Read kumam Ageini 1 Bible Online

Ageini 1 - kumam bible

Ageini 1

¹I agege kakame Rubanga ocweo kede malo kede lobo,

²lobo oudo onyobere atatai abongo gimoro iye, doko colo oudo oumo pii atut, di yamo kame buko wok kibut Rubanga oudo beo ki wi pii.

³Di Rubanga oko waco be, “Poore lero bed tie”; di lero oko bedo tie.

⁴Di Rubanga oko neno be lero oudo ber; di en eko poko lero kede colo.

⁵Rubanga oko lwongo lero be “Iceng” di eko lwongo colo be “Iwor.” Piny oko yuto, odiko oko tuno, manono oko bedo ceng me agege.

⁶Rubanga oko waco be, “Gi koyarere miero bed tie i diere me pii, di eko poko pii kede pii.”

⁷Aso, Rubanga oko cweno gi koyarere di eko poko pii atie piny me gi koyarere nono kede pii kame tie malo mere. Eko timere kamanono.

⁸Rubanga oko lwongo gi koyarere nono be “Edou.” Piny oko yuto, odiko oko tuno, manono oko bedo ceng me are.

⁹Rubanga oko waco be poore pii atie piny me edou cokere karacel di lobo kakotuo ko neno. Eko timere kamanono.

¹⁰Rubanga oko lwongo kakotuo be “Lobo” di eko lwongo pii kocokere karacel be “Name.” Rubanga oko neno be oudo eber.

¹¹Rubanga oko waco be, “Lobo poore tui yen kede lum: giapita kame nyako nyige kede kame nyako anyakini me epone dedede kame nyige tie iye.” Eko timere kamanono.

¹²Yen oko tui i lobo, giapita me epone dedede kede yen kame nyako anyakini kame tie kede nyige. Di Rubanga oko neno be manono oudo ber.

¹³Piny oko yuto, odiko oko tuno, manono oko bedo ceng me adek.

¹⁴Di Rubanga oko waco be, “Poore gimogo arieny bed tie i edou koyarere pi poko iceng kede iwor; doko miero kibed gianena kame nyuto kare kede ceng kede mwakini,

¹⁵doko miero gin kibed lero kame tie i edou koyarere pi mino lero i lobo.” Eko timere kamanono.

¹⁶Rubanga oko timo gikame rieny are adongodongo; en eko keto gikame rieny adwong kalamo pi pugo iceng, kede gikame rieny momot mere pi pugo iwor; eko timo acerin da.

¹⁷Rubanga oko keto gi i edou koyarere pi mino lero i lobo;

¹⁸pi pugo iceng kede iwor, kede pi poko lero kede colo. Rubanga oko neno be oudo eber.

¹⁹Piny oko yuto, odiko oko tuno, manono oko bedo ceng me ongwon.

²⁰Di Rubanga oko waco be, “Pii miero bed tie kede gi atot akuo, kede da winy kame por i malo bed tie i wi lobo.”

²¹Aso, Rubanga oko cweno leini adongodongo kame bedo i name, kede giakuo me egere dedede kame twero ot, kame oko pong i yi pii, kede winy me egere dedede kame tie kede bwom gi. Rubanga oko neno be manono oudo ber.

²²Rubanga oko lamo negi winyo di ewaco be, “Nywalunu ikounu nyai ipongunu pie me name, kede winy da nyai i wi lobo.”

²³Piny oko yuto, odiko oko tuno, manono oko bedo ceng me kany.

²⁴Rubanga oko waco be, “Lobo miero bed tie kede gikame kuo me egere dedede: dok kede gikame liao alia, kede leini me obar me egere dedede kame tie i wi lobo.” Eko timere kamanono.

²⁵Rubanga oko cweno leini me obar me egere dedede kame tie i wi lobo, kede dok me egere dedede, kede gi dedede me egere apapat kame liao alia i piny. Rubanga oko neno be manono oudo ber.

²⁶Di Rubanga oko waco be, “Otimunu dano i cal wa; doko miero gin kibed kede loc i kom deknam, kede i kom winy me wi yamo, kede i kom doke, kede i kom leini me obar dedede kame tie i wi lobo, kede jame me egere dedede kame liao alia i piny.”

²⁷Aso, Rubanga oko cweno dano, ecweo gi i cal mere ka Rubanga; ecweo gi icuo kede dako.

²⁸Rubanga oko lamo negi winyo, di eko waco negi be, “Nywalunu ikounu nyai, di ikounu pongo lobo, ipugenu da; bedunu kede loc i kom deknam kede i kom winy me wi yamo, kede i kom giakuo dedede kame twero ot i wi lobo.

²⁹Ango atieko mino wu giapita dedede kame nyako nyige kame tie i wi lobo, kede yen dedede kame tie kede nyige i anyakini gi; ibinunu camo gi.

³⁰Do leini dedede kame tie i wi lobo, kede winy dedede kame tie i wi yamo, kede jamini dedede kame liao alia i wi lobo, kede gi dedede kame tie kede wei me kuo, atieko mino gi egere me pote dedede me acama gi.” Eko timere kamanono.

³¹Rubanga oko neno gi dedede kame oudo etieko timo, i ateni oudo kibeco twatwal. Piny oko yuto odiko oko tuno, manono oko bedo ceng me kanyape.