Read koorete Yohanise Haraje 11 Bible Online

Yohanise Haraje 11 - koorete bible

Yohanise Haraje 11

¹Ye e geede galala shomboqo bishe makke kalloy taase e ingutto. <<Handi Wonto Hayla Zawaara kaasha e gara kaashushooshaara makkuwa! Wonto kuxeesita taakuwa.

²Wonto Hayla Zawa googe qeyshushe zawa bademay Ayhuda maaquwasituse e inguttese gisha ye godo dhagguwa, mattofuna. Ye usiti hayla maaqe katamaaka oyddi tamma lam'i agunna aalloko be tokena u dheqe.

³Ato maaddhi zeere lam'i ta geruse osako ta inge. Usini higilsa maa'o maadhiko ye agunniti giddaa bidzi kuma lam'i xhiixe izzuppi tammi wonta aallo kaayo u zeere>> yeydi e hido.

⁴Ye usini ha sahase maaqe laaxi buro ee'e lam'i gultaara faqey e gara gadutte lam'i abakowarako.

⁵Ooneni uso miidhese wordako tamay u asshaafa kessiko u iilaxe e muune. Uso miidhese worgeesiti uddi hay'e e worgusesi ye e bishanako.

⁶Ye usitini kaayo be zeere agunniti giddaaka iray bukkuwannike afa tuceshe yeydiwo waaxe suuxukaaka arxeseni maaqqe be worge woggaaka uddi saha garani be bishana bishana yese deexho maddha oowese adeto keemako u keenge.

⁷Wonto woosso zeerdi u alsosi geede biixi bookowafa kese bo'oy usaara wolko e dargutte. Usoni e iiche, usoni e wodhe.

⁸U ahani u Laaxi essa suxhuttecho malla katama giddaaka ogiyaka undi e atte. Ye katamay Sodomiyara Gibxhiyara bisshushiko e zeerutte.

⁹Be biyyana biyyana yeseesitaafay, be ommana ommana yeseesitaafay, be nuunana nuunana zeereesitaafay, be wude wude yese axitaafay u aha haydzi wontaa badeysiko u beene. U mooguttuwannikeni u tucutte.

¹⁰Ye lam'i kaayaxiti ha saha gara yese axita waayye beysiya yechashe u maaqicho gisha axi uddi u gara ella basuna maggako u magge, massalani naddhi woluseni ingo u inge.

¹¹Haydzi wontaa badeydi itto geedema yeso inge kaxi Wontokofa yoodi usuka e gello. Usini dendi be tokena u eedho. Uso beya yecha axiti orjena u jhassho.

¹²Ye e geede afaafa <<Wokke hana kesuwayte!>> yeydi hine malla kato u siido. U iilaxiti beesune dhumaanna dhaddi afaa u kesso.

¹³Yenniyani orjena sahay en'o, katamase e tanxo kuchey baado, laappi kuma axi haydho. Attaasitini iitana jhashe u ayto. Afaase Wonto kedda kedda u hisso.

¹⁴Lakkunxo deexho maddhay gardiko yese, hay, haysso deexho maddhako ukke yoonesa.

¹⁵Laappunxo woosaxi maracho uydo. Afaakani <<Saha kaatetey nu Laaxi Wontosaara e Mesihesaara maaddhiko e yese. Esini koolo koolo makkinako e kaate>> yeydi keddaydi zeereesiti kato ta siido.

¹⁶Wonto buro kaati uttuxiti gara uttecha lam'i tamma oyddi cimiti be deemona undi Wontose u disso.

¹⁷Usini <<Buroni yechayo, yeseyo, uddi base danda'e Laaxe maaqe Wonto! Keddaydese ne adetona go'utti ne kaatto gisha nemba galatako nu galate.

¹⁸Ayhuda maaquwa axiti huullo, ne huula woggani ello. Haydhi yeseesiti gara ne yaa'e woggani ello. Ne maalita maaqe kaayaxitusaara haylaxitusaara ne sunxe kuxeesitusaara, baraxhitusaara anguzaxhitusaara u moore ne inge wontay e ello. Saha baysechaashita ne bayse woggay ello>> yeydi u hido.

¹⁹Afaaka yese Wonto Hayla Zaway e do'utto. E caaqo taabootey ye Wonto Hayla Zawaa beyutto. Zeelunxi zeelundo, didunxi didundo, googunxi googundo, sahay en'o, iitana malla malla maaqe shachi butto.