Read koorete Yohanise Haraje 18 Bible Online

Yohanise Haraje 18 - koorete bible

Yohanise Haraje 18

¹Ye e geede keddaydese adeto keenge Wonto woosaxi afaafa hodhusune ta beedo. E kuxa fuulay faqichoshaafa densi sahay e faddho.

²Keddaydese katona <<Be wude wude yese axi uddi weyne daana usshi hade goojhushonike isaara laggetona goojhiko u yese. Ha saha gara yese kaataxhey isaara wolko laggettiko u yese. Ha saha gara yese wondini zal'ini aqeesiti lagana i okkesossaafa densi woduma maaddhiko u yese. Ye e gisha malla maaqicha Babiloonni undonni, undonni! Xhoozi issaa yese godo maaddhonni, be bishana bishana yese tuna ayaaniti issaa yese godo maaddhonni, darrisesaara inxha'usesaara maaqe be bishana bishana yese kafiti issaa yese zawa maaddhonni!>> yeydi e hido.

⁴Fede katoni afaafa <<Ta axito! I cubboy handi afa aallo elli tuuluttinne Wontoni iita i hantechosha massese gisha i cubbowa gelli isuke cubbo hi hantowanikiyara yoone deexho waayye isaara hi shahuwanikiyara isukofa dhaddi kesuwayte.

⁶Isi hinuse hantonike hinuni isuse mati hantuwayte! I hanto hantase uddi dakkena mahuwayte! Isi hinuse gooshe usshe wor'i indonike hinunini isuse ye e dakkena inguwayte!

⁷Bemba i kussonikiyara bemba i okkesonikiyara maddhaara higilsaara isuse ye e makko mati i gara oowayte! Isini be muxhurowanna <Hay, kaate maaddhiko ta uttese, i adey baadese indo maaquwasso, higilsay fetto ta gara yoowasso> yeydiko i cee'utte.

⁸Ye e gisha laga deexho waayyeko bidzi wonta giddawo i gara ungesa. Hayboni, higilsani, naayeni isuko yootako e yoone, tamako iso meggesa. Ye esini i gara yaa'e Laaxe maaqe Wontoy osaxuko>> yeydi e hido.

⁹Isaara wolko laggetisine okketti yecha ha saha kaataxhey i megguttusune kese cuwwa be beene woggaa i gisha <<Ay uy!>> hidi hissineko u yeeke.

¹⁰Maddhumiya i yesesa beedi jhasshi zara ee'isine <<Neno malla katammiye, neno osaxi katama Babilooniye! Ne gara yaa'utte yaa'ay bidzi saate giddawo e yoodo gisha yoona yiy, yiy!>> yeydiko u hine.

¹¹Ha saha gara yese woondini zal'ini aqeesiti u abakita ha e geede woongesi ooneni baa gisha isuse u yeeke, u higile.

¹²Worqiyafa birriyafa kuxuttese be bishana bishana yese shushaafa naquttesesa, talbaafani maaqqe haariyafani meddhuttese maa'o, suuxe bishe maa'o, zodhaankeydese maa'o, be bishana bishana yese sawwe mixe, zakka gaggowafa naquttese be bishana bishana yese abakita, laakaafani maaqqe qangaafa, booxi shushaafani maaqqe e woomay keddaydese missaafa hantutte be bishana bishana yese miijhita,

¹³be bishana bishana yese kaxaa unge dhale, karawa, be bishana bishana yese ixhaanita, weyne daana, zayte, qiicutti littese dhiila, gossa, keemo, dorita, faradzita, gaarita, yeydiwo maalitaara fede lubbo keenge axitaara atto badi ye usita woongeesiti baasso.

¹⁴Woondini zal'ini aqeesiti <<Ne muxhuroy col'icho modhe abakiti uddi ne garafa dhaddi zardiko u baadese. Ne wodunteni maaqqe esuna ne waaricho abakiti uddi attiko yese. Ha e geede bentuttuwasso>> yeydiko iso u hine.

¹⁵Ye katamaaka woomani zal'ani hissine wodundaasiti i maddhungeniya beedi jhasshiko zara u ee'e. Yeekisiniyara higilisiniyara

¹⁶<<Talbaafa hantuttese suuxi bishaara zodhaankeydesesaara maaqe maa'o e woomay keddaydesesa maa'isine yechanni worqenaara kuxuttese be bishana bishana yese shuchunaara be gara waarusicha malla katammiye, yiy! Yiy!

¹⁷Ye e genni wodunteko bidzi woggaa baada>> yeydiko u yeeke. Markabe durkeesita maaqeesiti uddi, markabena hangeesiti uddi, markabe gara hanteesiti uddi, bagadiyafa degessi ye esuna aqeesiti uddi zara eedhi

¹⁸ye katamay megguttusune kessa cuwwa be beedo wogga <<Ha malla katamay yechonike yecha katamay fetto feday yesa yese?>> yeydi be kato keddaysi u hido.

¹⁹Be qinowa xhuure ucci yeekisiniyara higilsiniyara <<Bagade gara markabe keengeesiti uddi be woduntena i wodunsecho ha malla katamay bidzi woggawo i baado! Yiiy! Yiiy!>> yeydi hissine u yeetto.

²⁰Afaa yeseesito, haylaxito, anxuttaasito, kaayaxito! Wontoy hinume hissine i gara e yaadho gisha magguwayte!

²¹Ye e geedeni bidzi osaxe maaqe Wonto woosaxi malla woxha bishe shuche bagadiya dakkisine <<Ha esukeysiko malla katama Babilooney osana i dafutte, sekkeni bentuwanniko.

²²Zimbe bisheeshuna kaa'eesiti kaassi, zingaleesiti zingaley yeydiwo shuushuliyara marachowara uwweesiti katoy sekke neeka sintuwasso. Be kuchena be bishana bishana yese hanta hanteesiti sekke neeka bentuwasso. Woxhay gaace katoy sekke neeka sintuwasso.

²³Faqeni sekke neeka faquwasso. Ekkesi katowara gelenni katowaray sekke neeka sintuwasso. Yeydi e maaddhosini neeka woondini zal'ini aqeesiti ha saha gara malla axitako u maaqicha. Maaquttuwaye baaka ne qayena be wude wude yese axita uddi halussiko ne yese.

²⁴Neekani kaayaxiti suuxaara haylaxiti suuxaaray ha saha gara wodhutta axiti suuxi uddiko e bento>> yeydi e hido.