Read koorete Yohanise Haraje 16 Bible Online

Yohanise Haraje 16 - koorete bible

Yohanise Haraje 16

¹Ye e geede laappi woosaxituko <<Wonto huulay essaaka yese quulita etti handi ye huula yekke sahaaka gussuwayte!>> yeydi hine keddaydese kato Wonto Hayla Zawaafa ta siido.

²Acha woosaxi be quule etti handi essaa yechashe yekke saha gara e gusso. Bo'o yerago be gara keenge axiti garaara naqutti gaduttese bo'o bisha buro disse axiti garaara iitanaara orjenaara maddhunxe maday e bento.

³Lakkunxo woosaxi be quule etti essaa yechashe bagade gara e gusso. Bagadeni haydhese axi suuxe bishe suuxe e maaddho. Bagadiya yecha en'ay uddina haydho.

⁴Haysso woosaxi be quule etti essaa yechache shoorena hange waassakaara tultowakaara e gusso. Ye usitini suuxe maaddho.

⁵Waaxi gara adeto keenge woosaxi <<Yeseyo, yechayo, hayla maaqeyo! Ha esukeydi ne yaadho gisha neni gizoko.

⁶Haylaxitusaara kaayaxitusaara u suuxe u gusso gisha woddhasiti suuxe uso usshiko ne yese. Ha esini ususe bisheshako>> yeydi e hisune ta siido.

⁷Ye e geede kaasha e gara kaashushooshaafa <<Eewa, uddi base danda'e Laaxe maaqe Wonto! Ne yaa'ay aadiyara gizowarako>> yeydi hine kato ta siido.

⁸Oysso woosaxi be quule etti essaa yechashe qoossi gara e gusso. Qoossi axe be tamana meggoronike osay ingutto.

⁹Axitini orje tama michana u meggutto. Yeenxhi deexho waayye gara adeto keenge Wonto sunxe u casshosha baaka be cubbo dhaddi maaqutto baasso, Wontoni kuxutto baasso.

¹⁰Ichicho woosaxi be quule etti essaa yechashe bo'oy e gara utti kaatichoshi gara e gusso. Bo'o kaatetoy iitana ceendo. Axitini maddha iitetiyafa densi gaggo u qiicco.

¹¹Assi be maddha gishaara be mada gishaara afaaka yese Wonto u cashichosha baaka be hanto iita hanta dhaddi maaqutto baasso.

¹²Izzunxo woosaxi be quule etti essaa yechashe malla maaqe Efraxhise sunge waaxi gara e gusso. Qoossi kese badefa yoone kaataxhese ogey naquttesesa maaqorosa ye shoore waaxi mello.

¹³Dobessi asshaafaara bo'o asshaafaara zaadaxe maaqe kaayaxi asshaafaara koppe bishe haydzi tuna ayaaniti kesusune ta beedo.

¹⁴Ye usitini micushe abako hante xhoozitako. Ye haydzi xhooziti uddi base danda'e Wontose maaqe keddaydese yaa'a wontaa toorase u bhikkilorosa ha saha gara uddi yese kaataxheko u hando.

¹⁵<<Yebo, tani hade kaysokeko dedha ta yoone. Gunduse be maaquwanikiyara e gunduse axi beenesumiyara birti be maa'o maa'ese naddhi kakke axi suuzuttesesako.>>

¹⁶Ye xhoozaxhitini kaataxhe Ibrayste nuunana <<Armagedoone>> hidi sunge godo u bhikkillo.

¹⁷Laappunxo woosaxi be quule etti essaa yechashe agexi gara e gusso. Wonto Hayla Zawaaka yese kaati uttuxo godowafa <<Ittose!>> yeydi hine keddaydese katoy sinto.

¹⁸Ye e geedeni zeelunxi zeelundo, didunxi didundo, googunxi googundo, orjena sahay en'o. Axi ha saha gara meddhuttowafa ayti ye e bisha orje saha en'oy maaddhi eruwasso.

¹⁹Malla katamay haydze shahutto. Axiti essa yecho katamitini koolona baado. Wontoni malla maaqicha Babiloonese woggay isuse ellosa e masso. Hade weyne daanake yese keddaydese be huulay essa kundese miijhiyafa i ushoronike e mato.

²⁰Dhaaniti be uddina baado. Bakkitini be yecho godo dheeddo.

²¹Be bidzi bidzina oyddi tammi kiilo maaqe shachi axiti gara afaafa gutto. Ye deexho waayyey iitana maddhunxesa e maaqicho gisha axiti be gara unda shachi oodo deexho waayye gisha Wonto u cassho.