Read koorete 1Yohanisey 3 Bible Online

1Yohanisey 3 - koorete bible

1Yohanisey 3

¹Beewayte, e naysheydi ni xheyguttoronike ade maaqe Wontoy waakeydi keddaydese eehana nimba e eetosa. Nini aadewo e nayshuko. Ha saha axiti Wonto be erdo baa gisha e nayshi ni maaqenike nimbani eruwasso.

²Ta eehe ta badito! Hatte nini Wonto nayshitako, buro gara aba ni bisheshi addaaka kesso baasso. Maaqe baa Kristosay yooneniyaka waakesesa e maaqenike ni beene gisha esa ni bishenike erako ni ere.

³Kristosana ha esa gobbesi uddi Kristosay geeshe maaqenikeko bemba e geeshe.

⁴Cubbo hantey Wonto wogga wodduse e maaqe gisha cubbo hantesi be uddina Wonto wogako e wodduse.

⁵Yesuusay cubbo keenguwasa maaqisine cubbo ooxeme e yoodonike erako hi ere.

⁶Kristosaara bidzo maaddhi shahutte baasa yeseesiti be uddina cubbo hantisine yesuwasso. Cubbo hanteesitimay uddina Kristosa beedo baasitaara erdo baasitaarako.

⁷Nayshito! Ooneni hinumba haluxesume hinumba kakkuwayte. Kristosay gizo maaqenike gizete hantesi uddina gizoko.

⁸Humbayey burowafa ayti cubbo e hante gisha cubbo hantesi uddina Humbaye yeleko. Wonto yeley yoodosi Humbaye hanta woddusesuko.

⁹Wonto yele maaddhesesi Wontoy gaddesesa beeka be keenge gishaara Wontokofa be yeluttese gishaara cubbo hantuwasso, hanteseni danda'uttuwasso.

¹⁰Gizo hanta hantuwasi uddi Wonto yele maaquwasso. Yeydiwo beyndo nayshe eehuwasi uddina e yele maaquwasso. Wonto nayshaara Humbaye nayshaaray shahutti u eruttesi ha esunako.

¹¹Burowafa ayti ni siidecho woossoy <<Sekke hanke wola nu eehheese>> yeydi hinesako.

¹²Qaa'eeleke maaddhofunxhi. Qaa'eeley Humbaye yele maaddhiko beyndo na'e e woddho. Aba gishaw beyndo na'e e woddho? Beese be hantay iita beyndo na'i hantay gizoydi maaqicho gishako.

¹³Nuundo nayshito! Ha saha axiti hinumba inxha'ayko micofita.

¹⁴Nini niindo nayshita ni eehe gisha haybowafa yesuwa ni fottesesa erako ni ere. Beyndo nayshe eehuwasi haybowako yaha e yese.

¹⁵Indo nayshaafa inxha'esi uddina axe woddhasuko. Axe woddhasi ooneni koolo makkina yesoy e muxhurowaka baanke erako hi ere.

¹⁶Eehay aba maaqesa esuna erese ni danda'esi Yesuusay niime hissine bemba garsi e indosunako. Nini niindo nayshume hissine nimba garsi ni ingorosako e worguse.

¹⁷Ooneni keemey e kuchiya yesune indo nayshaafa bidzi maddhundesesa beesine higile e dheeddako <<Wonto eehako ta eehe>> hidi waydi hiyese e danda'e?

¹⁸Ta nayshito! Nuunanaara odonaara maaddho badi e yesune aadenaara hantana beysenaara wola nu eehheese.

¹⁹Yeysi matoynako aadekofa ni maaqenike ni ere. Wonto buro jhashe baasa uqese nimba ni osusesi ye esunako.

²⁰Ni muxhuroy iita ni hantana nimba yaa'esa maaddhakoni Wontoy ni muxhurome afana maaqenikiyara uddi abako e erenikiyara eezuwanxhiko.

²¹Ta eehe ta badito! Ni muxhuroy nimba yaa'uwasa maaddhako Wonto buro naassiko ni uqe.

²²Wonto woosso kakkesaara esa maggusese hantesaara ni maaqe gisha esa ni shi'e base uddiko ni ekke.

²³Wonto woossoy e yele maaqe Yesuusi Kristosa ni aadexoronikiyara e woossonike sekke hanke wola ni eehoronikiyarako.

²⁴Wonto woosso kakkesi be uddina Wontowara bidzo maaddhi u yese. Wontoni essaakako yese. Wontoy nuukaaka yesesa erese nu danda'esi e indo Ayaananako.