Read koorete 1Yohanisey 2 Bible Online

1Yohanisey 2 - koorete bible

1Yohanisey 2

¹Ta nayshito! Ha esa hinuse ta diizesi cubbo hantofita hidiko. Haliya ooneni cubbo hantesa maaddhako nuwade badiya nu gisha eedhesesako nu keenge. Ye esini gizo maaqe Yesuusi Kristosako.

²Ni cubboy ucutti e baanesi esunako. Ni cubbowo maaddho badi e yesune ha saha gara yese uddi axiti hanto cubboy e ucuttesi esunako.

³<<Wontosuko tani>> hidi niinesi aade e maaqenike esuna ni eresi e woosso ni hanto geedeko.

⁴<<Wontosuko tani>> hidi hissine e woosso hantuwasimay zaadaxuko, aadey e muxhurowaaka baasso.

⁵Wonto katose woosutte axi ooneni Wontose e keenge eehay aadewo kume muxhurowafako. Wontowara bidzo ni maaqesi ha esunako e erutte.

⁶<<Wontowara bidzoko tani>> hidi hine axi Yesuusay yechonikeko yese esa e worguse.

⁷Ta eehe ta badito! Ha hinuse ta diize woossoy burowafa ayti hi ere buro woossoko baaka kille woosso maaquwasso. Ye buro woossoni hi siidecho katoko.

⁸Assi kille woossoko hinuse ta diize. Ye esini cenchay dhaddi gardine aade fo'e hidi hiyutte fo'ey fo'iya yese gishako Kristosa yesuwakaara hi yesuwakaara aade maaddhi e bento.

⁹<<Fo'iyako ta yese>> hidi hissine beyndo nayshita inxha'esi ooneni hatteni cenchaako e yese.

¹⁰Beyndo nayshe eehesi ooneni fo'iyako e yese. E muxhurowaka fediti dhumuttoronike aban baasso.

¹¹Beyndo nayshe inxha'esimay cenchaako e yese. Cenchaako sekke hanke e hante ye cenchay e aafe bal'a matese gisha aya be hangesa eruwasso.

¹²Ta nayshito! Hi cubboy Yesuusa sunxuna <<Attuwaye>> hidi e hiyutto gishako ha esa hinuse ta diize.

¹³Adiyaxhito! Burowafa ayti yecha Wonto erdi hi yese gishako ha esa hinuse ta diize. Mullito! Iita maaqe esa[1] hi iissho gishako ha esa hinuse ta diize.

¹⁴Nayshito! Ade maaqe Wonto hi erdese gishako ha esa hinuse ta diizzo. Adiyaxhito! Burowafa ayti yese Wonto erdi hi yese gishako ha esa hinuse ta diizzo. Mullito! Osaxe hi maaqe gisha Wonto katona hi miindese gishaara iita maaqe esa hi iisheshe gishaarako hinuse ha esa ta diizzo.

¹⁵Ha iita sahani maaqqe ha saha gara yese iita abakita eetofita. Ooneni ha saha eeha'ayko ade maaqe Wonto eehuwasso.

¹⁶Ha saha gara yese ha saha maxoni be achona col'a, aafey beedo modhe abako uddi <<Taase e maaddhako>> hidi col'aara be yesona nashuttiyaray uddina adekofa maaddho badi e yesune ha sahakofako.

¹⁷Ha sahaara axi esuse keenge col'aaray garoko e gare, Wonto maxona hantesimay koolo makkinako e yese.

¹⁸Nayshito! Ha esi aallicira woggako. Ha esume buro <<Zaadaxi Kristosako yoonesa>> hidi e zeeruttechonike fetto hay laga zaadaxi Kristositako hanzo yoodesa. Ha esunako aallicira wogga e maaqesa ni ere.

¹⁹Ha usitini nuukaafako u kesso. Nuukaafa kesuttose baaka nu bade maaquwadiko u yecha. Nu bade maaddhako nuurako oseydi u yesaane. Nuukaafa u kessosi ussaafa bidzini nu bade maaquwannike addusesuko.

²⁰Hinunimay hayla maaqesukofa tishuttiko hi yese. Hi uddinani aade erako hi ere.

²¹Aadeni modhussi hi ere gishaara zaadey aadiyafa kesuwasa hi ere gishaara baaka aade eruwaytako hidi maaquwasso hinuse ha esa ta diizesi.

²²Oonewa zaadaxi? <<Yesuusay Mesihe maaquwasso>> hidi hinesi ye esako zaadaxi. Ye esini << <Ade> hidi hiyuttesi Wonto ade maaquwasso, <Yele> hidi hiyuttasi Wonto yele maaquwasso>> hidi hinesi ye esako zaadaxi Kristosay.

²³<<E yele hidi hiyuttesi e yele maaquwasso>> hidi hinesi uddi adeni inxha'ako e inxha'e. E yeleni <<Aade e yeleko>> hidi hinesi adeni ettiko e yese.

²⁴Burona hi siidechoshi hi muxhurowa yesuwaye. Ye esi hinukaa e yeso geede adiyara yeliyara wolko hi yesoronike maaddhiko e yese.

²⁵Ye esini Kristosay <<Hinuse ingako ta inge>> hidi hidecho koolo makkina yesoy ha esako.

²⁶Ha esa hinuse ta diizesi hinumba qaaruseesiti yese gishako.

²⁷Hinuni Kristosa garafa hi ettese Ayaana Geeshi hinukaa yese gisha hinuse fede erusesa worgusuwasso, Ayaana Geeshuko uddi base hinumba erusesa. E erusesini aadewo baaka zaade erusuwasso. Yeysi e erusonikewo Kristosaara bidzo hi maaddhesenike shahutte baaka yesuwayte.

²⁸Yoonase nayshito! Kristosay yooneniyaka naassi borse baasa esa nu beyoronike esaara bidzo hi maaddhesenike shahutte baasa yesuwayte.

²⁹Kristosay gizo maaqenike hi era'ayko gizo hantesi uddina Wonto yele maaqenikeko hi ere.