Read koorete Yohanise Haraje 1 Bible Online

Yohanise Haraje 1 - koorete bible

Yohanise Haraje 1

¹Ukkenawo maaqese hine abako Wontoy be maalituse e addusorosa Yesuusi Kristosase e beyso. Esini afaase be woosaxe ansi be maala Yohanisese e adduso.

²Yohaniseni be beedosita uddi Wonto katowara Yesuusi Kristosay otositaara e oto.

³Haanxhi uddi e ite woggay ukke e maaqe gisha ha kaayo fissharo zeerusesi suuzuttesako. Yeydiwo kaayoy otosa siinesaara ha fissharowaka e ohuttesenike hantesaaray suuzuttesako.

⁴Yohanisekofa Isiya wudiyaka laappi godowa yese Wonto zawaxituse anxutta woosso. Yesesa, yechashe, yoonesa maaqe Wontokofani kaatiya yese Wonto burowa yese laappi Ayaanitukofani yeydiwo be ettonikewo aade ohesaara haydhasitukaafa burona dendesaara saha gara yese kaataxhe gara kaatesaara maaqe Yesuusi Kristosakofani axuse keenge modhe maxowara modhetiyaray hinuse maaquwaye. Numba eetasusaara nu cubbowafa numba be suuxuna shawo kessa

⁶esade maaqe Wonto[1] kaatetowa gelli kahinita maaddhi nu hantoronike mataasuse kuxa fuulaara osaaray koolo koolo makkina maaquwaye, ameen.

⁷Beewayte, dhumaanna yootako e yoone, fetto caddaasitini atto badi yesineko axi uddi esa u beene. Be ommana ommana yese axiti uddi esa beedi <<Ay! Uy!>> hidi u yeeke. Eewa, yeydi maaquwaye. Ameen.

⁸Yesesaara yechashaaray yoonesi uddi base danda'e Laaxe maaqe Wontoy <<Achaara aalliciraaray[2] tambako>> yeydiko e hine.

⁹Tani hinindo na'e maaqe Yohanisey Yesuusi Kristosa badena nu keenge bidzetona hinukeydi e kaatetowa yesine hinunaara wolko maddhaseni maaqqe Wontoy inge danda'ose shahaxe maaqqe tani Wonto kato ta oto gishaara Yesuusay otosa ta oto gishaara Fiixhmo sunge dhaanaaka tufuttiko ta yecha.

¹⁰Bidzi wonte Wonto Ayaanay tamba haraje ta beyoronikeko mati e yecha. Ye wonteni Wontoy kuxutte wonta e maaqicha. Hade marachi katoke yese orje kato ta geede badena ta siido.

¹¹Ye katoni <<Ne beene abako diizuwa! Isiya wudiyaka be godowa godowa yese laappi Wonto zawaxituse ye ne diizzo fissharo anxuwa! Ye usitini Efesoone, Samirneese, Phergamoone, Tiyaxhirone, Sardeese, Filadelfiyaara Lodoqiyarako>> yeydi e hido.

¹²Tanini taako ohiyaka yesesa beyese ta geede ta maaddho. Ta geede ta maaddhoniyaka worqena naquttese faqey e gara gadutte laappi abakoko ta beedo.

¹³Ye laappi abakiti giddaaka axi yele bishesha ta beedo. Esini toke aallo handi ellese galala maa'o e maadhecha. Worqiyafa hantuttese abakoy e fenga xhaaxhutti e yecha.

¹⁴E qinowara e qino ufuxaaray hade booxi dori ufuxukiyara hade shachukiyara yese booxe e maaqicha. E aafeni hade tama looxheke faqesa e maaqicha.

¹⁵E tokeni tamaa gelli geeshe maaddhi laci laci hine laaka e bishicha. E katoni hade malla waaxi tonohe ooshuke ooshesha e maaqicha.

¹⁶Be oshichi kuchiyaka laappi xhoolinte e aytecha. Lam'i badena nuuna keenge satata nuunaxi e asshaafa kesiya e yecha. E aafushani hade iitana faqiya yese qoossuke faqiya e yecha.

¹⁷Esa ta beedo woggaaka hade haydhese axuke e buro ta undo. Esini be oshichi kuche ta gara gaddi <<Jhasshofuna, achaara aalliciraaray tambako.

¹⁸En'a yesesi tambako. Haydhiko ta yecha, hay koolo makki aallo en'ako tani. Haybo garaara Si'oole garaara adetoko ta keenge.

¹⁹Ye e gisha hatte yesesani maaqqe geede gara yoonesani harajena ne beenesa diizuwa!

²⁰Ta oshichi kuchiyaka ne beedo laappi xhoolinteseni maaqqe worqiyafa hantuttese faqey e gara gadutte laappi abakoseni u birchey ha esako. Laappi xhoolintey be godowa godowa yese laappi Wonto zawase yese Wonto woosaxitako. Faqey e gara gadutte laappi abakoy laappi godowa yese Wonto zawaxitako.