Read koorete Yohanise Haraje 5 Bible Online

Yohanise Haraje 5 - koorete bible

Yohanise Haraje 5

¹Kaati uttuxo gara utti yesesi wudenani maaqqe zawana diizuttesesa laappi wogga goozesoosa xhaaxhuttese fissharo be oshichi kuchena ayti e yesune ta beedo.

²Bidzi osaxe maaqe Wonto woosaxe ta beedo. Esini keddaydese katona <<Goozuttese goossita birchesheni maaqqe fissharo do'ese bisshesheshi oonena?>> yeydi e hido.

³Afaakani maaqqe sahaaka sahase e oomona fissharo do'ese oo'oyne dodhi beyese bisshesheshi ooneni badiko yecha.

⁴Tanini fissharo do'ese oo'oyne dodhi beyese esuse e bisheshi ooneni badi yecho gisha iitana ta yeetto.

⁵Ye cimitaafa bidzi taako <<Yeetofuna! Hay, e ommay Yuuda maaqe garmay Dawite xhabhoy iisshiko e yese. Esi fissharo do'esaara laappi wogga goozesoosa bircheshaara danda'ako e danda'e>> yeydi e hido.

⁶Ye e geede ye kaati uttuxosaara ye oyddi meddhitusaara u giddaa cimituseni u feeqaa shufuttase bishe dori ee'usune ta beedo. Ye dori laappi ushumiyara laappi aafiyarako e keengicha. Ye usini ha saha gara uddi anxutta laappi Wonto Ayaanitako.

⁷Dori yoodi kaati uttuxo gara uttiya yechashi oshichi kuchiyafa xhaaxhuttese fissharo e etto.

⁸Ye fissharo e ettoniyaka oyddi meddhitaara lam'i tamma oyddi cimitaaray dori buro be deemona u undo. Be bidzi bidzina zimbe bishaara haylaxiti shi'e maaqe ixhaanena kundi yese worqe sanqiyara be kuchiya ayti u yecha.

⁹Usini kille zingale zingalisine <<Ne shufutto gishaara ne suuxuna axi be ommana ommana yesesaafa uddi, be nuunana nuunana zeeresaafa uddi, be biyyana biyyana yesesaafa uddi, be wude wude yese assaafa uddi, axita Wontose ne wozese gishaara fissharo etti laappi godowa goozuttesesa etti birchey neese bishako e bishe.

¹⁰Nu Wonto kaatetowaka gelli kahinita maaddhi u hantoronike matiko ne yese. Usini ha saha garako u kaate>> yeydi u zingallo.

¹¹Ye e geede assi ta beesune laga kumanaara aaca boocokeydi taabuttese danda'uttuwa Wonto woosaxiti kato ta siido. Usini kaati uttuxusaara oyddi meddhitusaara cimituseni u googiya gooddi u yecha.

¹²Keddaydese be katona <<Shufutta doruse adetowara woduntiyaray, gaxaara osaaray, kuxaara fuulaaray, galataaray esuse bishako e bishe>> yeydi u zingallo.

¹³Ye e geedeni afaakani maaqqe sahaaka, sahase e oomoni maaqqe bagadiyani ye usittaa yese meddhoy uddina <<Kaati uttuxo gara uttesesusaara dorusaara galataara fuulaaray, kuxaara osaaray koolo makki aallo maaquwaye>> yeydi u zingalusune ta siido.

¹⁴Oyddi meddhiti <<Ameen!>> hidi uydo, cimitini be deemona undi u disso.