Read koorete Yohanise Haraje 6 Bible Online

Yohanise Haraje 6 - koorete bible

Yohanise Haraje 6

¹Dori goozutti yecha laappi giddaafa bidzunxo goosse e birchushune ta beedo. Oyddi en'a meddhowafa bidzi hade googunxuke yese katona <<Yoowwa!>> hidi e hisune ta siido.

²Hay booxi faradze ta beedo. E gara uttiya yesesini dhozze be kuchiya aykiya e yecha. Esuseni kuxase gadutticha gulley ingutto. Iichesha maaddhi iicheshe e kesso.

³Dori goozutti yecha lakkunxo goosse birshoniyaka lakkunxo meddhoy <<Yoowwa!>> hidi e hisune ta siido.

⁴Fede tamake zodhese faradzey e kesso. Ye faradze gara uttesesuse modhete ha saha garafa e ooxoronikiyara axiti wola alsoronikiyara mahese adetoy esuse ingutto. Yeydiwo malla satatani ingutto.

⁵Dori goozutti yecha haysso goosse birshoniyaka haysso meddhoy <<Yoowwa!>> hidi e hisune ta siido. Hay faradze karxe ta beedo. Ye faradze gara uttesesi kaxa makkesa be kuchiya aykiya e yecha.

⁶Oyddi en'a meddho giddaafa kato ta siidosa tamba e bissho. Ye ta siido katoni <<Bidzi xhaasa gossay bidzi wonta hanta wooma, haydzi xhaasa bangay bidzi wonta hanta wooma maaquwaye. Zaytiyara weyniyarama dollofuna>> hidi e hisune ta siido.

⁷Dori goozutti yecha oysso goosse e birshoniyaka oysso meddhoy <<Yoowwa!>> hidi e hisune ta siido.

⁸Hay bidzi caametta faradze ta beedo. Ye faradze gara uttichashini haybo e sungicha. Si'ooleni e geede geedeydi hangicha. Haybowara Si'ooliyaray ha saha gara yese assaafa oysso kuche toorana, naayena, iita hargena, saha gara yese bo'ona u wodhoronike adetoy ususe ingutto.

⁹Dori goozutti yecha ichicho goosse birshoniyaka Wonto kato be oto gishaara esuse ato be maaddho gishaara wodhuttecha axiti leemoy kaasha e gara kaashushooshi oomo yesune ta beedo.

¹⁰Usini keddaydese katona <<Uddi base ne oomo ahe haylaara aadaxaara maaqe Laaxo! Ayde aalloni ha saha gara yese axiti gara ne yaa'uwaane? An wonte aalloni nu suuxi gano ne kessuwaane?>> yeydi u hido.

¹¹Ye e geede u bidzi bidzise booxi maa'oy ingutto. Ususeni <<Hinuke Wonto maalita maaqe saha gara yese fede haga wodhuttese yese hinindo nayshi hade hinuni wodhuttonike wodhutti u taafoy kumoro makko kaxe efiya hi yesenike oddhe woggase decuwayte>> yeydi u hiyutto.

¹²Ye e geede dori goozutti yecha izzunxo goosse birshoniyaka orjena sahay en'usune ta beedo. Qoossi hade karxi maa'oke e kar'o. Agunnani be kumena hade suuxuke e zodho.

¹³Keddaydese agexi mixe sekke hanke jhiggete kaxxho baa qum'ay mixi garafa hade gukkenike afaaka yecha xhoolintey sahaa e gutto.

¹⁴Afay hade harfa gara maa'o xhaaxhonike xhaaxhutti e gardo. Bakkitaara dhaanitaaray be bidzi bidzina be godo u datto.

¹⁵Ye e geede ha saha gara yecha kaataxhiyara afana maagitaaray toorase durkichashitaaray, wodumitini, osaxitini, maalitaara maala maaquwasitaaray googgitaakaara bakkita yese shuchi qoosshitaakaara u aachunto.

¹⁶Bakkitaara shuchi mallitaara <<Kaatese uttesesi burowafaara dori huulaafaara nu gara undi numba aachuwayte!

¹⁷Keddaydese u huula wontay yoodi yese gisha be qino maarese ooni danda'esa?>> yeydi u hido.