase haanxhi maaddhakoni Wontoy biya jhasheeshiti gara yoone naa'owafa waanisi uso be kessesaara cubbachiti gara be yaa'e wontay elloro aalloni waanisi maddhunxisine uso gaddi be ellusesaara erako e ere.

¹⁰Fetto tuna be maxowafa dendasuna be achoy col'esa hanteesitaara Wonto adetoni haasseesitaara yaa'esuko katti uso e elluse. Ye zaade eruseesiti naasseesitaara <<Taa baaka feday baasso>> hidi hineesitaarako u maaqe. Afaa yesine kuxa fuula keengeesita casheshe fetto jhashuttuwasso.

¹¹Maaquwaye baaka Wonto woosaxitini osanaara adetonaara zaade eruseesitume garesa maaddhakoni Wonto buro ye kuxa fuula keengeesita cashuttuwasso.

¹²Ye zaade eruseesiti <<Ha esako>> hidi be erdo baa abakoko u cashe. Usini bo'itako u bishe. Bo'iti axi uso abakona ayti wodhorosako u meddhuttese, be meddhuttoninkewoko u yese, kaheni keengmuttuwasso. Usini hade ye bo'iti baanenikeko u baane.

¹³Be iitetese ususe bishe iitete woomako u ekke. Wontaaka be acho col'a doojhusheshe sekke hanke doongisineko <<Ha esi nuuse maggako>> hidi u hine. Ye usitini darriseesitaara seefuseesitaarako. Modhe bisshi hinunaara wolko bidzi tatowa uttisine usi bemba qaaruse be achona uddi woggaa maggeesitako.

¹⁴Usi cubboni dhagguwasita be beeneesitaara uddi laggetese worge axitako. Miindo baa axitani u qaaruse. U lossesesi habbu habbu hiyeko. Ye usitini aacuttese axitako.

¹⁵Gizo oge dhaddiko u yese. Bosoore yele Baala'aame ogiyaanna handiko e hantonike hanti u hallo. Baalaamey iita hanta hanti miijhe degexese eehe axuko e maaqicha.

¹⁶Be hanto cubbo gisha muruttiko e yese. Zeere eruwadecha harrey axuke zeerdi ye kaayaxi goojhalli hanta e hantuwannike e mato.

¹⁷Ye zaade eruseesiti hade waaxe essaafa shonqichoyne mela godoke yeseesitako. Yeydiwo keddaydese agexuna ur'utti hange dhumake yeseesitako. Ye usita shanna cenchako kakkesa.

¹⁸Halli beese yese geriti giddaafa haga kessi decco baa axita go'uwa zeere orje bishushi zeerena iita acho col'aaka u geloronike uso beeko u gooche.

¹⁹Beese cubbo maala maaqisineko <<Shawoko hi kese>> hidi hissine u gobbuse. Axi biya iisshi be oomo mataasuse e maalako.

²⁰Nu Laaxeni numba loolusaseni maaqe Yesuusi Kristosa erena ha saha tunaafa be kesso geede hanke maaddhi ye iitetiya gelli u iichuttako ye buro u yesome geede u yesoy iitesesako e maaqe.

²¹Axi gizo maaddhi yesoronike Wontoy axuse otosa siidi be etto geede beese ingutta hayla woossowafa hanke maaqekofa ye esa fetto buro ere u dheeddesako ususe bishako e bishicha.

²²<<Kanay sekke be cooshechoshaaka e maaqe>> yeydiwo <<Girmey be shohutto geede hanke maaddhiko dhoqiya e andare>> yeydi e mamakuttenike ye mamakoy aade maaddhi u gara elliko e yese.