Read kumam Ageini 13 Bible Online

Ageini 13 - kumam bible

Ageini 13

¹Aburam oko yai ki Misiri di eko dok Negeb, en kede dako mere, karacel kede Lot kede jamini dedede kame en bin etie kede.

²Aburam oudo obaro twatwal kede dok, siliba kede saabu.

³En eko ot di ekokobo akokob, yai ki Negeb kiton tuno Betel kakame en oudo bin esipo iye eema i agege. Kanono oudo tie i dierediere me Betel kede Ai,

⁴kakame en bin egero iye alutari i agege. Aburam di oko woro Rwot i kanono.

⁵Lot da ngat kame bin tie ot karacel kede Aburam, oudo tie kede romini, diegi, dok kede jo kame bin bedo kede en.

⁶Pi mano, lobo me kwat oudo likame karuno romo gi ka gin dedede kibedo karacel; pien leini kame bin kitie kede oudo tot twatwal, oko mino likame kikaruno bedo karacel.

⁷Manono omio oudo lok maro bedo tie i dierediere me jokwat ka Aburam kede jokwat ka Lot. I kare nono oudo jo me Kanan kede jo Perisi tie bedo i lobo nono.

⁸Aburam di oko waco ne Lot be, “Mito lok kur bed tie i dierediere nango kedi, akadi da i dierediere me jokwat nin kede mega; pien wan wade.

⁹Mam lobo lung tie i nyimi? Pokere kibuta. Ka in iyero ot i bad tetu ngodal, ango abino ot tetu cam; arabo ka in ioto i bad tetu cam, ango abino ot tetu ngodal.”

¹⁰Lot oko tingo wange malo di eko neno aputon me Yorodan, dok tetu Soar; pii oudo tie iye kiber kabedo dedede bala poto ka Rwot, arabo bala lobo me Misiri. Man bin otimere di pwodi Rwot likame omuducaro Sodoma kede Gomora.

¹¹Lot di oko yero aputon me Yorodan en gire kene, di eko yai ot tetu kide. Epone no en kame gin kiko pokere kede.

¹²Aburam oko donyo bedo i lobo me Kanan, do Lot oko ot bedo i bomban kame bin tie i Aputon, di eko sipo eema mere i nget bomba me Sodoma.

¹³Jo me Sodoma bin obedo jo areco, jo kame otimo dub atot i nyim Rwot.

¹⁴Di do bin Lot otieko pokere kede Aburam, Rwot oko waco ne Aburam be, “Ting wangi malo di iko neno ki kakame itie iye no, tetu malo kede tetu piny, tetu kide kede tetu tim;

¹⁵pien lobo dedede kame in ineno nono, ango abino mino buti kede but ikwae ni atwal.

¹⁶Abino mino ikwae ni bedo tot bala asinge me lobo; tetekeny ka ngatamoro karuno maro wel me asinge me lobo, udo ikwae ni da kokaruno maro wel gi.

¹⁷Yai, bei i lobo nono di iko wapo boro kede laco mere, pien abino mine buti.”

¹⁸Aburam di oko dak ekobo eema mere eoto bedo i nget ejinga me Mamure, kame tie Keburon; di eko gero alutari kuno me woro Rwot.