Read koorete Yohanise Haraje 19 Bible Online

Yohanise Haraje 19 - koorete bible

Yohanise Haraje 19

¹Ye e geede afaaka laga axiti bidzi katona uynesa bishe kato ta siido. Usini <<Haleluya! Wontoy be axita loollusiko e yese. Kuxa fuulay esuse maaddhiko e yese, be osanani hantiko e yese.

²Ye esini e yaa'ay aadiyara gizowarako. Laggetona saha tunusecha malla maaqicha zaakoyndo gara yaadhiko e yese. E maalita i woddho gisha u suuxe matiko e yese>> yeydi u hido.

³Sekkeni <<Haleluya! Cuwway issaafa koolo koolo makki aalloko wokke e kese>> yeydi u hido.

⁴Lam'i tamma oyddi cimitaara oyddi en'a meddhitaaray kaati uttuxo gara uttiya yese Wonto buro undi <<Ameen, haleluya!>> yeydi hissine u disso.

⁵Ye e geedeni <<Hinuno Wonto maalito, baraxhitaara anguzaxhitaara maaqeesito, hi uddina esa jhasheeshito! Nu Wonto keddaysuwayte!>> yeydi hine katoy kaati uttuxo googiyafa e sinto.

⁶Ye e geedeni hade laga axiti bidzi katona uyne katoke yesesi, hade malla waaxi tonohe ooshuke yesesi, hade iitana googunge googunxi katoke yesesi <<Uddi base danda'e Laaxe maaqe ni Wontoy kaatti yese gisha haleluya!

⁷Dori kuulay elli yese gisha e ekkenini bemba naddhi yese gisha nu maggoose, ililli nu hiyyeese, esani nu kuxxoose.

⁸Geeshaara laci lacidiyara hinesa talbaafa meddhuttese maa'o i maa'oronikeko isuse e ingutto>> yeydi e hido. Talbaafa meddhuttese maa'oy haylaxiti hanto gizo hantako.

⁹Woosaxini << <Dori kuulase maaqe qametese xheyguttaasiti suuzuttesesako> yeydi diizuwa>> hidi tamba e hido. Sekkeni assi <<Ye usiti Wontoy oto aade maaqe katitako>> yeydi taako e hido.

¹⁰Tanini esuse dissese e buro ta undo. Esimay <<Dhagguwa! Wontosewo baaka taase dissofuna! Tanini hade neenkiyara hade Yesuusay adduso aade minsi ayti ohe fede aadexeesitukiyara yese Wonto maalako. Yesuusay adduso aadey kaayaxiti kaayo zeeroronike mahe Wonto Ayaanako>> yeydi taase e hido.

¹¹Ye e geedeni afay do'utti yesune ta beedo. Bidzi booxi faradzey yaaka e yecha. Ye faradze garani <<Muxhuraxaara Aadaxaara>> hidi hiyuttesi uttiya e yecha. Gizo ogenako e yaa'e, gizo ogenako e dargutte.

¹²E aafeni hade tama looxheke faqesako e maaqicha. E qinowani kaatuse gadutte laga gullitako yecha. Esa baaka ooneni eruwa sunxuko e gara diizutti yecha.

¹³Esini suussaa gellese maa'oko e maadhese, e sunxini Wonto Katoko.

¹⁴Booxi faradziti gara utteseesiti talbaafa meddhuttese booxe maaqe geeshi maa'o maadhese afaaka yese tooraxiti e geede hamiya u yecha.

¹⁵Be wude wude yese axita esuna e cade nuunaxe maaqe satatay e asshaafa kesso. Esini qanga kallonako axe e ahe. Uddi base danda'e Wontoy u gara be huuleesita waake e hisesa beyse weyne daanay essaa cicutte godoko weyne e dorbe.

¹⁶E maa'o garaara e fashane garaara <<Kaataxhese u kaate, laaxituse u Laaxe>> yeydi hine sunxi diizutti e yecha.

¹⁷Ye e geedeni qoossuka eedhese bidzi woosaxe ta beedo. Esini wona afaanna hange kafituko <<Wonto qamete maaqe malla tato gara yoodi bhikkiluttuwayte!

¹⁸Kaataxhe acho, toorase afana maagiti acho, osaxe maaqe tooraxiti acho, faradze achoni maaqqe faradziyaditi acho, maaliti achoni maaqqe maala maaquwasiti achoni, baraxhe achoni maaqqe anguzaxhe acho oone achoni yoodi muuwayte!>> yeydi be kato keddaysi e hido.

¹⁹Ye e geedeni bo'owara ha saha kaataxhitaaray yeydiwo u tooraxitini booxi faradze gara uttiya yesesaarani maaqqe e tooraxitaara darguttese bhikkilutti u yesune ta beedo.

²⁰Bo'oni aykutto, buro bo'o sunxuna laga micushe abako hanticha zaadaxe maaqe kaayaxi e aykutto. Be hanto micushe abakona bo'o yerago be gara keengeesitaara naqutti gaduttese bo'o bisha buro disseesitaara e haluxicha. Ye lam'i orjena eexhe dine hidi hiyutte abakona megge tama bagadiyaka be lubbowara yesine u dafutto.

²¹Atta tooraxitini assi faradze gara uttesi asshaafa kese satatana u haydho. Kafitini uddi u acho muudi missho.