Read koorete Yohanise Haraje 20 Bible Online

Yohanise Haraje 20 - koorete bible

Yohanise Haraje 20

¹Ye e geede biixi booko do'ese qulfiyara malla sansalatiyara be kuchiya aytese woosaxi afaafa hodhusune ta beedo.

²Esini dobesse ayti bidzi kuma bera aallose e tutto. Ye dobessini <<Dabiloose>> oo'oyne <<Humbaye>> hidi hiyutte olo shooshuko.

³Bidzi kuma beray aaloro aallo ha e geede sekke be wude wude yese axita e haluxuwannike woosaxi dobesse biixi bookowa datti e suma tucci e goozzo. Ye beriti itto geede oddhe woggase birchutteko esa e worguse.

⁴Ye e geede kaati uttuxita ta beedo. Ye kaati uttuxiti gara uttesesiti yaa'oronike ususe adetoy e ingutto. Assini Yesuusa gisha u otosunaara Wonto kato u otosunaara u baalay burdine haydha axiti leemo ta beedo. Ye usitini bo'oseni maaqqe naqutti gaduttese bo'o bisha buro dissutto baasso. Be deemowani maaqqe be kuche gara ye bo'o yerago gadutto baasso. Usini en'a maaddhi dendi Kristosaara wolko bidzi kuma bera aallo u kaatto.

⁵Ye esini acha haybowafa denxoko. Haydhecha fediti bidzi kuma beray ittoro makko haybowafa dendutto baasso.

⁶Acha haybo denxose shahaxe maaqeesiti suuzutteseesitaara haylitaarako. Wontosaara Kristosasaara kahineko u maaqe. Kristosaarani wolko kuma bera aalloko u kaate. Lakkunxo hayboni u gara adeto keenguwasso.

⁷Bidzi kuma beray itto geede Humbayey tufiyafa e birchutte.

⁸Saha wosula aallo be wude wude yese axiti be uddina ye usitini Gogiyara Maagogiyara halussi toorase essesuko e kese. U taafoni hade bagade nuuna yese manchake yesesako.

⁹Usini ha saha aakete aallofa alsi yoodi haylaxiti yese godo eehuttese katama u gooddo. Googuttuwaye baaka tamay afaafa hodhi uso maxxhi muudo.

¹⁰Uso halussi yecha Humbayey bo'owara zaadaxe maaqe kaayaxaaray dine hidi hiyuttesaara tamaaray essaaka yese orjena megge tama bagadiya u yese godowa e dafutto. Usini qamaara wontaara koolo makki aallo yaaka u maddhunge.

¹¹Ye e geedeni booxaara mallaara maaqe kaati uttuxowara e gara uttesesaara ta beedo. Afaara sahaaray e burofa dhaddi badho. Godoni ususe bento baasso.

¹²Haydhechaashita anguzaxhitaara baraxitaaray kaati uttuxo buro u ee'usune ta beedo. Fissharitini do'utto. Fede fissharoni do'utto. Ye esini en'a yeseesiti sunxi essaa diizuttese yeso fissharoko. Fissharowa u hantay diizuttesenike haydhechaashiti gara Wontoy e yaadho.

¹³Bagadeni beeka haydhi yechaashita kessi e indo. Haybowara Si'ooliyaray beeka haydhi yechaashita kessi u indo. U bidzi bidzina u hantake hantakeysi Wontoy u gara e yaadho.

¹⁴Ye e geede haybowara Si'ooliyaray tama bagadiya u dafutto. Ye tama bagadey lakkunxo hayboko.

¹⁵E sunxi yeso fissharowa diizutti bento baasi ooneni tama bagadiyaaka e dafutto.