Read koorete Yohanise Haraje 4 Bible Online

Yohanise Haraje 4 - koorete bible

Yohanise Haraje 4

¹Ye e geedeni hay afaaka do'uttese suma ta beedo. Bidzi zeerusune ta siido. Esini buro taa zeerusecha hade marachi katoke yesesa e maaqicha. Esini <<Yoodi hana haya kesuwa! Ha e geede maaqe abakitako nemba ta beyse>> yeydi e hido.

²Yenniyawo Wonto Ayaanay tamba haraje ta beyoronike e mato. Afaaka kaatuwoy e gara uttichosha ta beedo. Ye e garani uttesi e yecha.

³Ye uttuxo gara uttichashi bishay hade e woomay keddaydese seelose maaqe shuchiti iyasphidiyara serdesiyaray faqenike e faqicha. E uttesi googe maragadeke laci lacidi faqe iraxhi maashay e yecha.

⁴Yeydiwo ye kaati uttuxo googiya lam'i tamma oyddi kaati uttuxiti u yecha. Ye uttuxiti gara booxi maa'o maadhi yese u qinowa worqiyafa naquttese kuxase gadutte gulley gaduttese lam'i tamma oyddi cimiti uttiya u yecha.

⁵Ye uttuxowafa zeelunxini, didunxini, googunxini e kesso. Ye uttuxo buro laappi toompey faqiya e yecha. Ye laappi toompeni laappi Wonto Ayaanitako.

⁶Assini ye uttuxo buroni hade daw'atake maaddhese orjena geejheshe bagadeke hidesesi e yecha. Buronani geedenani aafey u gara kundese en'a meddhiti oyddi kaati uttuxo googe oyddi badena u yecha.

⁷Bidzunxo meddhoy garma e bishicha, lakkunxo meddhoy maydo e bishicha, haysso meddhoy axi aafusha bishe aafusha e keengicha, oysso meddhoy hamiya yese kooke e bishicha.

⁸Ye be bishana bishana yese oyddi meddhiti be bidzi bidzina izzuppi fange fange u keengicha. Wudenani zawanani aafey kundesesa u maaqicha. Wonta qama <<Hayla, hayla, hayla, yechayo, yeseyo, yooneyo uddi base danda'e Laaxe maaqe Wonto!>> yeydi burse baaka hiya u yecha.

⁹Ye meddhiti kaati uttuxo utti koolo makki aallo en'a maaddhi yesesuse e kuxa fuula keddaysi u nashicha, u kuxicha, u galaticha.

¹⁰Ye woggaa lam'i tamma oyddi cimiti kaati uttuxo gara uttesi buro deemona undi koolo makki aallo en'a maaddhi yesesuse <<Nu Laaxo nu Wonto! Uddi abakoko ne meddho. Uddi abakoy e meddhuttosaara yeso e degessosaaray neni <Maaquwaye!> yeydi ne hineko. Ha e gisha kuxaara kuxa fuulaara osaaray neese maaqese bishako e bishe>> hidi hissine be qinowa kuxase gadutte be gulle ye kaati uttuxo buro gaddi u dissicha.