Read koorete Yohanise Haraje 2 Bible Online

Yohanise Haraje 2 - koorete bible

Yohanise Haraje 2

¹Efesoone yese Wonto zawase maaqe Wonto woosaxuko ha ta ohesa diizuwa: Laappi xhoolinte be kuchiya aytesesaara faqey e gara gadutte laappi abako giddaaka sekke hanke hantesaaray e ohesi ha esako. Ye esini

²<Ne hanto hantani maaqqe hantana ne gattosani yeydiwo ne danda'oni erako ta ere. Iita axita beesine ne dhaddo baannike erako ta ere. Anxuttaasita be maaquwasa <<Nuni anxuttaasitako>> yeydi hineesita uso modhussi arsi beedi zaadaxita u maaqenike ne degessonike erako ta ere.

³Assini danda'ona ne miindonikiyara ta sunxi gisha maddhay ne gara yoodonikiyara erako ta ere. Haanxhina uddi gatto baannako.

⁴Yeydi e maaddhakoni nemba ta haasse bidzi zeereko yesa. Ye esini zage ne keengicho eeha dhaddiko ne yese.

⁵Ne ungeesume buro aya ne yechosha gaxhuwa! Ne cubbo dhaddi maaquwa. Zage ne hantichonike hantuwa. Yeysi mahe ne dheeba'ayko neeko yoodiko ne faqey e gara gaduttesa e godowafa ta ooxe.

⁶Yeydi e maaddhakoni nemba ta galate basuko bidzi yesa. Ye esini ta inxha'e Niqolaxiti hante iita hanta nenini inxha'iyako ne yese.

⁷Ayaanay be godowa godowa yese Wonto zawaxituse ohesa washe keengesi naddhi siwwaye. Iishashi Wonto gannatiyaka yese yesoy esukofa bente mixi aafe miyese e danda'oronikeko ta mahe> yeydiko e hine.

⁸Samirneese yese Wonto zawase maaqe Wonto woosaxuko ha ta ohesa diizuwa: Achaara aalliciraara maaqesaara haydhi yechine en'a maaddhasaaray e ohesi ha esako. Ye esini

⁹<Ne maddhaara ne jhi'etiyara erako ta ere. Jhidhakoni neni wodumako. <<Ayhudaxitako nuni>> yeydi hineesiti ne sunxe u baysonike erako ta ere. Ye u bade durkesi Humbayeko baaka Ayhudaxita maaquttuwasso.

¹⁰Buro gara ne gara yoone maddha jhasshofuna. Naa'utti ne beyuttoronikeko Humbayey hinukafa bidzi bidzita tufe zawaaka e gelse. Tammi wonteko maddhay hi gara e yoone. Haybose aandi niya e elluse aallo ne godowafa arto badi ee'uwa. Ne ee'a'ayko neese yeso maaqe mooreko ta inge.

¹¹Ayaanay be godowa godowa yese Wonto zawaxituse ohesa washe keengesi naddhi siwwaye. Iishashe lakkunxo hayboy fetto esa miidhuwasso> yeydiko e hine.

¹²Phergamoone yese Wonto zawase maaqe Wonto woosaxuko ha ta ohesa diizuwa: Lam'i badena nuuna keenge satata nuunaxe aytesesi e ohesi ha esako. Ye esini

¹³<Tani ne yesoy aya maaqesa erako ta ere. Ye godoni Humbayey essaaka kaatese godoko. Yaha ne yessakoni ta sunxe minsi aytiko ne yese. Humbayey essaaka yese ne katamaaka muxhuraxe maaddhi ta gisha ohicha Antiphaase woddho woggaaka fetto ne aadexo dhaddo baannako.

¹⁴Yeydi e maaddhakoni nemba ta haasse zeereko bidzi bidziti yesa. Ye esini Baalaame erunxe aytese bidzi bidzi axitako hi gidda yesa. Baalaameni Isra'eelaxiti Wonto maaquwasituse kaashutta kaasha miyenaara laggetenaara u dhumuttoronike e mahorosa Baalaqe erusasuko.

¹⁵Yeydiwo Niqolaxiti erunxe aytese axitako hi giddaaka yesa.

¹⁶Ye e gisha ne cubbo dhaddi maaquwa. Maaqe ne dheeba'ayko ukkenawo neeko yoodiko ta asshaafa kese satatana uso ta darge.

¹⁷Ayaanay be godowa godowa yese Wonto zawaxituse ohesa washe keengesi naddhi siwwaye. Iishashushe aachutti yese mannaafako ta inge. Kille sunxi e gara diizuttese booxi shuchuko ta inge. Ye esa ekkesawo baaka ye sunxe ooneni eruwasso> yeydiko e hine.

¹⁸Tiyaxhirone yese Wonto zawase maaqe Wonto woosaxuko ha ta ohesa diizuwa: Hade tama looxheke faqe aafiyara hade tamaa gelli geeshe maaddhi laci laci hine laaka bishe tokiyara keenge Wonto yeley e ohesi ha esako. Ye esini

¹⁹<Ne hantani, ne eehani, ne aadexoni, Wonto ne aadexe gisha ne hanto hantaara ne danda'owara erako ta ere. Assiwo buro ne hantoosume hatteni garsi ne hantenike erako ta ere.

²⁰Ye e bisha ne maaddhakoni nemba ta haasse bidzi zeereko yesa. <<Tani kaayaxuko>> yeydi hine ye indo Elzabeele mikkewo beedi iso dhaddiko ne yese. Isini taase hantichaashiti laggetoronikiyara Wonto maaquwasituse kaashutta kaasha kaxa u miyoronikiyara erusena halusiko i yese.

²¹Isini be cubbo dhaddi maaqoronike wogga isuse indiko ta yese. Isimay be laggetowafa maaqe wordo baanniko.

²²Hixiyako yesine hargena waayye i beyoronike ta mahe. Isaara wolko be hanto iita hanta dhaddi maaqe u dheeba'ayko isaara wolko laggetaasiti gara keddaydese maddhako ta olle.

²³I naysheni wodhako ta wodhe. Yenniyako be godowa godowa uddi yese Wonto zawaxiti axi muxhurowara axi maxowara naddhi arsi beenesi tamba e maaqenike u ere. Hi bidzi bidzise hade hi hantakeysi ta inge.

²⁴Ye usitaafa atta Tiyaxhirone yesine ha iita erunxe worguwa hinuse uddi <<E eray axi e aallicira erese danda'uwa malla maaqe Humbaye era>> yeydi hiyuttase erdo baa hinuse <<Fede idda hinumba iddusuwasso>> hidiko ta hine.

²⁵Yeydi e maaddhakoni ta yoone aallo hi keengesa minsi aykuwayte.

²⁶Iishashushe ta hantani aallicira makko alsesuse nuwade garafa adeto ta ettonikeko be wude wude yese axiti gara adeto ta inge. Esini qanga kallonako uso e ahe. Hade sahaafa meddhutta miijhekeysiko e wodhe.

²⁸Assi wontaso kese bakalchako esuse ta inge.

²⁹Ayaanay be godowa godowa yese Wonto zawaxituse ohesa washe keengesi naddhi siwwaye> yeydiko e hine.