Read koorete Yohanise Haraje 15 Bible Online

Yohanise Haraje 15 - koorete bible

Yohanise Haraje 15

¹Fede yerago assi afaaka keddaydesesaara micusheshaara ta beedo. Aallicirase maaqe laappi deexho waayye aytese laappi woosaxita ta beedo. Aallicira hidi u hiyuttosi ye esuna Wonto huulay ee'e gishako.

²Tamaara worqutti hade daw'atake maaddhese bagadeke yesesa ta beedo. Bo'oni, ye bo'o bisha naddhi gaddesoosani, ye bo'oy esuna erutte sunxi taafoni iishaashiti Wontoy ususe indo zimbeke yesesa ayti hade daw'atake maaddhese bagade da'aa ee'iyaka u yecha.

³Wonto maala maaqe Musesaara dorusaara maaqe zingale zingalisine <<Uddi base danda'e Laaxe maaqe Wonto! Ne hantay mallaara micusheshaarako. Be wude wude yese axiti kaato! Ne ogey gizowara aadiyarako.

⁴Laaxo! Niya jhashuwassaara niya kuxuwasaaray oonewa? Ye esini haylay nembawoko, aade maaqe ne yaa'ay addeydo gisha be wude wude yese axiti uddi yoodiko ne buro u disse>> yeydi u zingallo.

⁵Ye e geedeni assi ta beedo. Hay, afaaka yese Wonto Hayla Zaway ye esini ato maaqe maa'o zaway do'utti e yecha.

⁶Laappi deexho waayye aytese laappi afaase woosaxiti Wonto Hayla Zawaafa u kesso. Usini geejjhi laci lacidi faqe maa'o maadhi worqiyafa hantuttese hade sabbatake yesesa be fenga gara xhaaxhesesa u maaqicha.

⁷Ye e geedeni oyddi en'a meddhitaafa bidzi koolo makki aallo yese Wontoy huullo huulay essaaka kundi yese worqiyafa hantuttese essaa ushusho laappi quule laappi woosaxituse e indo.

⁸Wonto Hayla Zawani Wonto kuxa fuulafaara e osafaara kessa cuwwana e kundo. Laappi woosaxiti oodo laappi deexho waayyey aalloro aallo ooneni Wonto Hayla Zawa gelese dandadho baasso.