Read koorete Yohanise Haraje 21 Bible Online

Yohanise Haraje 21 - koorete bible

Yohanise Haraje 21

¹Buro afaara buro sahaarani yeydiwo bagadeni baado geede kille afaara kille sahaara ta beedo.

²Hayla maaqe katamay kille Yerusaleemey hade ade gelese naqutti waardese bushoke afaafa Wonto da'aafa yekke e hodhusune ta beedo.

³Orje katonani kaati uttuxo googiyafa <<Wonto yesoy axi giddaakako e maaqe, usaarani wolkoko e yese, usini e axitako u maaqe. Wontoni beese usaara wolko yesine u Wontoko e maaqe.

⁴U aafunxeni uddi u aafiyafa e uce. Buro yecha sahaara e wogaaray gardi yese gisha axi ha e geede sekke hay'uwasso, higiluwasso, yeekuwasso, waayye beewasso>> yeydi e hisune ta siido.

⁵Kaati uttuxo gara uttichashini <<Hay, uddi basuko kille ta mahe>> yeydi e hido. Sekkeni assi <<Eezo keenguwasaara aadiyara e maaqe gisha ha ta otosa diizuwa!>> yeydi tamba e hido.

⁶Ye e geedeni assi <<Ittosso! Achaara aalliciraaray[4] burosaara geedesaaray tambako. Sazzi yeseesuse yeso waaxi tultowafa wooma keenguwasa mikkeko ta inge.

⁷Iishashi yeenxhoko uddi e ekke, esuseni Wonto ta maaqe, esini ta yele e maaqeydiko.

⁸Yeydi e maaddhakoni jhasheeshiti, aadexuwasiti, tunaxiti, axe wodheesiti, laggeteesiti, qayeesiti, Wonto maaquwasa wonto mati kuxeesiti, yeydiwo zaadaxiti be uddina u tagoy dine hidi hiyuttesaara tamaaray essaaka yese orjena megge tama bagadiyaakako e maaqe. Ye esini lakkunxo hayboko>> yeydi taase e hido.

⁹Aallicira laappi waayyey essaaka kundese laappi miijhe ayti yecha laappi woosaxiti giddaafa bidzi taako yoodi <<Yoowwa! Dore gelese bemba naddhesenniyoko nemba ta beyse>> yeydi e hido.

¹⁰Ye e geedeni Wonto Ayaanay harajena ta beyoronike taa mati yesune ye woosaxi tamba orje bakka gara etti e kesso. Hayla maaqe katama Yerusaleemey afaafa Wonto da'aafa e hodhusune tamba e beyso.

¹¹Ye Yerusaleemeni Wonto kuxa fuulana faqiya e yecha. Faqiya e yese faqe modhetey hade iyasphidiyafa bente keddaydi kuxuttese shuchukiyara hade modhe daw'atakiyara moddhi faqesa e maaqicha.

¹²Ye katamani malla maaqe afaa galalese shuchi qeyshe e keengicha. Tamma lam'i sumani e keengicha. E sumittaani tamma lam'i woosaxiti ee'iya u yecha. Ye sumiti garani tamma lam'i Isra'eele ommiti sunxi diizutti e yecha.

¹³Oshichi bade haydzi suma, hadursi bade haydzi suma, afa bade haydzi suma, oomo bade haydzi suma e keengicha.

¹⁴Ye katama qeyshi e gara be ee'e tamma lam'i shuche e keengicha. Ye shuchiti garani doruse maaqe tamma lam'i anxuttaasiti sunxiti diizutti e yecha.

¹⁵Taara wolko zeeriya yecha woosaxini katamaara e sumaara yeydiwo shuchi qeysheni esuna be makke worqe kallo e keengicha.

¹⁶Katamase e galaltey e aaketey wol genniyowo maaqisine oyddi badena wol makko e maaqicha. Esini ye katama be kallona e matto. E galalteni e mattine lam'i kuma oyddi xhiixi kiilo meetire e maaddho. E aaketeni afaa e galalteni ye e genniyowo e maaddho.

¹⁷Ye woosaxini shuchi qeyshe e matto. Esuna e makkicho eruttese makkona laappi xhiixe oyddi tamma oyddi kurmayle aallo e maaddho.

¹⁸Ye katama qeysheni iyasphide sunge seelo shuchuna keeluttesesa e maaqicha. Katamani modhe daw'ata bishe fettona geejheshe worqewo e maaqicha.

¹⁹Katama qeyshi e gara eedhese shuchi be bishana bishana yese e woomay keddaydese seelose maaqe shuchuna bishushuttesesa e maaqicha. Buronasi iyasphide, lakkunxoy sanfere, hayssoy kelqedoone, oyssoy maragade,

²⁰ichichoy sardonikise, izzunxoy sardiyoone, laappunxoy kristiloobe, hazzunxoy birille, oddunxoy waraware, tanxoy krisobhirase, tamma bidzunxoy yaakinte, tamma lakkunxoy ametestinoose yeydi e maaqicha.

²¹Tamma lam'i sumay be bishana bishana yese tamma lam'i seelose maaqe shuchuko e maaqicha. Bidzi sumay bidzi seelose maaqe shushaafawo eedhesesako e maaqicha. Katama ogey hade daw'atake fo'e garxesa iitana geejheshe worqewo e maaqicha.

²²Uddi base danda'e Laaxe maaqe Wontowara doraaray ye katamaaka uddi godowa hade Wonto Hayla Zawaaka be kuxuttichonike u kuxutte gisha ye katamaaka hayla zawa tani beedo baasso.

²³Katamaseni Wonto kuxa fuulay faqicho gishaara dori ye katama faqe maaqe gishaara qoossini oo'oyne agunnay faqorosa worgusuwasso.

²⁴Be wude wude yese axitini ye katama fo'enako sekke hanke u hante. Saha gara yese kaataxheni kuxa fuula ingicha wodunte etti u yoone.

²⁵Yaha qamay baa gisha e gasay aba wonteni aykuttuwasso.

²⁶Be wude wude yese axiti kuxaara kuxa fuulaara beese ingicha wodunte ye katamaaka etti u oone.

²⁷Darrise abako hanteesitaara zaade zeereesitaaray abani tuna maaqesi be uddina ye katamaa geluwasso. Geleesitimay doruse maaqe yeso fissharowa e sunxi diizutteseesitawoko.