Read koorete Yohanise Haraje 22 Bible Online

Yohanise Haraje 22 - koorete bible

Yohanise Haraje 22

¹Ye e geede woosaxi Wonto uttuxowara dori uttuxowara maaqe godofa kessiyaka yese hade daw'atake laci lacidi faqe shoorena hange yeso waaxe tamba e beyso.

²Waaxini ye katama aako oge giddaanna e hangicha. Ye waaxuse e hadursi badeni e oshichi badeni yeso inge mixi e yecha. Agunnana agunnana kaxhisine bidzi bera tamma lam'i wogga aafe e kaxhicha. Ye mixi washeni be wude wude yese axita e loolusicha.

³Ha e geede sekke Wontoy aaceshi ye katamaa baasso. Wontowara doraaray utti kaatesi ye katamaani e maaqe. E maalitini esa yaha u kuxe.

⁴E aafushani u beene, e sunxini u deemowa e diizutte.

⁵Ye e geede sekke qamay baasso. Laaxe maaqe Wontoy ususe faqe gisha faqey beyse fo'iyara qoossi inge fo'iyara worgusuwasso. Koolo makki aalloko u kaate.

⁶Ye e geedeni woosaxi taako <<Ha ohuttasi eezo keenguwasaara aadiyarako. Kaayaxiti kaayo beedi zeeroronike mahe be Ayaana kaayaxituse inge Laaxe maaqe Wontoy ukke maaqe abako be maalita be beysenike be woosaxe ansiko e yese>> yeydi e hido.

⁷Yesuusani <<Yey, tani ukkeko yoone. Ha fissharowa ohuttese kaayo kakkesi suuzuttesesako>> hidi e hido.

⁸Haanxhi zeere siidasaara beedasaaray tambako Yohanise. Ye esa ta siidoniyakaara ta beedoniyakaara haanxho tamba beysa woosaxuse dissese e buro ta undo.

⁹Ye woosaxini <<Dhagguwa, yeysi matofuna! Tanini neerani maaqqe neyndo na'axhita maaqe kaayaxitaara yeydiwo ha fissharowa ohuttase kakkeesitaara uddi e maalako. Wontosewo dissuwa>> hidi e hido.

¹⁰Sekkeni taako ohisine <<Woggay ellese gisha ha fissharowa ohuttese kato eruttese e danda'uwannike ha fissharo tuccofuna.

¹¹Ha e geede yoona iita hante axiti iita hantisine yesuwaye, tunaxi tuna hantisine yesuwaye, gizo axi gizo hantisine yesuwaye, haylaxini hayla maaqisine yesuwaye!>> yeydi e hido.

¹²<<Yey, tani ukkeko ta yoone. Axuse e bidzi bidzina e hanto hantakeysi ingese e wooma ettiko ta yoone.

¹³Achaara aalliciraaray[5], burosaara geedesaaray, denxowara alsowaray tambako.

¹⁴Katama sumaanna gelesaara yeso inge mixi aafe miyesaara <Ha axuse bishako e bishe> yeydi be hiyuttoronike be maa'o shotaasiti suuzutteseesitako.

¹⁵Tunaxiti, qayaxiti, laggeteesiti, axe wodheesiti, Wonto maaquwasa wonto mati kuxeesiti, zaade eeheesitaara be hantanaara be zeerenaara zaaddeesitaaray uddi katamame wudeko u atte.

¹⁶Tani Yesuusay be godowa godowa yese Wonto zawaxita maaqe hinuse ha esita e ohoronike afaase ta woosaxe ansiko ta yese. Tani Dawite xhabhowafa mudhasaara e fira fiixhaafa yeluttasaarako. Laci lacidi faqe wontaso bakkalchay tambako.>>

¹⁷Ayaana Geeshaara gelenniyaray <<Yoowwa!>> hidiko u hine. Siinesini <<Yoowwa!>> hidi hiwwaye! Waaxe sazzasini yoowaye! Worgesini wooma shando badi yeso inge waaxe mikke etti ushuwaye!

¹⁸Hay, ha fissharowa kaayaxuna ohutta kato siine axituse uddi <<Ooneni ha kato gara bidzoni e kosa'ayko ha fissharowa diizutti yese deexho waayyeko Wontoy e gara e oone. Ooneni ha kaayo fissharowa diizutti yese katowafa bidzoni e facusha'ayko ha fissharowa diizutti yese yeso inge missaafaara hayla maaqe katamaafaarako Wontoy e tago e facushe>> hidiko ususe minsi ta ohe.

²⁰Ha esa yeydi ato maaddhi ohiya yesesi <<Eewa! Ukkeko ta yoone>> hidiko e hine. Ameen, Laaxi Yesuusa yoowwa!

²¹Laaxi Yesuusay axuse keenge maxo modhetey aadexeesitaara uddi wolko maaquwaye. Ameen.