Read koorete 1Yohanisey 1 Bible Online

1Yohanisey 1 - koorete bible

1Yohanisey 1

¹Hinuse nu odusesi burowafawo yecha yeso inge kato gishako. Ye esini nu siidosa, nu aafena nu beedosaara modhussi beedi nu kuchena nu aytosaarako.

²Ye yesoni addeydo, nuni ye esani beediko nu yese. Ato maaddhiko e gisha nu zeere. Ade maaqe Wonto badiya yechine nuuse addeyda koolo makkina yesosuko hinuse nu ohe.

³Nu siidosaara nu beedosaara hinuse nu odusesini nuura wol bade hi maaqorosako. Wol bade ni maaqesini adiyara e yele Yesuusi Kristosaara wolkoko.

⁴Kume muxhurona keddaysi nu maggorosako ha esa hinuse nu diize.

⁵<<Wontoy fo'eko, esuka koolona cenchay baasso>> yeydi hine woossoko esukofa nu siido. Hinuse nu woosesini ha esako.

⁶<<Wontowara wol badeko nuni>> yeydi hissine cenchaaka sekke hanke hanta'ayko zaaddoko nu zaadde. Aade hanta gara feysshuwanxhiko yeydi hiyoko.

⁷Wontoy fo'iya yesenike ninini fo'iya sekke hanke hantako ni bidzi bidzina wol badeko ni maaqe. Yeydiwoni Wonto yele Yesuusa suuxi cubbowafa uddiko nii e geeshe.

⁸<<Cubbo keenguwanxhiko nuni>> hidi ni hidesako niiko niinna ni qaaruse, aadey ni muxhurowa baasso.

⁹Ni cubbo Wonto buro ni bazzako Wontoy aadaxaara gizowara be maaqe gisha ni cubbowafako nimba e maare, ni doometiyafani uddiko nii gizussi e geeshe.

¹⁰<<Cubbo hantobaanxhiko nuni>> hidi ni hidako Wontoko zaadaxe ni mahe. E katoni ni muxhurowa baasso.