Read koorete Yayqoobeyndo 1 Bible Online

Yayqoobeyndo 1 - koorete bible

Yayqoobeyndo 1

¹Yesuusi Kristosa maalaara Yayqoobeyndo na'aara maaqe Yuudakofa. Ade maaqe Wontoy eeti xheydine Yesuusi Kristosana kafutteseesituse uddi anxutta woosso.

²Wonto maaroy, modhetey, eehay hinuse laguwaye.

³Ta eehe ta badito! Ni uddina haybowafa Wontoy nimba waakeysi e maardosa hinuse diizese orjena wordiko ta yecha. Worguwamba baaka haylaxituse sekke be lakkuwasa bidziyawo ingutta aadexose hi karduttoronike hinumba osusese hinuse ta diizoronike taase orjena worgusesa maaddhi bentiko e yese.

⁴Wonto jhashe eruwasiti aachiyaanna hi giddaaka gelliko u yese. Ye usiti <<Wontoy axuse keenge maxoy modhewo e maaqe gisha nu col'esa nu hantoronike numba tuce abakoy baasso>> yeydi Wonto maxo arxeesitaara esawoy nuuse Laaxaara numba ahesaara maaqe Yesuusi Kristosase <<Nuni esuse woosuttuwanxhiko>> hidi hineesitaarako. Ye uso bissheshe axiti gara e yaa'uttenike burussiko e diizuttese.

⁵Laaxi be axita Gibxhe wudiyafa e kesso. Kesuwaye baaka ye e geede biya aadesso baasita e baysonike haanxho uddi erako hi ere. Eresa hi maaddhakoni ye esa sekke hinumba maxusesuko ta worge.

⁶Yeydiwo beese ingutta adetoy <<Ellako e elle>> yeydi hido badi yesine be godo datta afaa yecha woosaxita gaxhuwayte. Ye usita Wontoy koolo makki aallo tufiyaka u yesoronike shanna cenchaaka keddaydese yaa'a wonte aalloko e gaddese.

⁷Ye esukewo Sodome katamani Gamora katamani u googiya yecha katamitini laggetowa gelli asanxaara maachaaray wolko muhicho oge arsi maaquwa ogena wolko u muto. Ye usiti buro gara koolo makkina yese tamana yaa'utte cubbachiti bisha maaddhiko u yese.

⁸Ye esukewo ye axiti afukka afutti ye esuna durkuttisineko tunase biya mati tunaxe u maaqe. Wonto adetoni haassi afaaka kuxa fuula keenge afaase woosaxitani u cashe.

⁹Afaase woosaxituse afana maaga maaqe Mika'eeleni Muse aha gisha Humbayaara wolko be bersoniyaka <<Laaxi nemba muruwaye!>> yeydi e hidosa baaka esa cashena e gara yaa'ese naasso baasso.

¹⁰Ye axitimay be eruwa abakoko uddi u cashe. Usini axe maaddhi meddhuttechine hade gaxe keenguwa keemokeko u maaddho. U ere eray uso baysesako e maaqe.

¹¹Qaa'eele oge u hando gisha miijhemeydi hissine hade Baala'aameke halli u undese gisha, hade Qoreke afana maaga gara toora densi u baadese gisha uso baduffu!

¹²Ye usiti Kristosa eehaafa densi wolko hi muune tato giddaaka bidzoni borso keenguwasa hinunaara wolko utti muunne beesewo maxe tunaxitako. Ye massalaaka dhumoko u maaqe. Usini hade agexi ur'i etti dhaddi hange ira keenguwa dhumake yeseesitako. Mixi aafe kaxhe agunnaaka be gara aafe keenguwa e xhabhowafa shoddi dattine lam'i wogga haydhese mixuke yeseesitako.

¹³Usini hade iitana jhirahoy densese bagadeko u bishe. Ye e bisha jhirahoy goffunto beysenikeko usini borsuse be hanta u beyse. Hade Wontoy naddhi gaddecho godofa arti be godo hallese xhoolinteko u bishe. Wontoy ususe naddhese godoy koolo makki aallo shanna cenchaako.

¹⁴Addaamiyafa ayti laappunxo yeleta maaqe Henookey ha axiti gisha kaayo zeerisine <<Laaxi laga kumana taafutte afaase haylaxitaarako wolko e yoone.

¹⁵E yoonesini uddi axi gara yaa'ese, Wonto jhashuwashiti uddi u hanto iita u hantanaara Wonto u cassho cashonaara uddi <Baysiko hi yese> hidi u gara yaa'esuko>> yeydi e hido.

¹⁶Ye axiti uddi wogga umbu umbu hineesitaara abanani maggese danda'uwa baysowo taaggisine be iita col'a geede hangeesitaarako. U nuunay nashona kundesesako, beese bemba go'ese wordiko yahowo axe kedda kedda uyse.

¹⁷Ta eehe ta badito! Hinunimay nu Laaxi Yesuusi Kristosana anxuttaasiti ha e buro zeerdechosha gaxhuwayte.

¹⁸Zeerisineni <<Aallicira woggaaka iita be maxo geede hangisine hayla maaqe abako gara dhaaddesitako yoonesa>> yeydiko u hidecha.

¹⁹Ye usini Ayaana Geeshe keenguwa acho maxo geede hange axitako. Usoko axiti wol garafa shahuttoronike mahesa.

²⁰Ta eehe ta badito! Hinunimay uddime gardi haylondese hi aadexona wola dicheshe oseywayte. Ayaana Geeshi osana shi'uwayte.

²¹Nu Laaxi Yesuusi Kristosay be maarowafa densi koolo makkina yesowa hinumba e ellusesa kakkisine Wontoy hinuse indese eehaafa kese baaka essaa yesuwayte.

²²Aadexo gara eezo keengeesituse shene'uwayte.

²³Bidzi bidzi axita tamaafa shoddi ettonike etti haybowafa maaruwayte. Cubbowa hi geluwannike jhasshishine fedeesituseni shene'uwayte. Yeysi mahisine modhussi hinumba katti u cubbowafa dendasuna tuneydese u gara dollese maa'o fetto inxha'uwayte.

²⁴Hi unguwannike hinumba kakkisine magganaara haasse keenguwasaara kuxa fuulana yese be buro hinumba uqusese e danda'e.

²⁵Nu Laaxi Yesuusi Kristosa badena numba haybowafa maardi esawoy Wonto maaqesuse beritume uddi e buroni maaqqe hatteni koolo makki aalloni kuxay, fuulay osaara adetowaray maaquwaye. Ameen.